DKT. KIJAJI AONGOZA MAZUNGUMZO YA KUKUZA UTALII WA TANZANIA NCHINI UINGEREZA

 

 

Waziri wa Maliasili na Utalii, Mhe. Dkt. Ashatu Kijaji (Mb) akiwa ameambatana na Katibu Mkuu wa Wizara hiyo, Dkt. Hassan Abbasi, ametua jijini London, Uingereza, kwa ajili ya kushiriki Maonesho ya Kimataifa ya Utalii ya WTM London 2026 yanayotarajiwa kufanyika Novemba 3–5, 2026.

Katika siku ya kwanza ya ziara yake, akiwa katika Ubalozi wa Tanzania nchini Uingereza, Dkt. Kijaji leo Novemba 2, 2026 amekutana na kufanya mazungumzo na wadau mbalimbali wa utalii kwa lengo la kujadili fursa na mikakati ya kukuza na kuitangaza Tanzania kama kituo cha utalii katika soko la kimataifa.

Katika mazungumzo hayo, Dkt. Kijaji amepokea wasilisho kuhusu utalii kutoka kwa Bw. Tim Henshall, Afisa anayeshughulikia masuala ya Utalii katika Ubalozi wa Tanzania nchini Uingereza (Tanzania High Commission UK).

Aidha, amekutana na kufanya mazungumzo na Bw. Craig Rix, Mtendaji Mkuu wa Gecko Publishing, ambapo wamejadili fursa za kuitangaza Tanzania kupitia machapisho ya Gecko Publishing, ikiwemo jarida la Travel Africa Magazine, ili kuongeza mwonekano wa vivutio vya utalii vya Tanzania katika masoko ya kimataifa.

Katika kikao kingine, Dkt. Kijaji amekutana na Bw. George Bartlam, Meneja wa Mauzo ya Ubia wa Klabu ya Soka ya Brentford (Brentford Football Club) ambayo kwa sasa inashika nafasi ya 6 katika Ligi Kuu ya Uingereza (EPL) ambapo wamejadili uwezekano wa kutumia klabu hiyo kuitangaza Tanzania.

Vikao hivyo vimehudhuriwa pia na Mwakilishi wa Balozi wa Tanzania nchini Uingereza, Bw. Patrick Mwakalobo na Mkurugenzi Mkuu wa Bodi ya Utalii Tanzania (TTB), Dkt. Thereza Mugobi. 

Mazungumzo hayo ni sehemu ya juhudi za Wizara ya Maliasili na Utalii za kupanua wigo wa ushirikiano na wadau wa kimataifa, kubuni njia bunifu za kuitangaza Tanzania na kuongeza idadi ya watalii wanaotembelea nchini.

TANAPA YAWEKA HISTORIA UGALLA: MRADI WA UMEME WA SHILINGI MILIONI 380.2 KUCHOCHEA MAENDELEO YA JAMII NA UTALII UGALLA

 

Na. Hance Mbena - Tabora

Shirika la Hifadhi za Taifa Tanzania (TANAPA) Novemba 02, 2026 limezindua mradi wa umeme katika Hifadhi ya Taifa Mto Ugalla uliogharimu kiasi cha shilingi milioni 380.2 za kitanzania, mradi utakaochochea maendeleo ya utalii, uhifadhi, uwekezaji pamoja na maendeleo kwa jamii zinazozunguka hifadhi hiyo.

Mradi huo umezinduliwa na Kamishna wa Uhifadhi TANAPA Massana Mwishawa ambapo alibainisha kuwa, mradi huo wa umeme unatarajiwa kuwa chachu ya maendeleo kwa wananchi wa kijiji cha Uyumbu kinachopakana na hifadhi, sambamba na kuboresha utoaji wa huduma kwa watalii na kuboresha maisha ya watumishi kwa kupata nishati ya umeme. 

Akizungumza katika Uzinduzi huo Kamishna Mwishawa alisema "mradi huu umelenga kuchochea shughuli za utalii na kuwavutia wawekezaji kuwekeza hifadhini kwa kuwasogezea na kuwarahisishia upatikanaji wa nishati ya umeme pamoja na kuwa chachu ya jamii kuanzisha shughuli mbalimbali za uzalishaji zinazotokana na matumizi ya umeme na kujitengenezenea kipato".

