UBAYA WA UBALOZI WETU WA ROME ITALY

Vijimambo imepata barua ya moja ya Mtanzania anayeshi Italy akiwakilisha Watanzania wenzake wa nchi za Uturuki na Ugiriki ambazo Ubalozi huo hutoa huduma kwa nchi hizo akilalamikia utendaji wa kazi wa Ubalozi wa Tanzania Rome Italy kwamba haufurahishi hata kidogo na huduma kwa wananchi wa Tanzania wanaohudumiwa na Ubalozi huo ni za kutatisha tamaa na pamoja na mambo mengine lalamiko kuu lilikua ucheleweshaji wa pasi za kusafiria zikiwemo za watoto wao wanaozaliwa huko kupata pasi za kusafiria inakuwa vigumu sana.

Barua hiyo ilielekeza malalamiko yake ya moja kwa moja kwa Balozi wa Tanzania Rome Italy Mhe. James Alex Msekela kwamba ameisha toa ahadi ya kupeleka Afisa wa Uhamiaji kushughulikia maswala yao lakini mpaka sasa ni muda mrefu hajamtuma afisa yeyote kwao.

Ndipo Vijimambo ilipoamua kupiga simu Ubalozi huo wa Italy ili kuweza kujua kulikoni na tuliweza kuongea na Afisa Salvatory Mbilinyi (HEAD OF CHANCERY) na tulivyomwelezea walaka tulioupata kutoka kwa mmoja ya Watanzania waishio huko alimpatia mhusika ambaye hakutaja jina lake alijitambulisha kama Afisa Uhamiaji na yeye alikubali uchelewesho wa pasi za kusafiria upo na sababu moja wapo ni mwombaji mwenyewe kuwa na matatizo au faili lake kutokwepo Uhamiaji Makao makuu  na sababu nyingine ni ukwasi unaozikumbuka Balozi zetu nchi za nje na kusisitiza hii ndio sababu moja wapo kubwa ya ucheleweshaji huo. Afisa huyo aliongeza kwa kusema kama mwombaji hana tatizo lolote swala lake halichukui muda kutekelezewa japo hakutaja ni muda gani huchukua kama mtu hana tatizo lolote kupata pasi yake. Kuhusu swala la watoto wanaozaliwa huko kukosa kupata pasiport afisa huyo hakuligusia kabisa na kusema yeye sio msemaji wa Ubalozi na kashauri Vijimambo iongee na Mhe. Balozi na bila ajizi Vijimambo ilipiga simu kumtafuta Mhe. James Alex Msekela lakini tukaambia ametoka tujaribu kesho yake yaani siku ya Ijumaa Oct 3, 2014 saa 3 asubuhi saa za Italy.

Vijimambo ilipotimu saa 3 asubuhi saa za Italy ilipiga simu kwa ofisi ya Ubalozi wa Tanzania nchini Italy kujaribu tena kuongea na Mhe. Balozi lakini hatukuweza kumpata na tukaambiwa yupo mkutanoni na dada muhudumu wa simu akataka kutupatia namba ya Mhe. ya kiganjani lakini baada kutuambia tusubili kidogo kwenye simu na aliporudi badala ya kutupatia namba ya Mhe. Balozi aliomba tuache namba yetu ya simu kusudi  Mhe. apewe na ikibidi aweze kutupigia lakini mpaka sasa hizi hatujapata simu yeyote toka Ubalozi huo.

Vijimambo pia ilijaribu kuongea na Afisa wa Uhamiaji Tanzania ambaye hakutaka kutajwa jina lake yeye alisema inawezekana uzembe upo pande zote mbili na swala la kuchelewa kupata pasi kwa miaka miwili huu ni muda mrefu sana, Ubalozi hauandiki pasi za kusalifiria hii ni shughuli ya Uhamiaji Tanzania.

Timu ya Vijimambo inawaomba wahusika walifuatilie swala hili kwa ukaribu zaidi.

 Kwa kusoma barua ya mdau nini alichokiandika kuhusu Ubalozi wa Tanzania uliopo Rome Italy Bofya soma zaidi.

UBAYA WA UBALOZI WETU WA ITALY

 Tunaomba uitangaze habari hii bila kuificha  na wala usipunguze hata herufi moja!!!

