Dereva wa MCL afariki kwenye ajali

 Gari la Kampuni ya Mwananchi Communications Limited (MCL) aina ya Isuzu Pick-Up,  likiwa eneo la ajali katika kijiji cha Kirinjiko wilayani Same mkoani Kilimanjaro jana,  baada ya kugongana na lori la mizigo ambapo watu  watatu walifariki dunia papo hapo akiwamo dereva wa gari hilo, Robert Huho (picha ndogo). Picha na Daniel Mjema 
 
WATU watatu wamefariki dunia papo hapo akiwamo dereva wa gari la magazeti la kampuni ya Mwananchi Communications Limited (MCL), kugongana na lori la mizigo aina ya Scania.


Ajali hiyo mbaya ilitokea jana saa 11:00 alfajiri katika eneo la Kirinjiko nje kidogo ya mji wa Same, baada ya gari la MCL Isuzu namba T336 BFU kugongana na Scania namba T415 AAM.

Taarifa iliyotolewa kwa waandishi wa habari jana na kamanda wa Polisi Mkoa Kilimanjaro, Robert Boaz ilisema gari hilo la MCL lilikuwa likiendeshwa na dereva Wambura Ramadhan.

Gari hilo la MCL lilikuwa likitokea Jijini Dar Es Salaam kwenda Arusha kupitia Moshi wakati Lori hilo la Scania likiwa na Tela namba 411 AAM nalo lilikuwa likitokea Jijini Dar Es Salaam.

Kamanda Boaz aliwataja waliofariki kuwa ni dereva wa MCL Robert Huho, Ibrahim Mrutu (65) na Abdalah Rajab (49) wote wakiwa ni madereva wa kampuni ya Simba Truck ya Arusha.

Kwa mujibu wa kamanda Boaz, watu wote watatu waliofariki dunia pamoja na majeruhi walikuwa katika gari dogo wakiwa wamepakia nyuma pamoja na shehena ya magazeti.

Waliojeruhiwa katika ajali hiyo ambao walifikishwa Hospitali ya Wilaya ya Same na kuhamishiwa KCMC ni Agustino Nguma, Hamza Omary na Mtero Mussa au Simon Lusekelo.

Majeruhi wengine wawili walitibiwa na kuruhusiwa ambapo Mtero aliyekutwa hospitali ya Same kabla ya kuhamishiwa KCMC alisema alikuwa hafahamu kwa nini yuko hospitali.

“Ninachokumbuka ni kwamba nilipanda gari la Mwananchi pale Dar es Salaam saa 6:00 usiku kwenda Arusha lakini nashangaa kwanini niko hospitali…kumetokea nini?” alihoji.

Hata hivyo taarifa zaidi zilizopatikana eneo la tukio zilisema gari la MCL lililigonga kwa nyuma lori hilo likiwa limesimama barabarani bila kuwapo alama zozote kama limeharibika.

Dereva wa lori hilo ambaye alikataa kujitambusha kwa gazeti hili alikanusha akisema gari lake lilikuwa likitembea lakini mashuhuda waliokutwa eneo la ajali wasisitiza lilikuwa limesimama.

Sheria za usalama barabarani zinataka gari linaloharibika na kusimama barabarani lazima liweke alama maalumu zinazong’aa (reflectors) lakini lori hilo halikuwa nazo.

Wakati Kamanda Boaz akisema gari hilo la MCL lilikuwa likiendeshwa na dereva Wambura, dereva huyo alikanusha madai hayo akisema gari hilo lilikuwa likiendeshwa na marehemu.


“Nimewaambia Polisi japokuwa mimi ni dereva wa Mwananchi lakini wakati wa ajali sikuwa naendesha mimi lakini bado wanashinikiza kuwa mimi ndiye nilikuwa naendesha,” alisema.

Kwa kawaida magari ya safari ndefu ya MCL huwa na madereva wawili wa kusaidiana na siku hiyo, mtumishi mwingine wa MCL, Rahib Bakari alikuwa ameomba lifti akielekea Mwanga.

Wambura alisema aliendesha gari hilo kutokea jijini Dar es Salaam hadi katikati ya Mombo na Hedaru ambapo alibadilishana na marehemu ili amalizie umbali uliokuwa umebakia.

Sababu nyingine inayowafanya polisi waamini kuwa Wambura ndiye aliyekuwa akiendesha gari hilo ni kitendo cha kutoka salama wakati eneo la kiti cha abiria ndilo limeharibika zaidi.

“Pale mbele nilikuwa nimekaa mimi, Mangi (Rahib) na marehemu ndio alikuwa akiendesha na baada ya kile kishindo tu aliruka kwenye gari kwa kiwewe na kuumia zaidi,” alisema Wambura.

Polisi wamemweka mahabusu dereva huyo wa MCL kwa madai ya kuendelea na uchunguzi zaidi huku wakishikilia msimamo kuwa Wambura ndiye alikuwa akiendesha gari hilo.