Aidha, Mkuu wa Kanda ya Magharibi TANAPA, Kamishna Msaidizi Mwandamizi wa Uhifadhi Godwell Meng’ataki  alisisitiza upatikanaji wa umeme unatarajia kufungua fursa mpya za kiuchumi kwa wananchi pamoja na kuchochea shughuli za maendeleo. Hatua hiyo pia itasaidia kuimarisha huduma kwa watalii, kuongeza uzoefu kwa watalii na kuchangia ukuaji wa sekta ya utalii katika Hifadhi ya Taifa Mto Ugalla.

Naye, Mkuu wa Hifadhi ya Taifa Mto Ugalla, Kamishna Msaidizi wa Uhifadhi Moronda Moronda ametoa shukrani kwa TANAPA kwa kufadhili na kutekeleza mradi wa kimkakati wa usambazaji wa umeme wenye thamani ya Shilingi milioni 380.2, alieleza kuwa mradi huo ni hatua kubwa katika kuboresha mazingira ya kazi kwa watumishi na kuongeza hamasa katika utoaji wa huduma kwa watalii na kuongeza pato la Taifa. 

Mradi huo umehusisha uwekaji wa nguzo 96 za zege pamoja na transfoma moja yenye uwezo wa KVA 100 zitakazowezesha upatikanaji wa umeme na kuimarisha mifumo ya uendeshaji na ufanisi wa shughuli mbalimbali na ndani ya hifadhi.

TANAPA inaendelea kutekeleza dhamira yake ya kuunganisha uhifadhi na maendeleo ya jamii kwa kuwekeza katika miradi ya kimkakati yenye manufaa ya muda mrefu. Mradi huu ni kielelezo cha namna uwekezaji katika miundombinu unavyoweza kuleta matokeo chanya kwa jamii, kuboresha huduma za utalii na kuimarisha uhifadhi endelevu kwa manufaa ya Taifa.

KHANGA NI KITABU KINACHOTEMBEA, TABIA NJEMA VAZI LA KUDUMU - FARIDA SEKIMONYO

 

Dar es Salaam - Mgeni Rasmi wa Tamasha la Kanga 2026, Bi Farida Sekimonyo Mkurugenzi wa kampuni ya Faith and Entertainment  amesema khanga si kitambaa tu bali ni historia, maarifa na utambulisho wa jamii. Akizungumza Nov 1, 2026 Kijiji cha Makumbusho kwenye tamasha la Khanga 2026 lililoandaliwa na Dira Women Organization (DIWO) chini ya Bi Shamsa Juma Danga,

Amesema kanga ni kitabu kinachotembea. "Maneno ya kwenye khanga hayapaswi kuwa mapambo tu. Khanga ni vazi linalochakaa lakini tabia njema ni vazi la kudumu. Khanga inayosema Subira huvuta heri itukumbushe kuwa na subira."

Kwenye tamasha hilo ameagiza watoto 25 walioshiriki kuonesha mavazi hayo ya ubunifu wa mitindo kufunguliwa akaunti Azania Bank ambapo atagharamia fedha za awali, kama kumbukumbu ya kudumu na kuwajengea utamaduni wa akiba.

Amesema khanga inachangia uchumi na utalii kupitia magauni, mikoba na zawadi za utalii. Ameshauri ubunifu wa khanga zenye mandhari ya Kilimanjaro na wanyamapori. Amesema AFCON 2027 ni fursa ya kutangaza kanga kimataifa.

"Vazi la Taifa na utambuzi wa UNESCO vinahitaji mjadala na utafiti. Kidole kimoja hakivunji chawa na khanga isiishie kuwa kumbukumbu ya jana iwe fahari ya leo na fursa ya kesho," amesema Bi. Farida Sekimonyo.

Kwa upande wake Mwenyekiti wa DIWO Bi Shamsa Danga amesema lengo ni kuwarithisha watoto utamaduni hususani kanga. "Wazazi wetu wameturithisha kanga, kizazi cha 2000 hawajui. Mtoto anapozaliwa anavikwa kanga na kwa Waislamu mpaka kaburini jeneza linawekwa na kanga."

Nae Mwanzilishi wa Usiku wa Kanga za Kale, Bi Asya Idarous Khamsin anayeishi Marekani amesema jukwaa hilo lilibeba wabunifu chipukizi na sasa ni wakubwa ndani na nje. "Awali ilikuwa kwa taabu lakini lilikua na kuwa kubwa nchini."

"Kanga ina historia, ukizaliwa unapewa kanga, ukioga unapewa kanga kujifuta, kazi yake ni kubwa na ina thamani na inanunuliwa sana nje na ndani," amesema Asya.

