Askari wa kutuliza ghasia (FFU), wakiwa katika doria aneo la darajani Zanzibar jana ili kukabiliana na wafuasi wa Sheikh Farid Hadi Ahmed, wanayedai kutekwa na watu wasiojulikana katikati ya wiki hii, vyombo vya dola vimekanusha kuhusika na kutekwa kwa kiongozi huyo
Askari wa kutuliza ghasia (FFU),wakiwa wamemtia nguvuni, mmoja wa watu, wakati wa vurugu baina ya kundi la uamsho la Zanzibar na polisi eneo la Darajani Unguja jana, wakidai kuachiwa kwa kiongozi wao sheikh Farid Hadi Ahmed, nayedaiwa kutekwa na watu wasiojulikana. vyombo vya dola vimekanusha kuhusika na kutekwa kwa kiongozi huyo
Na Salma Said
VURUGU zimeendelea Zanzibar huku mtu mmoja akiuawa baada ya kupigwa risasi ya moto na askari wa Kikosi cha Valantia (KVZ) usiku wa kuamikia jana. Habari za kuaminika zinasema mtu huyo, Salum Hassan Muhoja mwenye umri wa miaka 30 mkazi wa Regeza Mwendo nje kidogo ya mji wa Zanzibar alipigwa risasi karibu na Amaan mjini hapa.
Inaaminika kuwa mtu huyo alipigwa risasi wakati akipita karibu na baa na nyumba yakulala wageni Mbawala Amaan ambayo ilivunjwa katika ghasia hizo. Kijana huyo alitarajiwakuzikwa jana jioni kijijini kwao Mwera Regeza Mwendo wilaya ya Magharibi Unguja.
Wakati kukiwa na habari hizo za mauaji vijana kadhaa wenye umri wa kati ya miaka 14 na 18 waliingia barabarani eneo la Darajani na kupambana na askari ambao walikuwa wametanda wakilinda doria.Vijana hao huku wakiimba “tunamtaka amiri wetu , tunamtaka amiri wetu, tunamtaka amiri wertu” walitawanywa na askari hao huku wakirusha mawe kwa askari hao.
Hali hiyo iliwafanya polisi kupiga ovyo mabomu ya machozi katika mitaa ya Zanzibar huku wakifyatua risasi za moto na kuufanya mji kuhanikiza kwa vishindo vya mabomu na risasi na kuzifunga barabara kadhaa.
Baada ya sala ya Ijumaa katika misikiti mbalimbali hali ilonekana kuwa tulivu mjini hapa huku askari wakiwa wamejaa mitaani wakiwa kwenye magari na wengine wakitembea kwa mgguu wakiwa wameshikilia bunduki.
Katika baadhi ya misikiti wakati wa sala ya Ijumaa ilisomwa dua marufu ya Kunuti ikiwa ni sehemu ya kuiombea amani nchi kutokana na vurugu hizo.
Hali ilianza kuchafuka saa 8 mchana wakati kikundi cha vijana kilichokuwa kimejikusanya eneo la Uwanja wa Malindi kuingia barabarani huku wakipiga kelele za kumtaka amiri wao, Farid Hadi Ahmed ambaye alitoweka tangu Jumanne iliyopita.
“Kupotea” kwa sheikh huyo ndiko kulikozua ghasia mjini hapa tangu Jumatano na kufanya mji usikalike huku biashara zote zikiwa zimefungwa na askari mmoja kuchinjwa Jumatano usiku.Wafuasi wa Sheikh huyo wanaamini kwamba kiongozi wao amekamatwa na serikali kwa hiyo wanashinikiza ili aachiwe huru. Barabara za mjini hapa zimejaa takakataka za kila aina kuanzia vifusi, mawe makubwa, matairi yaliyochomwa moto, matofali na vifuu vya madafu na kuharibu miundombinu kadhaa zikiwemo kukata waya.
