AJALI YAUA 13 NA KUJERUHI 11 SHINYANGA

Lori la mizigo lililogongwa na Hiace.

WATU 13 wamepoteza maisha baada ya gari walilokuwa wakisafiria kugonga lori la mizigo lililokuwa limeharibika barabarani katika Kijiji cha Ngongwa, wilayani Kahama, Mkoa wa Shinyanga.

Ajali hiyo ilitokea jana saa 2:30 usiku wakati gari aina ya Toyota Hiace lenye namba za usajili T 756 CHX lilipoligonga lori la mizigo lenye namba T 696 AMS.

Kaimu Kamanda wa Polisi Mkoa wa Shinyanga, Kihenya Kihenya, alisema Hiace hiyo ilikuwa ikifanya safari zake kutoka mjini Kahama kwenda mji mdogo wa Ushirombo, katika Wilaya ya Bukombe, mkoani Geita.

Kihenya alisema watu 11 akiwamo dereva ambaye pia ni mmiliki wa gari hilo, Ezekiel Werema, walifariki dunia papohapo na wengine wawili walifariki dunia wakiwa katika Hospitali ya Wilaya ya Kahama kwa matibabu.