Tamasha limehudhuriwa na Serikali, BASATA, taasisi za utamaduni na wadhamini Azania Bank na wengine wengi.

NDANI YA DAKIKA 15 JINSI MADAKTARI BINGWA WA HOSPITALI YA RUFAA YA KANDA YA NYANDA ZA JUU KUSINI WALIVYOFUTA GIZA LA MIAKA MINGI TABORA

 

Mapinduzi makubwa ya kihistoria katika sekta ya afya yanaendelea kushuhudiwa katika Hospitali ya Wilaya ya Sikonge mkoani Tabora ambapo ambapo madaktari bingwa wa macho kutoka Hospitali ya Rufaa ya Kanda za Nyanda za Juu kusini wameweka kambi maalum ya upasuaji wa mtoto wa jicho kuwezesha kuwarejeshea nuru, utu, na tabasamu zaidi ya wananchi 400 ambao hapo awali wamekuwa gizani, huku ikivunja kuta za kijiografia na kifedha kwa familia masikini.

Wakitumia ujuzi wa hali ya juu Wataalamu hao wameweza kufanya upasuaji salama unaochukua wastani wa dakika 15 kwa kila magonjwa ambapo dakika hizi chache zimekuwa na thamani ya dhahabu, zikifuta giza la miaka mingi na kuwapa wagonjwa fursa ya pili ya kuona ulimwengu na kuzitua familia masikini mzigo mzito wa gharama za kusafiri umbali mrefu kufuata matibabu hayo ya kibingwa mkoani Mbeya au mikoa mingine ya mbali.

Akizungumza na wanahabari Daktari kiongozi wa timu ya wataalamu hao Dkt. Barnabas Mshangila wa Hospitali ya Rufaa ya Kanda ya Nyanda za Juu Kusini ameeleza kuwa ugonjwa wa Mtoto wa jicho huwasababisha watu uwezo wao wa kuona wa kushiriki kwenye shughuli za kiuchumi kama kulima, kufanya biashara, na kujitegemea, jambo linaloongeza utegemezi wa kiuchumi ndani ya ngazi ya familia.

Ameeleza kuwa kambi hiyo ya matibabu ya upasuaji wa mtoto wa jicho  haijarejesha tu uwezo wa kuona, bali imempa kila mwanafamilia husika aliyekuwa akimwongoza ndugu wake fursa na uhuru wa kurejea katika shughuli binafsi au shuleni kwa Watoto katika ukombozi wa kielimu na utamaduni mpya unaookoa mustakabali wa kizazi kijacho cha wana-Sikonge

“Kwa kuwarudishia uwezo wa kuona zaidi ya wananchi 300, kambi hii imefungua milango ya kiuchumi kwa zaidi ya watu 600—ikijumuisha wagonjwa wenyewe na wauguzi wao ambao sasa wamepata uhuru. Sasa, nguvu kazi hii muhimu inarejea kwa kasi mashambani na kwenye biashara, hatua itakayochochea ukuaji wa uchumi wa wilaya ya Sikonge na kupunguza umaskini.” – Dkt. Mshangila

Nae Meneja wa Shirika la Kimataifa la Helen Keller Intl nchini Tanzania, Athuman Tawakal ameeleleza kuwa mafanikio ya kambi hii ni matokeo ya muundo thabiti wa kiuongozi na ushirikiano wa kimkakati kutoka taasisi kuu tatu, Wizara ya Afya kwa mwongozo thabiti wa kisera na uratibu wa kitaifa, ikihakikisha huduma hizi za kibingwa zinawafikia wananchi wa maeneo ya pembezoni kwa usawa na viwango vya juu zaidi, Hospitali ya Rufaa ya Kanda ya Nyanda za juu kusini kama moyo wa operesheni hii, kwa kuonyesha uzalendo na weledi wa hali ya juu kwa kutoa huduma bila uchovu na Shirika la Hellen Keller International nguzo kuu katika utoaji wa rasilimali, vifaa tiba, na kuhamasisha jamii ili kuondoa unyanyapaa na hofu dhidi ya upasuaji wa macho.

Zaidi ya wananchi 400 wanatarajiwa kufanyiwa upasuaji wa mtoto wa jicho katika kambi hii ya siku saba, iliyoanza tarehe 25 Oktoba na inayotarajiwa kuhitimishwa rasmi tarehe 31 Oktoba,

JKCI NA HTAF ZALENGA SHILINGI BILIONI 25 KUSAIDIA MATIBABU YA WATOTO 1,000 WENYE MAGONJWA YA MOYO

 

Hafla ya JKCI–HTAF Prestige Gala Dinner 2026 inalenga kuunga mkono juhudi za Serikali katika kugharamia matibabu ya moyo kwa watoto na kujenga Nyumba ya Matumaini.

