Wafanyabiashara magendo wajaribu kumuua mwanahabari

Moshi

WAFANYABIASHARA wanaosafirisha sukari kwa magendo kwenda nchini Kenya, juzi walifanya jaribio la kumuua mwandishi wa habari wa gazeti la Tanzania Daima mkoani Kilimanjaro, Charles Ndagulla.

Tukio hilo lilitokea saa 6:00 usiku, baada ya wafanyabiashara hao wakiwa na gari aina ya Toyota RAV 4J, kumgonga kwa makusudi mwandishi huyo na kufanikiwa kuvusha malori mawili yakiwa na sukari.

Mwandishi wa habari hizi alishuhudia tukio hilo ambalo limeibua maswali mengi, kuhusu kiburi cha wafanyabiashara hao hadi wafikie hatua ya kutaka kutoa uhai wa mwandishi ili kutimiza malengo yao.

Kabla ya waandishi wa habari za uchunguzi kwenda eneo la Holili karibu na machimbo ya madini ya Pozorana, walidokezwa kuwa malori 12 aina ya Fusso yangevuka mpaka usiku kwenda Kenya.

Malori hayo yalikuwa yaanzie safari zake mji wa Himo na kuelekea barabara ya Himo-Holili, kisha yangechepuka na kushika barabara ya Lower Rombo hadi eneo hilo la madini na kuingia Kenya.

Mpaka waandishi wa habari wanafika eneo ulipotokea mkasa huo, tayari malori sita yalikuwa yameshavuka mpaka kupitia njia za panya eneo la Holili kati ya saa 4:00 na saa 5:00 usiku huo.

Lakini, kabla ya waandishi wa habari kwenda eneo hilo, walimtaarifu Kamanda wa Polisi Mkoa wa Kilimanjaro, Robert Boaz ambaye aliahidi kuwaandaa polisi kwa lengo la kukamata malori hayo.

Baada ya kufika eneo hilo, malori hayo yalijitokeza na waandishi waliyasimamisha na madereva wake kutii amri hiyo, Mwandishi wa habari hizi alimtaarifu Kamanda Boaz muda huohuo.

Pia, mwandishi wa habari hizi alimtaarifu Meneja wa Mamlaka ya Mapato Tanzania (TRA) Mkoa wa Kilimanjaro, Patience Minga ambaye aliahidi kutuma maofisa wake wa doria.

Lakini wakati waandishi wakisubiri msaada wa polisi, ilifika gari ndogo aina ya RAV 4J ikiwa na watu wawili mmoja mwanamke, ambao waliwaamuru madereva hao kuondoa kwa nguvu malori hayo.

Mwandishi wa Tanzania Daima ambaye alikuwa upande wa yalipokuwa yakielekea malori hayo, aliwamulika kwa tochi watu waliokuwa katika gari ndogo ndipo walipomfuata na kumgonga.

Baada ya kufanya unyama huo, malori hayo pamoja na gari ndogo ambazo nambari zake tunazo, yaliondoka na kuvuka mpaka kuelekea Kenya yakiwa na shehena ya sukari.

Mwandishi huyo alifikishwa Kituo cha Polisi Himo akiwa na maumivu makali kwenye bega na mkono wa kulia ukivuja damu, alipelekwa hospitali teule ya St. Joseph na kulazwa.

Tukio hilo limekuja mwezi mmoja baada ya mfanyabiashara tajiri wa Kenya kufanya kikao cha siri na wafanyabiashara wa bidhaa za magendo na kuagiza waandishi wanaoingilia anga zao wamalizwe.

Mwenyekiti wa Klabu ya Wanahabari Mkoa Kilimanjaro (MECKI), Rodrick Makundi alilitaka polisi kujisafisha kwa kuwasaka na kuwatia mbaroni wahusika wa tukio hilo.

Kamanda Boaz ambaye alitoa ushirikiano mkubwa kwa waandishi wa habari waliokumbwa na mkasa huo, alisema polisi imeshaanzisha uchunguzi wa tukio hilo.

Mkuu wa Mkoa wa Kilimanjaro, Leonidas Gama alisema tukio hilo linaashiria wafanyabiashara hao wameamua kutangaza vita na serikali pamoja na raia wema na kwamba, hilo halivumiliki kamwe.

Mwananchi