WAZIRI MKUU ASHIRIKI KAMPENI YA KITAIFA YA MAZOEZI YA WIZARA YA AFYA

Waziri Mkuu Kassim Majaliwa na Waziri wa Afya Ummy Mwalimu (kushoto) wakishiriki katika matembezi ya kuhamasisha ufanyaji wa mazoezi ili kujikinga na magonjwa yasiyo ambukiza Mei 04, 2024. Kushoto ni Mkuu wa Mkoa wa Dar es Salaam Albert Chalamila, Wapili kulia ni Katibu Mkuu Wizara ya Afya Dkt. John Jingu na kulia ni Mganga Mkuu wa Serikali Prof. Tumaini Nagu. Matembezi hayo ya Kilomita 10 yalianzia Coco Beach hadi Mzunguko wa Hospitali ya Agha Khan na kurudi Coco Beach

Wakazi wa jiji la Dar es salaam wakishirki matembzi ya kuhamasisha ufanyaji mazoezi ili kujikinga na magonjwa uyasiyoambukiza yaliyoongozwa na Waziri Mkuu, Kassim Majaliwa jijini Dar es salaam, Mei 4, 2024. Matembezi hayo ya Kilomita 10 yalianzia Coco Beach hadi Mzunguko wa Hospitali ya Agha Khan na kurudi Coco Beach.

Waziri Mkuu Kassim Majaliwa na Waziri wa Afya Ummy Mwalimu (kushoto) wakishiriki mazoezi viungo baada ya Waziri Mkuu kuongoza matembezi ya kuhamasisha ufanyaji wa mazoezi ili kujikinga na magonjwa yasiyo ambukiza, Mei 04, 2024. Watatu kushoto ni Mkuu wa Mkoa wa Dar es Salaam Albert Chalamila na Wanne kushoto ni Kamanda wa Polisi Kanda Maalum ya Dar es Salaam Kamishna Msaidizi Mwandamizi wa Polisi-SACP Jumanne Muliro. Matembezi hayo ya Kilomita 10 yalianzia Coco Beach jijini Dar es Salaam hadi Mzunguko wa Hospitali ya Agha Khan na kurudi Coco Beach.

Waziri Mkuu Kassim Majaliwa akizungumza baada ya kuongoza matembezi ya kuhamasisha ufanyaji wa mazoezi ili kujikinga na magonjwa yasiyo ambukiza Mei 04, 2024. Matembezi hayo ya Kilomita 10 yalianzia Coco Beach jijini Dar Es Salaam hadi Mzunguko wa Hospitali ya Agha Khan na kurudi Coco Beach. (Picha na Ofisi ya Waziri Mkuu)

Waziri Mkuu Kassim Majaliwa ameshiriki mazoezi ya pamoja ya kampeni ya kitaifa inayoratibiwa na Wizara ya Afya ya kuhamasisha ufanyaji wa mazoezi kwa watanzania ili kujiepusha na magonjwa yasiyo ya kuambukiza.

Mheshimiwa Majaliwa amesema hatua hiyo pia ni kuunga mkono wito wa Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan wa kufanya mazoezi ili kujikinga na magonjwa hayo.

Ameyasema hayo leo (Jumamosi Mei 4, 2024) aliposhiriki katika kampeni ya ufanyaji mazoezi pamoja na matembezi ya kilomita 10 yaliyoanzia katika fukwe za Coco kupitia daraja la Tanzanite hadi Ocean Road jijini Dar es Salaam.

"Mnakumbuka programu hii iliyoanzishwa na Rais wetu Dkt. samia Suluhu Hassan na yeye mwenyewe kushiriki na kuwahamasisha watanzania kushiriki mazoezi mbalimbali, katika kipindi cha miaka mitatu ya Dkt. Samia moja ya mambo ya kujivunia ni mafanikio katika sekta ya michezo."

Kadhalika Mheshimiwa Majaliwa ametoa wito kwa Viongozi wa Manispaa ya Kinondoni kufanya maboresho zaidi katika eneo la fukwe za Coco ili liwe safi na livutie watu wa rika mbalimbali.

"Nawapongeza jeshi la polisi kwa kazi nzuri ulinzi katika eneo hili, Nitoe wito kwenu kuendelea kuimarisha ulinzi ili eneo hili liwe salama kwa watu wa rika na jinsia zote."

Awali, Waziri wa Afya Ummy Mwalimu amemshukuru Waziri Mkuu kwa kukubali kushiriki katika mazoezi hayo huku akitoa taarifa ya ongezeko la magonjwa 10 yasiyo ya kuambukiza jambo lililofanya Wizara hiyo kuleta ombi la kuanzisha utaratibu wa mazoezi kila jumamosi.

"Mwaka 2022 kati ya magonjwa 10 yanayowasumbua watanzania moja lililojitokeza ni shinikizo la juu la damu bajeti ya mwaka 2022/2023 likaongezeka na kisukari katika magonjwa 10 yanayowasumbua watanzania. Wajibu wa Wizara ya Afya ni kuwakinga Watanzania wasipate magonjwa."

Kwa Upande wake Mkuu wa Mkoa wa Dar es Salaam Albert Chalamila amesema kama Mkoa watajipanga kuhakikisha utaratibu huo wa mazoezi utakuwa endelevu kwa kushirikiana na Kamati ya Ulinzi na Usalama pamoja na wadau mbalimbali wa michezo.