Watano wafa papo hapo gari likitumbukia mtoni

Watu watano wamefariki dunia papo hapo mkoani Kilimanjaro na wegine watatu wamejeruhiwa baada ya gari walilokuwa wakisafiria kuacha njia na kugonga kingo za daraja kisha likatumbikia mtoni.

Kamanda wa Polisi mkoani Kilimanjaro, Robert Boaz, alisema ajali hiyo ilitokea juzi saa 4:30 usiku katika barabara kuu ya Himo/Holili kwenye tarafa ya Mengwe wilayani Rombo.

Kamanda Boaz alisema gari hilo liliacha njia na kwenda kugonga kingo za daraja na kutumbukia mtoni na kusababisha vifo na majeruhi hao.

Gari lililopata ajali ni namba T584 AWT aina ya Toyota Hilux Pick up, mali ya kampuni ya Ravji Aggretes lililokuwa likiendeshwa na Focus Joseph (42).

Mbali na Focus, Kamanda Boaz aliwataja wengine waliofariki dunia katika ajali hiyo kuwa ni Anthony Daniel (32), Hassan Hussein (46), Daniel Bilass (35) na Waljan Dainess (20).

Aliwataja majeruhi kuwa ni Raymond Mallya (40), Raymond Paul (19) na Sigfred Stanslaus (16).

Kamanda Boaz alisema majeruhi hao wamelazwa katika Hospitali ya Rufaa ya KCMC wakiendelea na matibabu.

Alisema chanzo cha ajali hiyo ni mwendo kasi kulikosababisha dereva ashindwe kulimudu gari hilo kwenye kona.

CHANZO:NIPASHE

Aidha, Kamanda Boaz alitoa wito kwa madereva na wananchi kuwa makini wawapo barabarani hasa wakati huu wa kuelekea sikukuu za mwisho wa mwaka