HOSPITALI YA MKOA WA SHINYANGA YAPEWA SIKU 7 KUPUNGUZA GHARAMA ZA MATIBABU

MKUU wa mkoa wa Shinyanga, Ally Rufunga, ameipa siku Saba Hospitali ya Serikali ya mkoa huo kushusha gharama ya matibabu kutokana na wananchi kushindwa kumudu gharama hizo, zilizopandishwa baada ya Hospitali hiyo kupandishwa hadhi na kuwa ya Hospitali ya rufaa

Aidha, kupandishwa hadhi kwa hospitali hiyo ni agizo la Rais, Jakaya Kikwete, alilolitoa hivi karibuni kwa kuzitaka hospitali zote za mikoa nchini kupandishwa hadhi na kuwa za rufaa. 

Rufunga, alisema Juni 6, 2014 kuwa kutokana na kupandishwa kwa gharama katika hospitali hiyo, imebainika kuwa asilimia kubwa ya wakazi wa mkoa huo wameshindwa kuzimudu na wengi wao kulazimika kurudi katika tiba za asili, hali ambayo imeleta hofu kwa kuweza kuongezeka vifo ikiwemo vya mama na mtoto mkoani humo. 

Hata hivyo, Bwana Rufunga ametaja baadhi ya huduma ambazo gharama zake zimeongezeka kuwa ni pamoja na kumuona daktari ambayo awali ilikuwa ni bure na sasa itakuwa shilingi elfu tano, huduma za kujifungua zimepanda na kuwa elfu Sabini kwa watoto wa kike na shilingi elfu themanini kwa mtoto wa kiume. 

Wizi wa dawa wakithiri 

Amesema wimbi la upungufu wa dawa katika Zahanati na Vituo vya Afya katika mkoa huo, linatokana na wizi unaofanywa na baadhi ya watumishi wa sekta hiyo wasio waaminifu na kukwamisha zoezi la serikali kutimiza malengo yake. 

Amesema katika mikakati ya kupunguza vifo vya Mama na Mtoto vinavyotokana na uzazi katika mkoa mkoa huo, wanashirikiana na wananchi kuibua wimbi la wizi wa dawa katika vituo hivyo unaofanywa na baadhi ya watumishi wasio waaminifu na kusababisha kukosekana kwa dawa na watu kupoteza maisha.

“Hatuna tatizo la uhaba wa dawa, kinachotusumbua ni huu wizi wa madawa, tumebaini wizi huu na hatutakubali kwani hata ukifanya utafiti unakuta dawa za serikali zinauzwa mtaani kwenye maduka ya dawa ya watu binafsi na sasa TAKUKURU wanatakiwa kutusaidia”alisema Rufunga.

Awataka watumishi wa afya kuwajibika

Aidha, amewataka watendaji na watumishi wa sekta ya afya kuwajibika ipasavyo katika kukabiliana na vifo vya mama na mtoto vinavyotokana na uzazi, kwa kuboresha miundombinu katika vituo vya afya pamoja na kuhamasisha akina mama wajawazito kujifungulia katika vituo vya afya pamoja na kuwaelimisha wananchi wajiunge na mfuko wa afya ya jamii.

Vifo vyaongezeka

Mganga Mkuu wa mkoa huo,  Dkt. Ntuli Kapologwe,  amesema miongoni mwa mikoa inayokabiliwa na changamoto ya vifo vya mama na mtoto ni pamoja na mkoa huo, hivyo kuitaka jamii wakiwemo akina Baba kuwa mstari wa mbele katika kupiga vita vifo hivyo kwa kuwahamasisha akina mama kuhudhuria kliniki mara kwa mara na kujifungulia kwenye vituo vya afya.

“Tunajitahidi kumuunga mkono Rais wa Jamhuri ya Muungano wa Tanzania, Dkt. Jakaya Kikwete, kwa kuanzisha kampeni ya kupiga vita vifo vya mama na mtoto vinavyokana na uzazi pia na sisi tunasikitishwa na vitendo vya baadhi ya watumishi katika sekta hii wanaotukana wagonjwa na kuficha dawa muhimu” Dkt. Kapologwe alisema. 

Kumbukumbu zinaonyesha kuwa wakati Serikali ikijipanga kuhakikisha upatikanaji wa dawa unakuwa wa uhakika katika hosipitali zote za umma hapa nchini, wapo baadhi ya watumishi wasio waaminifu ambao wamekuwa wakijinufaisha kwa manufaa yao binafsi kwa kuuza dawa hizo katika maduka ya sawa baridi. 

Mapema mwaka 2013, Bohari Kuu ya Madawa (MSD) ilitangaza kuanza mchakato wa kuweka nembo maalum katika dawa zote zinazomilikiwa na serikali kwa lengo la kukomesha hujuma dhidi ya dawa hizo, licha ya tatizo la wananchi wengi kutoitambua nembo ambayo inatumiwa hivi sasa na (MSD) pamoja na dawa zinazomilikiwa na serikali.

 Chanzo: Fikrapevu