TUONYESHE YAKO MISULI

BY MOHAMED MATOPE

Raisi ni Magufuli, onyesha yako misuli,

Hongera wastahili, taifa halina shari,

Tumekuchagua heri, Raisi usofedhuli

"Hapa kazi tu" iwe kampeni kweli.

Tinga tinga  mtamboni,shuhudie ujasiri.

Jina lako asili,kisukuma na Kiswahili.

Litumie kwamakini,vile linavyostahili

John Pombe Magufuli, hakuna wa kusaili.

Usiwe mlevi pombe, lakini shika kufuli.

Ambalo uzitumie, mafisadi kuhimili.

Ahadi utekeleze, muda umeshawasili.

Kufungua mahakama, kuhukumu ufisadi

Zulu hospitalini, Bugando na Muhimbili.

Fichua manesi, pamoja na madaktari.

Nafuu haipatikani,twameza dawa  feki

Tiba haitolewi, bila kuhonga shilingi.

Mfagio utumie, serikali ishamiri,

Wazembe uwafagie, na wasioficha siri,

Ofisi zao vijiwe, kama hawana mwajiri,

Mishahara kuchukua, bila kugusa faili.

Tuonyeshe wako mpini, chaguo la waziri

Zingatia utendaji, hapana rudisha fadhiri

Dira iwe maadili,wananchi watujali

Watuliao nyumbani,si ughaibuni kusafiri

Vamia idara mbili, za kodi  na Bandari

Ujionee  dhahili,walarushwa mashuhuri     

Wale wenye magari, na majumba ya fahari                                   

Uwaweke kizimbani, kama Mramba Basili

Plani utuwekee , ya misururu barabarani

Barabara uzikuze, reli na baharini,

Serikali uhamishe,itandae  miji mbali

Watumishi wapungue, usafiri uwe shwari,

Biashara ndogo  sapoti, na ajira za binafsi

Watumie wetu  wasomi, nchini tuwahimili,

Dumisha  kilimo madini,uvuvi  na utalii.

Utumie yetu gasi, kwa shule na hospitali

Tusafishie mazingira ili tuishi vizuri

Himiza miti panda, nchi isiwe Kalahari

Mazingira elimisha, kwenye yetu maskuli

Nchi iwe waridi, kama wenzetu Kigali.

Tamati  ndugu raisi,anza yako shughuli

Elfu mbili na ishirini, alama tutajadili

Tutakupatia  daraja ,ile unayostahili

Mchakato tupamoja, taifa lisonge mbele