KIKWETE AHUDHRIA MKUTANO WA SADC MSUMBIJI

Rais  Jakaya Kikwete, aliondoka nchini jana  kwenda Maputo, Msumbiji kuhudhuria Mkutano wa Mwaka wa Wakuu wa Nchi Wanachama wa Jumuia ya Maendeleo Kusini mwa Afrika (Sadc) unaoanza leo.

Kwenye mkutano huo wa siku mbili, Rais Kikwete anatarajiwa kuchaguliwa rasmi kuwa Mwenyekiti wa Chombo Maalum cha Sadc cha Kusimamia Masuala ya Siasa, Ulinzi  na Usalama (Troika).


Kwa sasa Troika inaundwa na Tanzania, Afrika Kusini na Zambia.

Miongoni mwa mambo ambayo wakuu hao wa nchi wanachama wa Sadc watajadili ni pamoja na hali ya siasa na usalama katika eneo la Sadc na hasa katika nchi za Madagascar na Mashariki mwa Jamhuri ya Kidemokrasia ya Congo (DRC) ambazo zote mbili ni wanachama wa Sadc.

Sadc ina nchi wanachama 15 ambazo ni Tanzania, Angola, Botswana, DRC, Lesotho, Madagascar, Malawi, Mauritius, Mozambique,Namibia, Shelisheli, Afrika Kusini, Swaziland, Zambia na Zimbabwe.

Wakati huo huo, Rais Kikwete ametuma salamu za rambirambi kuomboleza kifo cha ghafla cha aliyekuwa Mwenyekiti wa Chama Cha Mapinduzi (CCM) Wilaya ya Handeni, mkoani Tanga, Athuman Ramadhan Chamuya, kilichotokea usiku wa kuamkia jana.

Rais Kikwete ambaye pia ni Mwenyekiti wa CCM, ametuma salamu hizo kwa Mwenyekiti wa CCM wa Mkoa wa Tanga, Mussa Shekimweri, akimweleza kuwa amepokea taarifa za kifo kwa huzuni na mshtuko.

“Chamuya ametutoka katika kipindi wakati uongozi wake katika Wilaya ya Handeni ulikuwa bado unahitajika sana. Nakutumia wewe Mwenyekiti wa Mkoa salamu zangu za rambirambi. Kupitia kwako natoa mkono wa pole na rambirambi kwa familia ya ndugu Chamuya. Aidha, nawapa pole wana-Handeni wote na wana-CCM wa wilaya hiyo,” alisema.

Na katika hatua nyingine, Rais Kikwete, jana alipokea hati za utambulisho za mabalozi wa India na Hispania ambao wataziwakilishi nchi zao hapa nchini.

Akizungumza na Balozi wa India, Debnath Shaw,  baada ya kupokea hati yake ya utambulisho katika hafla fupi iliyofanyika Ikulu, jijini Dar es Salaam, Rais Kikwete, amemhakikishia balozi huyo kuwa ni dhamira ya Serikali yake kukuza zaidi uhusiano kati ya Tanzania na India.

“Tanzania na India zimekuwa na uhusiano mzuri sana na muda mrefu sana. Tumekuwa na uhusiano kati yetu na pia tumeshirikiana kwenye taasisi mbalimbali za kimataifa ikiwamo ya Kundi la Nchi 77 na kwenye Umoja wa nchi zisizofungana na upande wowote,” alisema Rais Kikwete.

Aliongeza: "Siyo tu kwamba uhusiano kati yetu umekuwa mzuri sana, lakini pia Tanzania imenufaika mno kutokana na uhusiano huo. India imekuwa chimbuko kubwa ya uwekezaji katika Tanzania. India pia imekuwa ni soko kubwa la bidhaa za Tanzania. Tungependa kuona uhusiano huu unakua zaidi.”