TANZANIA inakabiliwa na changamoto ya watoto wanaozaliwa na matatizo ya moyo, hali inayohitaji ushirikiano wa Serikali, sekta binafsi, taasisi na wadau mbalimbali ili kuhakikisha watoto wenye uhitaji wanapata huduma za matibabu kwa wakati.

Katika kukabiliana na changamoto hiyo, Taasisi ya Moyo ya Jakaya Kikwete (JKCI), kwa kushirikiana na Heart Team Africa Foundation (HTAF), inalenga kukusanya shilingi bilioni 25 kupitia hafla ya JKCI–HTAF Prestige Gala Dinner 2026, itakayofanyika tarehe 4 Desemba 2026 katika Hoteli ya Malaika Beach Resort jijini Mwanza, chini ya kaulimbiu “Okoa Moyo wa Mtoto, Okoa Taifa.”

Fedha hizo zinalenga kusaidia matibabu ya watoto 1,000 wenye matatizo ya moyo katika kipindi cha miaka 4 hadi 5, pamoja na kugharamia vipengele vingine vya mpango huo, ikiwemo ujenzi wa Nyumba ya Matumaini, itakayosaidia watoto wanaopatiwa matibabu na familia zao.

Mgeni Rasmi katika hafla hiyo anatarajiwa kuwa Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan.

Makadirio yaliyotolewa yanaonesha kuwa watoto 16,000 hadi 24,000 wanaweza kuzaliwa na matatizo ya moyo nchini kila mwaka. Kati yao, takribani watoto 4,000 wanakadiriwa kuwa na magonjwa makali ya moyo yanayohitaji upasuaji ndani ya mwaka mmoja

Changamoto inayowakabili baadhi ya watoto hao si ukosefu wa wataalamu , bali pia uwezo wa familia kugharamia sehemu ya matibabu inayobaki baada ya mchango wa Serikali.

Serikali ya inagharamia asilimia 70 ya gharama za matibabu ya watoto wenye matatizo ya moyo, huku mzazi au mlezi akiwajibika kugharamia asilimia 30 inayobaki. Hata hivyo, kutokana na hali ngumu za kiuchumi, familia nyingi hushindwa kumudu sehemu hiyo ya gharama, jambo linaloweza kuchelewesha watoto kupata huduma wanazohitaji.

Akizungumzia umuhimu wa kuunganisha nguvu katika kukabiliana na changamoto hiyo, Mkurugenzi Mtendaji wa Taasisi ya Moyo ya Jakaya Kikwete (JKCI), Dkt. Peter Kisenge, amesema Tanzania ina wataalamu na uwezo wa kutoa huduma za upasuaji wa moyo kwa watoto

SERIKALI YATEKELEZA MKAKATI WA KITAIFA WA UTATUZI WA MIGONGANO BAINA YA BINADAMU NA WANYAMAPORI WAKALI NA WAHARIBIFU

Na Mwandishi wetu, Dodoma

Naibu Waziri wa Maliasili na Utalii Mhe. Hamad Hassan Chande (Mb) Serikali imeendelea kutekeleza Mkakati wa Kitaifa wa kusimamia utatuzi wa migongano baina ya Binadamu na Wanyamapori kwa kuwadhibiti wanyamapori wakali na waharibifu hususan tembo wanaovamia na kusababisha uharibifu wa mazao na mali za wananchi kwenye maeneo mbalimbali hapa nchini.

Mhe. Chande amesema hayo  Oktoba 28, 2026 katika Kikao cha pili cha Mkutano wa Tano wa Bunge la Jamhuri ya Muungano wa Tanzania wakati akijibu swali la Mhe. Yohana Stephen Msita (Mb) aliyetaka kufahamu mpango wa Serikali katika kudhibiti wanyama waharibifu hususan tembo wanaosababisha uharibifu wa mazao na mali Jimbo la Itigi.

Mhe. Chande amesema miongoni mwa jitihada hizo ni pamoja na kuendelea kutumia kituo cha kudumu cha Askari kilichopo katika Kijiji cha Doroto na kambi za muda mfupi kwenye vijiji vya Chisingisa, Sanjaranda, na Kitaraka kwa ajili ya kuitikia kwa haraka kwenye matukio na kudhibiti wanyamapori wakali na waharibifu, kuendelea kuimarisha doria za kudhibiti wanyamapori wakali na waharibifu na kuendelea kutoa elimu kwa wananchi kuhusu mbinu rafiki za kudhibiti wanyamapori hao.

