Mtoto Miaka 14 Kuolewa, Serikali Yashindwa Kesi

MKURUGENZI Mkuu wa Shirika la Msichana Uwezo na mwanaharakati wa haki za mtoto wa kike nchini,

Rebeca Gyumi, ameshinda rufaa iliyokatwa na Serikali katika Mahakama ya Rufaa Tanzania dhidi ya hukumu ya Mahakama Kuu Dar es Salaam iliyopinga ndoa za utotoni.

Hukumu hiyo ilitolewa jana Jumatano, Oktoba 23, 2019, ambapo mahakama ilitengua kipengele cha sheria Sheria ya Ndoa inayoruhusu mtoto mwenye umri wa miaka 14 (aliye chini ya umri miaka 18) kuolewa. Ushindi huo sasa unawapa nguvu ya kwenda bungeni kurekebisha Sheria hiyo.

Akizungumza mara baada ya mahakama hiyo kutoa uamuzi, Rebeca amesema sasa ataanza kutembea vijijini ili kutoa elimu kuhusiana na kuondolewa kwa sheria hiyo.

“Leo ni siku muhimu kwa sababu imeweza kuthibitisha kile ambacho Mahakama Kuu ilikisema kuhusiana na umri wa chini wa kuoa na kuolewa kwa mtoto wa kike na wa kiume, kwetu sisi kama shirika ni ushindi mkubwa.

“Nashukuru sana majaji wa Mahakama ya Rufaa kwa kuwa na ujasiri sana, kwa kusema kuwa tutasimamia kitu ambacho tunafikiri ni sahihi na hiyo ni ulinzi kwa watoto wote wa kike na wa kiume,” alisema Rebeca.

GPL