WABUNGE WAWAJIBIKE KWA WANANCHI

Na Augustino (Tino) Malinda

Kwanza napongeza uamuzi wa serikali ya Rais Jakaya kikwete kukubali kufanya mabadiliko ya katiba ni jambo ambalo watawala wengi hawalipendi kwani katiba zinazowaweka madarakani   ndizo katiba nzuri, kwa mujibu wa mitazamo yao katiba hizo hazipaswi kubadilishwa.

Lakini kwa  raisi Kikwete kukubali  inahitaji pongezi bila kuangalia utata ambao umezuka wa wabunge kukataa na bunge kuburuza muswada  wa mabadiliko ya katiba, bado   naita mwanzo mzuri    kwani nia ni mabadiliko ya katiba.

Sasa wakati tunajiandaa kuijadili na kupata   vipengele vya     kuondolewa ama kutiliwa mkazo    katika katiba ni vyema tukaangalia kwa undani mustakabari na mwenendo wanchi  yetu  hasa katika swala la   ubunge na uongozi wa kuchaguliwa, nina   mengi ambayo ningependa yafanyiwe mabadiliko ndani ya katiba    lakini leo nataka niongelee jambo moja tu  la UBUNGE NA UONGOZI WA KUTEULIWA.

Nimeamuwa kuliangalia suala hilo kutoka na matukio     yaliyojili hivi karibuni katika vyama vyote  vya siasa ,kuanzia  CCM,CHADEMA,NCCR-MAGEUZI hadi TLP, kuhusu  kutishiana   hadi kufukuzana, CCM  bado    kufukuzana  lakini walishawahi kutishiana na kumekuwa na kauli za kuelekea huko.

Labda  tukumbushane  tu yaliyojili CCM, wakati akiwa spika    bwana Samuel Sitta alitishiwa kufukuzwa  nasikia akamwangukia    rais Kikwete amuokoe, juzi nilimsikia kiongozi  mstaafu wa CCM akisema kuwa mafisadi wana nguvu kwakuwa  wana vyeo  na kama wakiondolewa katika   vyeo hivyo nguvu zao zitakwisha na kumekuwa    na   misukumo ya dhati        ya kutaka kuwaondoa baadhi ya viongozi ndani ya CCM kama wasipojiuzuru wenyewe.na kwa mujibu wa katiba iliyoko      kama wakiondolewa/wakinyang’anywa  uanachama    ubunge    nao kaputi.Naomba nieleweke sitetei ufisadi, na nasema kama kiongozi ni fisadi hafukuzwi  chama anashitakiwa na sheria ya nchi inasema   ukipatikana na makosa  unapoteza uongozi.

CHADEMA walishafukuza wale madiwani wa Arusha ambao sasa si  madiwani tena ingawa  swala lao  liko mahakamani lakini mwisho wake ni kuupoteza  udiwani kwa mujibu wa  katiba hii, NCCR-MAGEUZI nayo ina sakata la Kafulila  na CUF    bwana Hamad hawa wote kwa mujibu wa katiba hii wanaondoka tu, TLP ilishafanya vitu  vyake kwa diwani wake wa kuteuliwa imemuondoa kwa kumpokonya uanachama.Hawa wote ni    viongozi wa kuchaguliwa ukiondoa huyo wa TLP ambaye ameteuliwa.

Ukiangalia matukio hayo utaona kuwa uongozi wowote wa kuchaguliwa si ridhaa ya wananchi tena bali ni ridhaa ya chama   ulichotumia kuombea uwakilishi na kuishi katika nafasi hiyo tunayoiita  uwakilishi wa wananchi kutatokana na juhudi zako za kubusu pete za wakubwa wa chama lasivyo unaondoka.

Wakati Tanzania ilipokuwa ikipata msukumo wa kuingia katika vyama  vingi kulikuwa na kiongozi mmoja anaitwa Christopher Mtikila alifungua mashitaka ya kutaka kuwe na mgombea huru kwani katiba ilikuwa ikisema  mtanzania anahaki ya kugombea nafasi ya uongozi ingawa kulikuwa na sifa za  umri.  Nakumbuka  kesi hiyo aliifungulia mkoani Dodoma na jaji wa mahakama kuu kanda ya Dodoma akampa ushindi. Wadau wengi    na wanaharakati, wasomi na  kila mtu akaona sasa mambo sio mabaya ugombea huru sasa tiki.

Kitendo hicho hakikuifurahisha  CCM nakumbuka vizuri sana rais wa wakati huo  Ali Hassan Mwinyi  akaitisha kikao  katika ukumbi wa bunge wakati huo ukiwa     mjini  Dar es Salaam katika   jengo la Karimjee kutaka wabadilishe  katika iwe    mtanzania anahaki ya  kugombea lakini    kupitia chama, yaani waongeze setensi ya kupitia chama  cha siasa.

Nikiwa pale bungeni nilipata  fursa ya   kuongea  na mmoja wa wabunge ambaye alitokea kunipenda  sana  Dr Ngunangwa alikuwa  mbunge wa Njombe.akanieleza azma ya mkutano huo na kwamba    yeye amemuelewa vizuri  rais Mwinyi na   yuko tayali kumuunga mkono katika kukarabati hicho kifungu.

