SPIKA AVUNJA KAMATI YA NISHATI NA MADINI

Spika wa Bunge, Anne Makinda amevunja Kamati ya Nishati na Madini kutokana na baadhi ya wajumbe wake, kutuhumiwa kuhongwa na makampuni ya mafuta nchini ili kushinikiza Bunge liazimie kumwajibisha Katibu Mkuu wa Nishati, Eliackim Maswi.

Aidha, suala hilo limepelekwa katika Kamati ya Haki, Maadili na Madaraka ya Bunge inayoongozwa na Mbunge wa Mlalo (CCM), Brigedia Jenerali Mstaafu Hassan Ngwilizi, kwa ajili ya kufanyiwa uchunguzi na kisha matokeo kurejeshwa bungeni.

Wakichangia hotuba ya makadirio ya mapato na matumizi ya Wizara ya Nishati na Madini iliyowasilishwa bungeni juzi na Waziri Sospiter Muhongo, walilamikia baadhi ya Bunge kuhongwa ili kupitisha azimio la Maswi kuwajibika kwa kukiuka Sheria ya Manunuzi ya Umma katika suala la manunuzi ya mafuta ya kuendesha mitambo ya kuzalisha umeme wa dharura.

Spika Makinda alitangaza uamuzi huo jana muda mfupi baada ya Bunge kupitisha bajeti hiyo, kufuatia Mbunge wa Namtumbo (CCM) Vita Kawawa, kuwasilisha hoja ya kutaka Kamati hiyo ivunjwe na suala la rushwa lipelekwe katika Kamati ya Haki, Maadili na Madaraka ya Bunge.

Kawawa alitumia kanuni ya 53 kifungu kidogo cha pili na kanuni ya 55 kifungu F. “Nikuombe na kutoa hoja kwako kwa kuwa tuhuma za suala hili ni nzito na linahusu Bunge na hivyo kulidhalilisha kwa ujumla wake kwa kuwa tuhuma hizo ni nzito kuzithibitisha. Naomba utumie mamlaka yako kuidhinisha,” alisema Kawawa.

Kawawa alimuomba Spika kwa mamlaka aliyonayo akubali kuivunja Kamati ya Nishati na Madini na kamati nyingine zilizowahi kutuhumiwa na rushwa.

Pia aliomba jambo hilo la rushwa lililolalamikiwa sana katika hotuba hiyo, lijadiliwe na Kamati ya Haki, Maadili na Madaraka ya Bunge, lifanyiwe uchunguzi ili ukweli wake ukibainika na hatua ziweze kuchukuliwa.

Akijibu kuhusiana na hoja hiyo ambayo iliungwa mkono karibu na Bunge zima, Spika alisema, “Naona hoja hiyo imeungwa mkono na wabunge halafu iko wazi haina ubishi mwingine kwa madhumuni sahihi na ametumia kifungu sahihi.”

“Sio tu hoja kwa siku zilivyokuwa zinakwenda tabia ya waheshimiwa wabunge kwa maelezo haya imekuwa ni kubwa nimeagiza kamati yangu ya Haki, Maadili na Madaraka ya Bunge, kutengeneza Code of Ethics (kanuni za maadili), na mtu yeyote atakayetuhumiwa katika mazingira hayo (rushwa), lazima tuchukue hatua tena kubwa.”

Spika Makinda alisema kamati hiyo haitashughulikia tu mbunge anayehusika katika tuhuma hizo bali itakwenda hadi kwa mtu anayehusika.

Alifafanua kuwa vimejitokeza vitendo vya mbunge kutoka jasho wakati akizungumza bungeni kumbe anafanya kazi ya mtu.

“Ni imani yangu kabisa serikali yetu na nchi yetu inapita katika kipindi cha mpito na kama nyie wabunge hamtakuwa imara kuweza kuisimamia Serikali kwa ukweli hatutaweza kwenda. Matumaini ya wananchi yako wapi kama si Bunge?”alisema kisha kuongeza kuwa:

“Kitendo hiki kwa kweli hakikubaliki ndani ya Bunge, hatuwezi kuisimamia Serikali huku tunapokea pokea (rushwa). Unaisimamiaje Serikali kwa mtindo huu? Kwa hiyo minaamini wabunge mkikaa vizuri na kufanya kazi yetu vizuri, mabadiliko makubwa katika Serikali yatatokea..Lakini wenzetu wanakwenda huko mara wajipendekeze mara waombe hiki hatuwezi kwenda hivyo.”

Alisema kwa kutumia kanuni hiyo 53(3) amelipeleka suala hilo katika Kamati ya Haki, Maadili na Madaraka ya Bunge, ili walifanyie uchunguzi na kuleta taarifa bungeni.

“Sasa hao mliokuwa mkitaka watajwe sasa hiyo kamati itafanya kazi hiyo. La pili kwa kutumia kanuni 113(3) baada ya kuunga mkono hoja ya Mheshimiwa Kawawa, naridhia ombi hilo, nitaivunja na nyingine ambazo zimeonekana zikilalamikiwa katika hili,” alisema.

Wajumbe wa kamati hiyo wanaongozwa na Mwenyekiti Mbunge wa Bukene (CCM), Selemani Zedi na Makamu Mwenyekiti wake ambaye ni Mbunge wa Viti Maalum (CCM), Diana Chilolo.

Wajumbe wengine na majina ya majimbo yao katika mabano ni John Mnyika (Ubungo-Chadema), Yussuf Haji Khamis (Nungwi-CUF), Mariam Kisangi (Viti Maalum-CCM) na Catherine Magige (Viti Maalum-CCM).

Wengine ni Abia Nyabakari (Viti Maalum-CCM), Charles Mwijage (Muleba Kaskazini-CCM), Yusuph Nassir (Korogwe Mjini), Christopher Ole Sendeka (Simanjiro-CCM), Dk Festus Limbu ( Magu Mjini-CCM), Shaffin Sumar (Tabora Kaskazini-CCM), Lucy Mayenga (Viti Maalum-CCM) na Josephine Chagula (Viti Maalum-CCM).

Wajumbe wengine ni Mwanamrisho Taratibu Abama (Viti Maalum-Chadema), David Silinde (Mbozi Mgharibi-Chadema), Suleiman Nchambi ( Kishapu- CCM), Kisyeri Chambiri (Babati Mjini-CCM), Munde Abdallah (Viti Maalum-CCM), Sara Msafiri Ally, Vick Kamata, (Viti Maalum-CCM) Mbarouk Salim Ali (Wete-CUF).