AFRIKA KUSINI YAPUUZIA OMBI LA MAHAKAMA YA ICC LA KUMKAMATA RAIS AL-BASHIR

Mahakama ya Kimataifa ya Makosa ya Jinai (ICC), imeitaka Afrika Kusini kumkamata rais wa Sudan Omar Al-Bashir ambaye anaripotiwa kusafiri kwenda nchini humo kuhudhuria mkutano wa Muungano wa nchi za Afrika ambao unaanza leo Jumapili.

Kwenye taarifa yake, ICC imesema kuna waranti mbili za kumkamata Bashir anayetakiwa na mahakama hiyo kuhusiana na tuhuma za kuhusika na uhalifu ulitokea katika jimbo la Darfur na kwamba anakabiliwa na kesi inayohusiana na uhalifu wa kivita na mauaji ya halaiki.

Kama mwanachama wa ICC, Afrika Kusini inastahili kumkamata Bashir ikiwa atasafiri kwenda nchini humo, agizo ambalo limetoka huku Umoja wa Afrika ukiwa umeweka wazi kuwa haupo tayari kushirikiana na mahakama hiyo kwa madai kuwa mara zote imekuwa ikiwaonea viongozi wa Afrika. Hata hivyo Bashiri amepokelewa nchini Afrika Kusini.