Kaimu Kamanda wa Polisi Mkoa wa Mjini Magharibi Kamishna Msaidizi wa Polisi, Said Juma Hamis alisema kuwa hana taarifa za kuuawa kijana huyo zaidi ya zile za kuuawa kwa skari wao Bububu.Alisema kwamba jeshi lake litafuatilia kwa karibu juu ya tukio hilo ili kujua ukweli wake,
Kamanda Hamis alisema kuwa hadi jana jumla ya watuhumiwa waliokamatwa kutokana na vurugu hizo ni 39 huku wanane walifikishwa mahakamani jana na wengine wanaendelea kuhojiwa na Polisi. Kaimu Kamanda huyo pia alisema kuwa Jeshi la Polisi linaendelea na juhudi zake za kumtafuta kiongozi huyo wa Jumuiya ya Mihadhara ya Kiislamu, Sheikh Farid ambae anadaiwa kutekwa.
Alisema kuwa katika kufanikisha juhudi hizo jana kulifanyika kikao cha wapelelezi kilichoongozwa na Naibu Mkurugenzi wa Idara ya Upelelezi Zanzibar, ACP Yussuf Ilembo kujadili namna gani wanaweza kumpata au kujua yupo wapi Sheikh huyo.
Vipindi vya Uamsho vyapigwa marufuku
Katika hatua nyingine Tume ya Utangazaji ya Serikali ya Mapinduzi Zanzibar imepiga marufuku vipindi vyote kwenye redio na televisheni vya kikundi cha dini cha Uamsho.
Barua iliyotumwa jana kwa Wakurugenzi wa vituo vya redio na televisheni vya hapa ilisema kwamba hatua hiyo imetokana na ghasiza zinazoendelea nchini ambazo inasadikiwa kuwa zinachochewa na kikundi hicho.
Barua hiyo iliyosainiwa na Mtumwa B Mzee kwa niaba ya Katibu Mtendaji wa Tume ya Utangazaji ilisema kwamba itawachukulia hatua wale wote watakaokaidi agizo hilo.
Waandishi wako katika hatari
Waandishi wa habari waliopo mjini Zanzibar wanaofuatilia ghasia zinazoendelea hapa wamekuwa kwenye hatari kwa kutishiwa maisha yao na vijana wanaofanya vurugu. Makundi yanayofanya vurugu yako ya aina tatu Ubaya ubaya, Kimya kimya na Mbwa mwitu hufanya vurugu na kupora watu mali zao wakiwemo kwenye vyombo vya usafiri na kuvamia mabaa.
Waandishi hao wakiwemo wa kimataifa walivamiwa na kundi la vijana na kuwekwa chini ya ulinzi eneo la Mbuyuni na kutaka kunyang'anywa vifaa vyao vya kazi lakini waliokolewa na walinzi waliokuwa jirani.
Waandishi walivamiwa katika eneo la Mbuyuni baada ya kumaliza kusali sala ya Ijumaa ambapo waandishi hao walitakiwa kuondoka na kutishiwa maisha yao kwa kupigwa ambapo baadhi yao walisukumwa na kupigwa.
“Mimi nimeshachoka kupigwa na hawa watu lakini niliyempiga ninamjua na kwa kweli kwa sasa hatukubali tena” alisema Munir zakaria mwandishi wa Channel Ten.
Vipeperushi vyasambazwa Zanzibar, vya watia khofu wakristo
Vipeperushi vinavyotishia uhai wa Serikali ya Umoja wa Kitaifa ya Zanzibar vimepeperushwa mjini hapa kufuatia ghasia zinazoendelea kwa siku ya tatu mfululizo.
Kipeperushi kimojawapo kinasema: “CCM kosa letu kuwatia mbwa msikitini. Sasa tunasema kuwa basi tena litakalokuwa na liwe kwa sisi CCM basi tena umoja na CUF.
Nyie CUF/Muamsho Abubakari Khamis Bakar (Waziri wa Katiba), Mussa (Kamishna wa Polisi) na Azizi (Kamanda wa Polisi Mkoa) mmeshazoea fujo na sisi sera yetu CCM sera yetu amani sasa mujiuzulu mumpishe Rais afanye kazi zake, Tumechoka na nyinyi juu ya mauaji ya askari wetu. Ondokeni murudi kwenu.
Wewe Abubakar hukuanza leo na jana ufisadi kazi ya ufisadi umeizoweya hadi ulifungwa jela na mafisadi wenzako, mwishowe huku SMZ kumekuokoa.”