Kila aliyewahi kuomba huduma  toka ubalozi wetu wa Rome ana malalamiko yake.Ima atakuwa amecheleweshwa mno kupatiwa huduma hiyo au hakupatiwa kabisa.Muda mrefu tumenyamaza kimya tukitegemea kuwa hali ingebadilika, lakini kila siku zinavyokwenda mambo ndivyo yanavyozidi kuwa magumu  na  kuharibika hasa katika kipindi cha miaka miwili iliyopita.

Kutozingatiwa matatizo yetu limekuwa ni jambo la kawaida mno kiasi cha kutufanya tujiulize mara mbili.. Sisi kweli ni raia wa Tanzania wenye haki ya kupatiwa msaada toka ubalozini kwetu?

Mara zote msaada tunaokuwa tukiuhitaji SI PESA, kiasi cha kwamba Mh.Balozi aseme kuwa nchi yetu haina uwezo wa kipesa kusaidia raia wake.Msaada tunaoomba ni KUPATIWA VYETI HUSIKA ILI NASI TUWEZE KUKAMILISHA HATI ZA UHALALI WA UKAAZI WETU.

Matatizo yetu yana sehemu tatu kuu zifuatazo:

1.     Hivi sasa watu wengi pasi zetu zinaisha 2015 na tumeshamuomba Mh.Balozi amtume Afisa wa pasi-japo kwa gharama zetu - aje kututatulia tatizo hilo HAJAFANYA LOLOTE. Mh.huyo katuimbisha kuwa angemtuma Afisa wa pasi  August au September, kuja kuonana nasi na miezi hiyo imeshapita na hatuoni dalili zozote za kusaidiwa. Kuna hatari kubwa ya wengi kutokuwa na valid passports ifikapo 2015, Je tutawalaumu watu watapotumia njia za kienyeji na za vichochoroni  kutatua tatizo lao?

2.     Kuna watu wameomba pasi imeshapita sasa miaka miwili na stakabadhi za malipo wanazo na wala hakuna jibu lolote la maana wanalopewa.

3.     Tuna watoto wetu waliozaliwa huku hawana pasi wanashindwa kusafiri na wazazi wao kuja Tanzania. Ubalozi unashindwa vipi kutoa huduma japo mara moja kwa mwaka?

Tunaamini udhalilishaji huu unatokana na filosofia ya Mh Balozi ya kutojali watu anaowaongoza maana inajulikana hata huko mikoani alipokuwa (Dodoma & Mwanza) wananchi hakuwa akiwajali.Tunahofia asije akawa anataka kuendeleza mfumo huo hata huku ughaibuni.Mbona Mheshimiwa Rais Kikwete yupo very simple? Anajali na huwatembelea raia wake mara kwa mara?,Hata misiba ya raia wa kawaida huwa  anahudhuria, sasa huyu Balozi yeye ni nani? Je yeye anajiona ni bora kuliko Rais wetu?.

Tumelazimika kueleza yote haya si kwa sababu tunataka tu kulalamika LA HASHA, bali tumeona tukiendelea kuficha, kilio kitatuhusu. Yes ..KI - TA - TU - HU - SU.

Tunaviomba vyombo  vyote vya habari vifikishe udhalilishaji huu kwenye idara husika hasa Bungeni na kwa Mheshimiwa Rais ili waelewe kuwa UBALOZI WETU WA ITALY HAUJALI WATANZANIA.UNAJALI MASLAHI YAO YA KIBINAFSI.

LABDA TAARIFA HII ITAZIAMSHA BALOZI NYINGINE ZIWEZE KUWAJALI RAIA WA TANZANIA.SISI TUNAJIVUNIA URAIA WETU HATA KAMA BALOZI HATUJALI NA TUNAIPENDA NCHI YETU NA TUTAENDELEA KUIPENDA NA  KUITUKUZA.TUTAFURAHI KUONA NA MABALOZI WETU WANAELEWA UMUHIMU WA KUWAJALI WATANZANIA KULIKO MASLAHI YAO YA KIBINAFSI.

 Imeandikwa na :

 (WAKEREKETWA WA UTURUKI,UGIRIKI, NA ITALY