FANYENI KAZI KWA NIDHAMU-MIGIRO

Mhe. Balozi Mawanaidi Maajar na Mhe. Asha Rose Migiro

Na Mwandishi Maalum

Naibu Katibu Mkuu wa Umoja wa Mataifa, Dkt. Asha-Rose Migiro amewaasa watanzania kwa kusema,  hakuna jambo njema katika utumishi wowote ule uwe wa kuajiriwa serikalini, katika sekta binafsi au hata kujiajiri mwenyewe kama kuwa  na utumishi wenye nidhamu.

Anasema ni nidhamu tu ndiyo itakayomuwezesha  mfanyakazi kutekeleza majukumu yake kwa ukamilifu, Uadilifu na uwajibikaji.

Ametoa wasia huo wakati alipokuwa akisalimiana  na watanzania waishio jijini, New York,  Washigton DC na vitongoji vingine. Wakati wa hafla ya kusherehekea mafanikio yake ya kushika wadhifa wa Unaibu Katibu Mkuu wa Umoja wa Mataifa kwa Miaka mitano na nusu. Hafla hiyo iliandaliwa kwa ushirikiano wa jumuia za watanzania NY na DMV  na Balozi za Tanzania nchini Marekani na Umoja wa Mataifa.

Katika hafla hiyo iliyofanyika katika makazi ya Balozi wa Tanzania New York, Migiro anasema hata yeye asingefika hapo alipo au hata asingemaliza miaka hiyo mitano na nusu kama asinge onyesha nidhamu ya hali ya juu katika kazi.

“ Tumekusanyika  hapa kusherehekea mafanikia haya, haya si mafanikio yangu binafsi ni mafanikio  yetu  sote, ni mafanikio ya nchi yetu ni mafanikio ya Bara la Afrika. Lakini nimefika hapa nilipo pamoja na mambo mengine ni suala  ninadhamu ,nidhamu ile tuliyofundishwa zamani mashuleni. Kwa sababu hiyo  ninawaomba na nyie muweke mbele nidhani katika kazi na shughuli zenu” akasisitiza  Dkt. Asha- Rose Migiro.

Aidha Migiro anasema kwamba utumishi wenye  kuweke mbele nidhani si jambo geni kwa sababu ni nidhamu hiyo hiyo iliyoonyeshwa na viongozi waasisi wa taifa la Tanzania , waliopita na waliopo ndiyo imeifanya Tanzania kuwa kama ilivyo na kutambulika  kimataifa.

“Tumefika hapa, kwa sababu viongozi wetu walifanya kazi kwa  nidhamu sana, wakafyeka misitu na mapori, wakaua  majoka,  kazi ambayo imetuwezesha sisi kupita na kufika hapa tulipo” akasititiza.

Katika mazungumzo hayo ambayo mara kwa mara yalikuwa yakibwagizwa  kwa  “Tanzania Oyeee”. Naibu Katibu Mkuu, pia amewataka watanzania kudumisha amani, upendo, mshikamano na umoja.

Anasema kwamba katika nafasi yake ya unaibu katibu mkuu, ameyaona mengi, ameyasikia mengi kiasi cha kumfanya  aienzi amani na mshikamano walionao watanzania.

“ Jamani hakuna jambo jema kama kuwa na amani, kama kuwa na upendo, kama kuwa na mshikamano. Nikiwa katika jengo lile nimeona na kushuhudia mengi. Ndugu zanguni, ninawaombeni sana, tuendelee kuienzi , kuilinda na kuidumisha amani yetu, amani na utulivu wetu  ni sababu nyingine inayotufanya tuwe tofauti na nchi nyingine” akasisitiza Migiro.

Awali akimkaribisha Naibu Katibu Mkuu kuwasalimia watanzania, Balozi wa Tanzania  Nchi Marekani, Mwanaidi Maajar yeye alimuelezea Migiro kama kiongozi mwanamke  na mama ambaye  amekuwa kivutio kikubwa kwa wanawake wengi kwamba hata wao wanaweza kuja kuwa  kama Migiro.

Akamtaja   Asha- Rise Migiro,  kuwa  kiongozi  anayethamini    kazi,  na  pia ni mtu wa kujituma na mwenye nidhamu sana hapana shaka amefika hapo alipo.

Akasema kuwa utumishi wa kutukuka, nidhamu kazini na moyo wake wa kujituma  na kusaidia watu wanyonge ameanza nao zamani sana tangu akiwa shuleni na hatimaye aliposhika  nyadhifa mbalimbali serikalini na katika Umoja wa Mataifa.

“ Ninamfahamu vizuri sana, tumepita pamoja katika sehemu mbalimbali,  kuanzia shuleni , chuo kikuu na hasa wakati tunafanya kazi  ya kuwasaidia wanawake waliokuwa wanataka msaada wa kisheria, ni mtu wa nidhamu kweli kweli, anayejali muda na wakati” akasisitiza Balozi Maajar

 Balozi Maajari akasema    miaka mtano na nusu ya unaibu katibu  mkuu wake katika umoja wa mataifa, ni miaka   ambayo imeiweka Tanzania katika ramani ya uso wa dunia, lakini ni miaka ambayo kila mtanzania amejivunia nayo na kwa wanawake  imewapa changamoto ya kujituma zaidi na kufanya kazi kwa bidiii zaidi.

Nao viongozi wa Jumuiya za watanzania  Bw.  Hajj na Bw.  Idd  Sendawi, wamemshukuru Naibu Katibu Mkuu kwa kupeperusha vema bendera ya Tanzania katika Umoja wa Mataifa, na kwamba daima  watanzania watendelea kuuezi mchango wake na watatembea kifua mbele.