Wakati huo huo kuna waraka umesambazwa ambao umewatisha khofu waumini wa dini ya kikristo nchini ukisema wote watakatwa vichwa waraka huo ambao unasemekana umetolewa na watu wenye kujiita jumuiya ya Uamsho umeandikwa na kusambazwa katika maeneo mbali mbali huku wenyewe wakristo wakipelekewa maofisini kwao.
Akizungumza na masikitiko Askofu wa Kanisa la Anglikan Mkunazini Emmanuel Masoud amesema ni wakara ambao umewastusha wakristo kutokana na maneno mazito yalioandikwa humo ambapo ndani ya wakara huo.
“Maneno yaliandikwa humu yametushitua sana wiwi waumini wa dini ya kikristo hapa Zanzibar kwa kwa kweli sio jambo la kupuuzia ikiwa wanasema watatukata vichwa ni jambo la hatari kabisa” alisema Masoud.
Wakizungumzia ukweli juu ya suala hilo Sheikh Azzan amesema jumuiya yake haihusiki na waraka wa aina hiyo na wao kama waislamu hawana sababu ya kuwatisha watu kwa kuwa wanaamini uislamu sio dini ya kuwabagua watu wala kuwatisha watu.
Azzan alisema wapo baadhi ya watu ambao wanatumia propaganda mbaya za kutaka kuwagawa wazanzibar katika kipindi hiki na ndio wanatumia kila sababu za kuwagawanya lakini aliwatahadharisha wananchi kuepukana na propaganda kama hizo kwani zinaweza kuitia nchi katika pahala pabaya na kutoweka kwa amani.
“Sisi hatuhusiki na waraka huo aliyetoa waraka huo ni watu ambao wanapingana na amani iliyopo lakini pia ni watu wenye kueneza propaganda mbaya za kutaka kuwagawa wazanzibari jambo ambalo sisi tunaamini hatuna ugomvi na wazanzibari wote sisi ni dugu hatubagui awe ni mkristo au muislamu awe mweupe au mweusi hatuwezi kubaguana kwa kuwa misingi ya dini yetu imekataza kubaguana” alisema Azzan.
Dereva wa Sheikh Farid aongea
Akizungumzia mkasa wa kupoteza kwa Sheikh Farid, Dereva aliyempakia, Said Omar alisema alitumwa kununua na kupeleka umeme nyumbani kwao na ndipo alipomuacha Sheikh huyo hapo eneo la Mweni hapo akiwa na watu wakizungumza naye ndani ya gari aina ya Noah lakini hakuwahi kuchukua namba zake na pia hakuweza kuona sura za watu hao kwa kuwa walikuwa katika gari yenye vioo vyeusi.
Akizungumza kwa khofu mbele ya waandishi wa habari huko Mbuyuni Mjini Unguja, muda mfupi baada ya kumaliza sala ya Ijumaa Said alisema kwamba baada ya kurejea nyumbani alimfuata ambapo hakumkuta tena jambo ambalo lilimtia wasiwasi na kurejea kuongea na wake zake nyumbani kwamba Sheikh Farid haonekani.
Naye kwa upande wake Naibu Amir wa Jumuiya ya Uamsho na Mihadhara ya Kiislamu Zanzibar (JUMIKI) Azzan Khalid Hamad anasema taasisi za kiislamu zinaamini kwamba Sheikh Farid bado yupo mikononi mwa jeshi la polisi.
Sheikh Azzan alisema bado wataendelea kumtafuta licha ya kuwa serikali inaonekana kushindwa kufanya hivyo ambapo wametoa wametoa muda wa saa 26 hadi hapo kesho iwapo hajaonekana watachukua hatua wenyewe ya kumtafuta. Aidha aliwataka waumini wa dini ya kiislamu kuendeleza amani katika kipindi hicho na kuacha kujiingiza katika makundi ya kihuni ambapo alisema kumetokea vijana wenye kufanya vurugu na baadae kusingiziwa Uamsho.
Sheikh Azzan alisema kukamatwa kwa Sheikh Farid ni juhudi za kuwarejesha nyuma wazanzibari katika kudai haki yao ambapo alisema wapo watu ambao hawataki kuona serikali ya umoja wa kitaifa ikiendelea na ndio wanafanya kila njia ya kuvuruga amani nchini.
