JOKOFU LA KUHIFADHIA MAITI BUNDA LAGEUKA KERO KUTOKANA NA UBOVU WAKE

SERIKALI imeeleza kuwa tatizo la jokofu la kuhifadhia maiti lililokuwa limeharibika katika Hospitali Teule ya Wilaya ya Bunda mkoani Mara limetafutiwa ufumbuzi.

 Kauli hiyo ilitolewa bungeni mjini hapa jana na Naibu Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (Elimu), Kassim Majaliwa, alipojibu swali la Mbunge wa Viti Maalumu, Esther Bulaya (CCM). 

“Jokufu la kuhifadhia maiti katika Hospitali ya Wilaya ya Bunda limeharibika kwa muda mrefu na hivyo kusababisha wananchi kuhifadhi maiti Mwanza na Musoma kwa gharama kubwa, sasa nataka kujua ni lini serikali itatatua adha hiyo kwa wakazi wa Bunda na Mwibara?” alihoji Bulaya.

 Majaliwa alikiri jokufu la kuhifadhia maiti liliwahi kuharibika na  kusababisha wananchi kuhifadhi maiti Mwanza na Musoma, lakini kwa sasa limetengenezwa.

 Alisema tatizo lilikuwa ni kuziba kwa bomba linalopitisha gesi kutoka kwenye ‘compressor’ na kusababisha bomba hilo kupasuka na kuruhusu gesi kutoka. Alisema kulikuwa na tatizo la umeme katika jengo hilo la kuhifadhia maiti.

 “Tatizo hilo lilisababisha jokofu hilo kushindwa kufua baridi na kwamba Aprili 20, mwaka huu lilitengenezwa,” alisema.

 Alisema kuanzia Mei 5, mwaka huu hadi sasa, sehemu zote sita za kuhifadhia maiti katika hospitali hiyo zinafanya kazi.