Kwa tashwishwi nikamuuliza  hoja alizozipata ni zipi za kumfanya  akubaliane na rais  kukarabati kifungu hicho, akasema     rais ametuasa kuwa kama  tukiachia tuwe na mgombea huru itakuwa ngumu ukimshinda mtu katika kura za mwanzo ndani ya chama au  akikushinda  halafu kamati kuu ikikurudisha , yeye atatoka na kugombea kwa sera za CCM kama mgombea huru, na kwa kuwa atadai yeye ni mwana CCM hayuko  upinzani, ndugu mtakuwa na hali  ngumu, “unaona hilo kijana ndo maana   naona kauli yake ina mantiki” akanieleza Dr Ngunangwa.

Baada ya kumsikiliza nilimuuliza sasa hilo ni kwajili ya nyie  kuendelea kuwa wabunge na kuminya  watu wengine au kwa ajili ya nchi, kumbuka haya  hayakuwa mazungumzo ya habari za  gazeti    haya yalikuwa ya kama  baba na mwana.

Nikamweleza  Dr Ngunangwa  hii sheria mnayopitisha  kwa maslahi binafsi itawaumiza nyie , nikamuasa yeye kama mbunge atunge sheria kwa maslahi ya vizazi vijavyo  na maslahi ya nchi na wala sio maslahi ya chama wala binafsi, mzee   akashusha pumzi mi nikaondoka nilikosa amani sana kwa mstakabari wanchi kuamuliwa kwa maslahi binafsi. Kipengele kilifanyiwa ukarabati na wabunge wakapiga kura ya ndio kifungu cha mgombea binafsi kikafa kikazikwa.

Baada ya muda kidogo mama Ann Makinda akiwa mkuu wa mkoa  wa Ruvuma akaanza kukinyemelea kiti   cha Dr Ngunangwa,mama  Makinda akiwa na pesa lukuki alizotoka  nazo   akiwa waziri wa maendeleo ya kinamama na watoto jumlisha ukuu wa mkoa wa Ruvuma akaanza kugawa mazawadi zikiwemo baiskeri kwa viongozi  wa  CCM wa vijiji, kata, tarafa na wilaya katika jimbo la Dr Ngunangwa.

Dr Ngunangwa akawa na wakati mgumu akafoka na kuja na msamiati wa “ALIKWINA” yaani kwa kibena alikuwa wapi?, hiyo ikiwa ni kijembe kwa mama Makinda kwamba aliwaacha wabena siku zote sasa anataka  ubunge  ndo analeta mazawadi lakini    ndugu kifo cha   nyani    miti yote inateleza Dr Ngunangwa akaangushwa   na  hakukuwa na nafasi ya mgombea huru ikabidi ajiunge na NCCR-MAGEUZI ya Mrema akaitwa mpinzani na wakati huo    vijijini ukiiitwa mpinzani ni hukumu ya kifo cha kisiasa,unaonekana unapingana na rais Julius Nyerere, mzee akapoteza ubunge. Tulipoonana akasema kijana ulisema kweli.

Kwanini nakumbushia habari ya miaka mingi iliyopita, kama mwandishi  na mwanahistoria ninaamini   tunajirekebisha kutoka  na matukio pita (past Events) na ninaogopa kwani ninavyoona       kuna ukakika wa historia kujirudia  kutokana na upitishwaji wa muswada wenyewe  bungeni.

Tuangalie    hata    jinsi muswada ulivyopitishwa, ulipitishwa kiushabiki bila kuangalia    na kuutafakari kwa makini, wakati   wasomi na wanaharakati wakiomba  ujadiliwe kwa kina    na huku baadhi ya wabunge wakisusia  vikao, wabunge wengine walikuwa wakiwapiga wenzao   vijembe kama  vile   ni masuala ya chama     na sio nchi.

Ni vyema    wabunge wakatafakari kwani kina  sheria hii ya viongozi wakuchaguliwa,  kupoteza nafasi zao    kwa kura ya  turufu ya  chama, kwani inawanyima haki wale waliomchagua ambao ni wengi kuliko wale wanaomfukuza.

Wote tunaelewa kuwa kura za mwanzo   za vyama  hazizidi  hata elfu tatu mtu anashinda lakini   kwenye uchaguzi mkuu mtu anachaguliwa  kwa kura hata laki moja, ni vyema wabunge wakaliona hilo na viongozi wetu wakaacha  ubinafsi na kuangalia maslahi ya nchi zaidi.

Wakati  mwingine unaona wabunge wanashindwa kuikosoa  sana serikali kwani anaweza akapoteza ubunge kwa kunyang’anywa uanachama, watu kama Nape Nnauye wanaweza kukalipia wabunge na wabunge nao wanashindwa kujibu  mapigo kwani wanaweza kuula wa chuya.Sisemi kusiwe na nidhamu  ndani ya chama  hapana nataka nidhamu iwepo na maslahi ya nchi yaangaliwe.

Kama wabunge watakuwa huru na hata kama wakifukuzwa kwenye vyama      wanabaki   na ubunge wao itasaidia sana kuwafanya wawajibike zaidi kwa wananchi na kuifanya serikali iwajibike zaidi, lakini ikiwa ni kinyume tutaendelea kuwa na bunge la muhuri (rubber stamp).

Tuangalie yaliyowakuta wabunge wa zama za Dr  Ngunangwa, basi na   nyie mliopo madarakani sasa msitumbukie  katika  mtego huo, wakati  wa  muswada wa mabadiliko ya katiba ukija msisahau kuangalia na kupitisha la mgombea  huru  ili demokrasia na uwajibikaji   uwe mzuri.

Aksante kwa leo  mie kona ya diaspora naweka   hoja.

Tuwasiliane   katika barua pepe amalinda3@hotmail.com