Chuo cha ICPS Mwembeladu chaharibiwa
Wakati hali ya usalama katika maeneo mbali mbali haijatulia na mali na miundombini kuharibiwa, vijana wenye kuendesha vurugu wamevamia chuo kimoja cha ICPS kilichopo maeneo ya Mwembeladu na kuvunja vunja jengo lao na vifaa viliyomo ndani.
Akizungumza na Mwananchi Mkuu wa chuo hicho, Omar Othman alisema awali waliona kundi la vijana likisonga mbele na kufika katika chuo hicho na kutaka kuingia ndani baada ya kuvunja milango na madirisha na kisha kuiba vitu mbali mbali katika chuo hicho.
Baraza la Wawakilishi.
KUFUATIA machafuko yalioibuka kwa siku ya tatu mfululizo jana Wajumbe wa Baraza la Wawakilishi kutoka Chama cha Mapinduzi (CCM) waligoma kuingia katika baraza hilo ili kuishinikiza serikali kuchukua hatua za haraka za kumaliza machafuko na kurejesha hali ya usalama Zanzibar.
Wajumbe wa baraza hilo ambao hawana nyadhifa serikalini kutoka kambi ya CCM “Backbanchers” walianza mgomo wao juzi jioni na kususia vikao vya Baraza la Wawakilishi vinavyoendelea na jana asubuhi kulazimika Spika wa baraza hilo, Pandu Ameir Kificho kuahirisha kikao kwa muda wa dakika tano ili kutoa fursa ya wajumbe hao kujipanga na kurudi ndani ili shughuli za baraza ziendelee.
Jumla ya wajumbe wa baraza hilo wote ni 82 pamoja na Spika na shughuli zote za baraza hilo zinahitaji kuendelea kwa kuwa na nusu ya wajumbe ambapo wajumbe waliokuwepo awali walikuwa ni 24 jambo ambalo lilifanya baraza hilo kusiktisha shughuli zake kwa muda ili kutoa fursa ya kuwashawishi wajumbe waliogoma waingie ndani na kuendeleza shuguli hizo ambapo Waziri wa Afya, Juma Duni Haji alikuwa anahitaji kupata idadi ya wajumbe waliotimiza koramu ili kupitisha muswada wake aliouwasilisha.
Kwa mujibu wa Mnadhimu wa CCM ndani ya Baraza la Wawakilishi, Salmin Awadh Salmin, wajumbe kutoka chama hicho wamefikia uamuzi huo wa kugomea vikao kutokana na vurugu zinazoendelea na kutaka Spika akubaliane na hoja binafsi ya kujadili hali ya kisiasa Zanzibar jambo ambalo Spika alikataa.
Hata hivyo, baada ya mashauriano kati ya viongozi serikali, Spika na wajumbe hao wa CCM walikubali kurudi na kuendelea na vikao ambapo walikuwa wajumbe 45 huku wakishutumu kuwa serikali ya Zanzibar imeonesha udhaifu mkubwa katika kuwahakikishia wananchi wake usalama na kuwataka Mkuu wa Jeshi ya Polisi nchini IGP, Said Mwema pamoja na Kamishna wa Polisi Zanzibar, Mussa Ali Mussa kuwajibika kwa madai kwamba wameshindwa kutekeleza wajibu wao na kuacha hali tete ya usalama ikiendelea.
Wakizungumza na waandishi wa habari wajumbe hao walisema kwamba hali inavyoendelea inatishia usalama wa serikali ya maridhiano na hivyo kuitaka serikali kuifuta jumuiya ya Uamsho kwani wamekuwa wakiendeleza vitendo vya uvunjifu wa amani bila ya kuchukuliwa hatua yoyote.
Shughuli za Baraza zilianza tena baada ya Spika kutoa nasaha na kuwataka wajumbe hao kuzingatia ahadi za kuwatumikia wananchi pamoja na Serikali ya Umoja wa Kitaifa.
Vurugu zilizoanza Jumatano baada ya kutoweka kwa kiongozi wa taasisi za Kiislamu, Sheikh Farid Hadi Ahmed ambaye hadi sasa hajaonekana huku harakati za kijamii zikikwama katika maeneo mbali mbali ikiweno wanafunzi kushindwa kupata utulivu katika mitihani ya kidatu cha nne ambapo bado hofu imetanda miongoni mwa wananchi.
No comments:
Post a Comment