Kiwango kilichoonyeshwa na mshambuliaji mpya wa Simba, Daniel Akuffo kimemchanganya kocha wa timu hiyo Milovan Cirkovic ambaye amefikia kusema haoni mshambuliaji wa kumfananisha naye nchini.
Mghana huyo aliyejiunga na Simba kwa mkataba wa miaka miwili akitokea Hearts of Oak ya Ghana, alikuwa kivutio juzi wakati alipofunga magoli mawili na kuisaidia timu yake katika ushindi wa magoli 12-0 wa mechi ya kirafiki dhidi ya timu ya shule ya sekondari ya St George ya Arusha Arusha ambapo Wekundu wa Msimbazi wameweka kambi ya kujiandaa na msimu mpya.
Kiungo Salum Kinje, aliyetua Simba katika kipindi hiki cha usajili akitokea Kenya, aling'aa katika dimba la kati huku pia akifunga 'hat-trick' katika mechi hiyo ya mazoezi.
Miongoni mwa wachezaji wengine walioifungia Simba katika "mvua" hiyo ya magoli walikuwa ni Abdalla Juma na Uhuru Selemani.
Milovan alitamba kwamba amepata mshambaliaji wa hatari atakayesaidiana na Felix Sunzu katika safu ya hatari ya Simba.
Alisema mshambuliaji huyo mrefu ana uwezo mkubwa wa kumiliki mpira, kasi, nguvu, ufundi na mbinu za kimchezo na kwamba Wekundu wa Msimbazi wamepata mchezaji mzuri sasa.
Aliisifu hali ya hewa ya Arusha akisema inawawezesha wachezaji kufanya mazoezi kwa muda mrefu bila ya kuchoka.
Mabingwa wa Ligi Kuu ya Bara Simba kesho watacheza mechi ya kirafiki dhidi ya AFC Leopards ya Kenya kwenye Uwanja wa Kumbukumbu ya Sheikh Amri Abeid jijini hapa.
No comments:
Post a Comment