YANGA NA COASTAL LEO NI SUNGURA KAMKABA KOBE TUSUBURI MATOKEO (OMAN VS UTURUKI)

Wachezaji wa timu ya Yanga SC.

Sweetbert Lukonge na Richard Bukos,Tanga

MABINGWA wa Ligi Kuu Bara, Yanga, watashuka dimbani ugenini kuivaa Coastal Union katika mchezo mkali utakaopigwa kwenye Uwanja wa Mkwakwani, Tanga, leo Jumatano.

Mchezo huo ndiyo utakaovuta hisia kwa mashabiki wengi kati ya mechi nyingi zitakazopigwa leo, hasa ikikumbukwa kuwa katika mchezo wa mzunguko wa kwanza, timu hizo zilitoka sare ya 1-1 kwenye Uwanja wa Taifa, Dar es Salaam, Coastal wakisawazisha katika dakika za lala salama kwa penalti iliyoonekana ya utata.

Yanga inaingia kwenye pambano hilo ikiwa imeshinda mchezo wake wa kwanza wa mzunguko wa pili kwa mabao 2-1 dhidi ya Ashanti, wakati Coastal wakitaka kusawazisha makosa ya kubanwa nyumbani na JKT Oljoro kwa sare ya 1-1.

Mechi nyingine ya leo itawakutanisha watengeneza sukari, Kagera Sugar na Mtibwa Sugar, kwenye Uwanja wa Kaitaba, Bukoba. Kwenye Uwanja wa Chamazi, Azam itaikaribisha Rhino, wakati Prisons na JKT Ruvu zitakuwa zikipepetana kwenye Uwanja wa Sokoine, Mbeya.

Ruvu Shooting yenyewe itakuwa na kibarua kigumu nyumbani kwenye Uwanja wa Mabatini, Pwani dhidi ya timu inayotisha msimu huu, Mbeya City.

Wekundu wa Msimbazi, Simba, wao watalazimika kusubiri hadi Jumamosi watakapoivaa JKT Oljoro Uwanja wa Taifa, Dar huku Ashanti nayo ikicheza siku hiyo dhidi ya Mgambo JKT kwenye Uwanja wa Chamazi:

CREDIT:GPL