Leo Mkanyia ndani ya Alliance Francais

Lile jimbo lililo gumzo la mjini hivi sasa lawika tena.

Leo Mkanyia akiwa na timu kamili ya Swahili Blues Band wameipagawisha jumuiya ya kimataifa iishiyo jijini Dar es Salaam jumatano hii. Haya yametokea kwenye ukumbi wa Alliance Francais katika onyesho kabambe lililo andaliwa na Kituo cha Utamaduni cha Ufaransa. Onyesho hilo maarufu kama Barazani ni la mwisho katika mwaka huu wa 2014. Swahili Blues Band pamoja na wasanii kadhaa walipewa heshima ya kupiga mshindo katika show hii kabambe ya kufungwa mwaka.

Swahili Blues Band walipiga nyimbo zao kadhaa zikiwemo zile maarufu kama vile Che Maria, Afrika na Ewe Mwana. Kadamnasi iliyobahatika kuhudhuria show hiyo kabambe ilikuwa ni sehemu ya historia baada ya kushirikishwa kuimba kiitikio cha wimbo ambao kwa sasa umejizolea umaarufu mkubwa katika medani za kimataifa yaani ‘Pamoja’. Wimbo huu mahususi wakuhamasisha jamii ya kimataifa kuungana na kuushambulia ugonjwa mkubwa sana kwa sasa yaani Ebola, ulipigwa kwa mara ya kwanza mjini Nottingham Uingereza. Jumatano hii ilikuwa ni mara ya kwanza kwa wimbo huo kucharazwa live ndani ya ardhi ya Bongo. Leo aliwasherehesha na kuwaimbisha umati mkubwa ulio hudhuria kuimba kiitikio cha pamoja kwa pamoja.

Mdau wa Vijimambo alipata fursa ya kukutana na kumuuliza Leo,kulikoni mbona wewe shughuli zako zote mara Nottingham, mara Derby, kila ijumaa kwenye hoteli ya nyota tano ya Serena na sasa hapa Alliance Francais?je huu si aina fulani ya ubaguzi kwa Watanzania wenzako wa kawaida?au wewe muziki wako si kwa ajili ya Watanzania wakawaida?

Huku akitabasamu, Leo alijibu “La hasha, si ubaguzi hata kidogo.”

Pengine hao ulio wataja wamechukua muda mfupi zaidi kuelewa ninachotaka kuwaambia wasikilizaji wangu.

Pengine hao wamekuwa wepesi zaidi katika kutuunga mkono kwenye harakati zetu za kujaribu kuurudisha muziki wetu wa Tanzania katika asili yake.

Pengine hao wamegundua kwa haraka zaidi kuwa nina vitu vya kuwaambia jamii na muziki ni njia tu yakufikia azma hii. Vile vile Leo aliendelea kwa kusema kuwa “Nikutoe shaka ndugu yangu, hapa nyumbani tumeanza

 

kupata ushirikiano mkubwa kutoka kwa wadau mbali mbali.” Aliendelea kwa kutoa mifano ifuatayo.

EA Radio wameshatuita kwa mahojiano mara kadhaa na wanacheza sana nyimbo zetu.

City Radio Fm nayo hali kadhalika nyimbo zetu zimekuwa maarufu hadi kufikia kuombwa mara kwa mara na wasikilizaji wao.

Radio One tumesha fanya nao mahojiano na nimepata taarifa kuwa wimbo wenu kipenzi wa Che Maria umeingia katika top ten show yao.

Bongo5 nao tushafanya nao mahojiano kabambe sana.

Jumamosi ya wiki hii saa 6 hadi 7 za mchana tutakuwa wageni wa Radio Tumanini.

Leo aliendelea “hivyo mdau utaona kwa hakika tunavyo shirikiana na wadau mbali mbali hapa nchini kwetu. Sidhani kama bado utatuita sisi ni wabaguzi dhidi ya Watanzania wenzetu.” Mwisho kabisa Leo akapenda kumalizia kwa kusema kuwa “kwa sasa tuko katika jitihada za kupata sehemu hapa mjini ili tuweze kupiga mara kwa mara kwenye sehemu ambazo wanachi wa kawaida wanaweza kutufika kwa urahisi . Tuna nafasi ya kupiga siku za Alhamis, Jumamosi na Jumapili. Haya yote ni katika kuhakikisha tunampatia Mtanzania mwenzetu muziki wake wa asili anaoupenda yaani Swahili Blues.” Alimalizia Leo Mkanyia.

 

 vijina wakiwa kazini hii ndiyo shughuri ya Leo akiwapagawisha vijana kazini

 Ruksa kwa kila mtu akiguswa na milindimo mambo huwa hivi hata ukiwa na na viatu virefu ruksa.