Mpenzi wako anahisi unamsaliti, huna mapenzi ya dhati kwake, ufanyeje?

Wiki iliyopita nilizungumzia suala la kumsoma mpenzi wako na kujua anahitaji nini kutoka kwako kisha kumtimizia. Naweza kusema ni makala iliyoonekana kuwagusa wengi kwani nimepokea sms na simu nyingi kutoka kwenu mkinipongeza juu ya elimu hiyo niliyowapa. Nimefarijika sana!

Wiki hii nataka kuzungumzia suala la wapenzi wakati mwingine kufikiriana tofauti kiasi cha kusababisha hali fulani ya kupungua kwa mapenzi au kuachana.

Haya yanatokea sana na kama wewe hujawahi kukutana nayo basi rafiki au ndugu zako yanawakuta. Yapo mazingira ambayo huwafanya wapenzi kufikiriana tofauti, nitayaainisha kwa uchache kisha mwisho nitashauri cha kufanya.

Katika mawasiliano
Kwa kipindi hiki simu za mkononi zimekuwa ni chanzo kikubwa cha wapenzi kufikiriana tofauti. Yawezekana wewe ni msichana na una mazoea ya kupenda kuwasiliana na wanaume kwa mambo mengine yasiyo ya kimapenzi na hata kwenye simu yako kuna namba nyingi za wanaume.

Kama una mpenzi mwenye wivu ni dhahiri ushakutana na hali fulani ya mpenzi wako kuhisi kuwa hujatulia na una wanaume wengine, kiasi cha kumfanya ahisi yeye unamzuga tu.

Yawezekana kwenye ‘facebook’ yako una marafiki wengi wa kiume na hata unapokuwa ‘online’ hupenda kuchati nao tena katika mambo ambayo hayana maana. Unadhani mpenzi wako akikufikiria tofauti atakuwa anakosea? 

Kwa swali hili najua wapo watakaosema hakuna tatizo lolote endapo msichana atakuwa na marafiki wengi wa kiume na kupenda kuwasiliana nao. Ukweli ni kwamba, kama tujuavyo kwamba mapenzi ya kweli lazima yaende sambamba na wivu, ni sahihi mpenzi wako kukufikiria tofauti na wewe utakuwa na jukumu la kumhakikishia kuwa hakuna lolote linaloendelea kati yako na marafiki hao wa kiume.

Swali ni je,mpenzi wako atakuamini? Hudhani kwamba kwa kufanya hivyo utakuwa unamfanya ahisi unamsaliti? Kwanini uwe na marafiki wengi wa kiume ambao wanamfanya mpenzi wako akufikirie tofauti? 
Mimi nadhani katika hili kama nilivyosema wiki iliyopita, ukishamsoma mpenzi wako na kubaini kuwa hataki ujiweke karibu na wanaume bila sababu za msingi, jaribu kuanza kuwapotezea kiana ili umpe imani mpenzi wako.

Muwapo faragha
Eneo lingine ambalo linaweza kumfanya mpenzi wako ahisi humpendi ama unamsaliti ni kutoonesha furaha unapokuwa naye faragha. Mpenzi wako anajua kwamba wewe sio goigoi, anajua mapigo yako lakini sasa yawezekana kadiri siku zinavyokwenda badala ya kuongeza mahaba unapunguza na wala yale mambo yako yalee siku hizi mpenzi wako hayapati, kwanini asikufikie tofauti?

Mimi nadhani yapo mazingira mengi ambayo yanaweza kumfanya mpenzi wako ahisi humpendi au unamsaliti. Hakuna sababu ya kuyataja yote lakini kikubwa ni namna ya kumfanya asikuhisi hivyo. 
Kuna kila sababu ya kuhakikisha unaiondoa dhana hiyo kwani madhara yake ni kumfanya naye aanze kukusaliti au kupunguza mapenzi kwako na hatimaye kukuacha.

Yawezekana mpenzi wao anahisi humpendi au una mtu mwingine kutokana na ‘ubize’ wako wa kazi. Ni jukumu lako kumfanya aamini kwamba ni kweli kushindwa kwenu kuonana mara kwa mara kunatokana na kazi na sio sababu nyingine. Ukishindwa kumfanya aamini hivyo, atakuwa sahihi kuhisi unamsaliti au ndiyo unamuacha kimtindo, kwanini? Kwasababu siku hizi wengi hutumia janja hiyo, mpenzi wake ana hamu ya kuonana naye, anamwambia yuko bize?Utakuwa ni ubize gani huo ambao mpenzi wako haujui?

Huenda kutokana na kazi zako una ukaribu sana na watu wa jinsia tofauti, mfanye mpenzi wako aamini kwamba hao unaowasiliana nao mara kwa mara ni kutokana na asili ya kazi yako na wala hakuna suala la mapenzi. Kama ni muelewa atakuelewa kuliko kuendelea kutumia muda mwingi kuongea na wasichana tena mbele ya mpenzi wako na kuishia kusema ni marafiki tu, ni lazima atakufikiria tofauti.

Jamani nafasi ni ndogo lakini naamini mmeambulia kitu. Tambueni tu kwamba kumpata mtu mwenye mapenzi ya dhati kwako kwa kipindi hiki ni adimu sana hivyo ukibahatika katika hilo, hakikisha unalilinda penzi lako kwa gharama yoyote. Usikubali marafiki wasiokuwa na mpango wakuharibie uhusiano wako. Mfanye mpenzi wako akuamini hata unapokuwa mbali ili na yeye afanye hivyo hivyo!

Tukutane tena wiki ijayo.