MAKALA: MANJI ANAENDA ZAKE, YANGA WAMEKAA ZAO!

Na Saleh Ally

UMESIKIA mara ngapi wanachama au mashabiki wa Yanga wanathubutu kusema mchezaji au kiongozi fulani aondoke tu kwa kuwa klabu yao ni kubwa na waliikuta, hivyo hakutakuwa na tatizo!

Mashabiki na wanachama wana ile hali ya kujidai kwa ajili ya timu zao, mapenzi ambayo huenda wakati mwingine yanasababisha wajisahau na kuzungumza maneno ambayo yanaonyesha kujaa haraka au kutokuwa na uchunguzi wa kina na tafakuri jadid kabla ya kuyazungumza.

Najua ningeuliza, huu ni wakati wa Mwenyekiti wa Yanga, Yusuf Mehboob Manji kuondoka Yanga? Wapo ambao wangesema hapana, lakini rundo wanaweza kusema aende tu kwani yeye ni nani na Yanga ameikuta!

Ndani ya mwezi mmoja Yanga itakuwa imekamilisha marekebisho ya katiba yake ambayo ikipitishwa itaanza mchakato wa uchaguzi na ndiyo utakuwa mwisho wa uongozi wa Yanga chini ya Manji.

Kila kitabu kina muhula wake, lakini kuna mambo mengi sana kabla ya kusema maneno rahisi kwenye kitu makini au muhimu.

Msisitizo, lazima ujipime kabla ya kuzungumza ili uonekane tu.

Kwa kuwa wakati wa Manji umekwisha, Yanga hawapaswi kuona aibu kufanya mambo kadhaa na mawili ndiyo yanaweza kuwa muhimu kwa ajili ya kuendelea kuisaidia klabu hiyo kupambana.

Hakuna anayeweza kubisha kwamba Manji amekuwa ni chachu kubwa ya mafanikio katika Klabu ya Yanga na hata wachezaji lukuki wa klabu nyingine sasa wanatamani kujiunga nayo.

Amefanya mabadiliko lukuki kwa kushirikiana na timu aliyonayo madarakani na ukiangalia katika kipindi hiki, si rahisi kusikia kuna upotevu wa fedha katika mzunguko wa mapato ya Yanga au vinginevyo.

Taarifa zinaeleza kuna udhibiti mkubwa katika fedha za Yanga na si rahisi tena kuchukua fedha kiujanja kama ilivyokuwa hapo awali. Hili linawezekana linawaudhi baadhi, lakini ukweli halisi ndiyo huo, Manji amefanya mabadiliko.

Wachezaji wa Yanga ni kati ya wale wanaolipwa fedha nyingi zaidi kwa msimu ukilinganisha na kwingine. Ndiyo maana kwa mwezi, klabu hiyo inatumia zaidi ya Sh milioni 50 kuwalipa mshahara wachezaji, benchi la ufundi na watendaji.

Katika vitu wanavyotakiwa kufanya, Manji bado anaweza kuwa kiongozi, kuna uwezekano wa kumshawishi kuendelea kugombea kwa mara nyingine ikiwezekana aendelee kupambana kuiimarisha mifumo ambayo ameianzisha.

Kama ataondoka kipindi hiki, viongozi wapya watakaoingia, lazima wawe ni wale wasiokuwa na njaa, wale wanaotaka kuiendeleza klabu na timu na si matumbo yao. Lakini njaa ikitangulia, basi kila alichokianzisha mwenyekiti huyo wa sasa, kitavurugika na Yanga itaendelea kubaki ilipo.

Akiendelea, mifumo yake itazidi kuwa imara na hakuna ubishi, kwa miaka yake zaidi ya kumi ndani ya Yanga akiwa katika vyeo tofauti, ataendelea kusaidia kuiimarisha klabu hiyo.

Umeona namna ambavyo klabu kubwa za Ulaya zinavyowahifadhi viongozi wake ambao zinaamini wana msaada! Zimekuwa zikiendelea kuwatumia hata zaidi ya miaka kumi baada ya kuondoka kwao madarakani.

Manji anajua nini cha kufanya, nini na nani msaada kwa Yanga. Lakini kuiimarisha Yanga, Simba pia wakapata kiongozi bora na mwenye mipango, maana yake ushindani utaongezeka na kusaidia soka ya Tanzania ambayo kila kukicha inajifunza kutembea.

Pili, kama Manji mwenyewe ataamua kuondoka na kuachia wengine wagombee, bado litakuwa ni jambo zuri kwa maana ya demokrasia, lakini Yanga hawatatakiwa kumuachia aende zake.

Achaneni na zile hisia, kwamba akienda kwani yeye ni nani! Pongezi kwa wale walioona umuhimu wake, hawakujali maneno ya watu wakapiga magoti na kumuomba aendelee kuongoza Yanga kwa kugombea mara nyingine.

Kama ataendelea kushikilia msimamo wake, basi safari hii aombwe kuwa kati ya walezi au ateuliwe kuwa Mjumbe wa Bodi ya Wadhamini, halafu aendelee kusaidia kuendeleza alichokianzisha kwa kushirikiana na viongozi walio madarakani.

Kawaida hatupendi kuelezana ukweli, lakini hakuna anayeweza kukataa kwamba viongozi wenye njaa wanaoziongoza klabu za soka, taasisi au vyama, wamekuwa ni tatizo kubwa kwa kuwa wanafanya juhudi za kujishibisha wakiwa madarakani na kusahau kuzishibisha klabu wanazoziongoza.

Ukisema Manji anataka kujishibisha kupitia Yanga, itakuwa ajabu! Fedha anayo, ukisema anataka kujulikana, bado itakuwa ajabu. Sasa anataka nini Yanga? Jibu analo mwenyewe. Lakini kama ni hali halisi, inaonyesha ni mapenzi yake mwenyewe.

Manji bado anahitajika Yanga, iwe kwa kugombea au ateuliwe na kuendelea kusaidia gurudumu la maendeleo ya klabu hiyo. Wekeni kando ushabiki, kuwa na watu watano kama Manji, basi tayari maendeleo katika soka yanapiga hatua kwa kasi kubwa.

Kumpoteza Manji mmoja kabla ya kupata mwingine ni sawa na kulazimisha kuendesha gari lisilokuwa na mafuta. Linaweza kutembea kwenye mteremko tu, likifika kwenye mlima, mwisho wa safari umewadia.

Katika hili, Yanga bado wana nafasi ya kuwa na uamuzi wa kufanya, wana haki ya kuona kipi ni sahihi kwao na wanataka kufanya nini. Lakini haya ndiyo mawazo yangu kwao kutokana na hali halisi ninavyoona. Wakiyakubali, itakuwa poa sana.

Credit:Saleh Jembe