Vilevile ametaja jitihada nyingine ni kuwagawia wananchi nyenzo na vifaa rafiki vya kudhibiti na kufukuza tembo kwenye vijiji mbalimbali, kuendelea kutumia teknolojia ya ndege nyuki (drones), na kuendelea kushirikiana na wadau ambapo Serikali kwa kushirikiana na shirika lisilo la kiserikali la Southern Tanzania Elephant Program (STEP) imetengeneza vihenge 24 vya kuhifadhi mazao vilivyoboreshwa. 

Aidha, Mhe. Chande amesema sambamba na hatua hizo, Serikali imevuna tembo wawili (2) waliokuwa wakihatarisha usalama wa maisha na mali za wananchi katika vijiji vya Doroto na Sanjaranda vilivyomo jimboni humo.

WAZIRI AWESO AMTEUA PENGO MAKEKE KUWA BALOZI WA KUPAMBANA NA UPOTEVU WA MAJI

Waziri wa Maji Mhe. Jumaa Aweso 

Mchekeshaji na mtengenezaji wa maudhui maarufu nchini, Fadhil Adam Atiki anayejulikana kama Pengo Makeke, ameteuliwa kuwa Balozi wa Mapambano dhidi ya Upotevu wa Maji nchini.

Uteuzi huo umetangazwa na Waziri wa Maji, Mhe. Jumaa Aweso, kufuatia ubunifu wa msanii huyo wa kutumia sanaa na vipaji vyake kuelimisha jamii kupitia maudhui ya mtandaoni yanayoonyesha athari za upotevu wa maji kwa njia ya kuigiza na kuburudisha.

Katika ujumbe wake kupitia mitandao ya kijamii, Waziri Aweso amempongeza Pengo Makeke na kueleza kuwa Wizara imeguswa na kazi yake.

Nikupongeze kwa dhati kwa ubunifu huu Pengo Makeke kwa kutumia sanaa na kipawa chako kutuma ujumbe muhimu na kuelimisha jamii hususani katika mapambano makali tuliyonayo ya upotevu wa maji nchini. Binafsi nimeelimika zaidi, nimejifunza na nimeburudika, ameandika Waziri Aweso.

Waziri huyo ameongeza kuwa sanaa ya Pengo Makeke imeongeza chachu katika vita dhidi ya upotevu wa maji na kwamba Wizara ipo kazini kuhakikisha kila tone la maji linalindwa.

Nikumbee Pengo Makeke, endelea kuwa balozi wa kampeni yetu hii ya kuhakikisha tunalinda thamani ya kila tone. Tufike hatua tuone upotevu wa maji kama upotevu wa fedha, alisisitiza.

Kufuatia uteuzi huo, leo Oktoba 29, Pengo Makeke amefanya ziara katika Mamlaka ya Majisafi na Usafi wa Mazingira Dar es Salaam (DAWASA) na kupokelewa na Afisa Mtendaji Mkuu wa DAWASA, Mhandisi Mkama Bwire.

Kwa mujibu wa taarifa ya DAWASA, katika kikao hicho pande mbili zimeweka mikakati mbalimbali ya kufikisha elimu kwa wananchi juu ya mapambano dhidi ya upotevu wa maji kupitia sanaa.

Pengo Makeke kupitia ukurasa wake ameishukuru Wizara na wananchi kwa ujumla.

Asiyeshukuru watu, hata Mungu hawezi kumshukuru! Asante sana Mheshimiwa Waziri wa Maji Jumaa Aweso na katibu wako makini Gipson George. Asanteni sana wananchi, ndugu, jamaa na marafiki. Naomba ushirikiano wenu, ameandika Pengo Makeke.

Waziri Aweso pia ametoa wito kwa Mamlaka zote za Maji nchini kuchukua hatua haraka wanapopokea taarifa za mabomba kupasuka au kuvuja, na pia amewataka wasanii na watengeneza maudhui nchini kuona fursa zilizopo katika sekta ya maji kama vile mapambano dhidi ya mabadiliko ya tabianchi, ulinzi wa vyanzo vya maji na matumizi ya teknolojia ya mita janja.

Pengo Makeke 

Pengo Makeke akiwa DAWASA