Nini Hatma ya Jumuiya za Watanzania na Siasa za Vyama Vingi Ughaibuni?

Wapendwa Watanzania wenzangu tunaoishi nje ya Tanzania kwa wakati huu, napenda kuwashukuru kwa moyo wenu wa umoja, upendo na mshikamano mliokuwa nao kama Watanzania. Suala la upendo, umoja na mshikamano kwa watanzaia sio suala la kutafutiza  ni suala lionekanalo wazi popote walipo watanzania.  Umoja. ucheshi, utani, matumizi mazuri ya lugha yetu ya Kiswahili ni mambo ambayo kwetu kama Watanzania tunayaona madogo lakini ni mambo ambayo wezetu kutoka bara la Afrika na mabara mengine wanayaona ni ya pekee kwetu.  Ndio maana hapa hapa napenda kuwapongeza ndugu zetu wa Washington-Marekani walioamua kwa moyo mmoja kufungua darasa la Kiswahili kwa watoto ambao aidha wazazi wao ni Watanzania au kwa wale ambao wameona hizi tunu tulizo nazo Watanzania.  Watanzania bila kificho sisi ni wamoja, wapenda watu na wachangafu muda wote.

Nilipata bahati ya kusoma na Wakenya, Waganda na Wakongo, kwa bahati mzuri ndugu zetu hawa wanabahati ya kujua lugha ya Kiswahili. Jambo moja ambalo walikuwa wanashangaa ni ni jinsi gani ninavyotumia lugha hii kwa maisha ya kawaida. Mfano nilipokuwa nataka kumwomba mtu kunichukulia kitu nilisema ‘…..naomba unipatie kitabu kile’ au ‘samahani naomba ….’ au nashukuru kwa…’ ndugu zangu hawa walikuwa wanashangaa kwanini natumia lugha ya namna hiyo. Na jambo dogo kama hilo linatufanya watanzania kuwa wa pekee na kuendeleea kuwa mfano mzuri kwa wengine. Hiyo ndio sifa ya Mtanzania.

Kwa uzuri na umoja wetu ambao asili yake uwezi kuitenganisha na Watanzania wenyewe, yaani ni kitu kilichomo ndani mwetu. Tumekua na kulelewa katika asili ya umoja na mshikamano. Kwa mantiki hiyo Watanzania wanapotoka Tanzania na kwenda kwenye nchi za kigeni mara nyingi uendeleza umoja na mshikamano huo. Toka nilipoanza kusoma mitandao ya kijamii nimeshuhudia jumuiya mbali mbali za Kitanzania toka sehemu mbali mabli hapa duniani. Nikitaja chache, Jumuiya ya Watanzania huko Italia, Uingereza, Uholanzi, Ubeligiji, Afrika ya Kusini, Ujerumani na hapa tulipo yaani Marekani kuna Jumuiya ya Watanzania New York, Washington hali maarufu DMV, Midwest, Texas (Dallas, na Huston)  na Jumuiya nyingi nyinginezo za Kitanzania.

Cha kufurahisha zaidi,kupitia jumuiya hizi za kitanzania , Watanzania wamekuwa wakikutana kama Watanzania na kujadili yaliyo ya Kitanzania. Tumekutana wakati wa misiba, sherehe mbali mbali kama harusi, siku zetu za kuzaliwa, Eid al Fitr, Eid Mubarak, Noeli, Pasaka, Siku ya Tanzania Kupata uhuru, Mapinduzi Zanzibar, Mei Dei, na matukio mengineyo kama Rais wetu mpendwa akifika kutusalimia, au kiongozi yeyote kutoka nyumbani Tanzania.

Mambo hayo yote mazuri tunayafanya kama Watanzania, wenye kupendana, kushikamana na kushirikiana. Kwani tufanyapo hayo matukio uwa kwa namna moja au nyingine yanatuleta pamoja kama Watanzania tuliopo nje ya Tanzania na kutuunganisha na Watanzania wenzetu walioko Tanzanzia.

Lakini ndugu zangu watanzania, hivi karibuni kwa muono wangu kuna kitu kinaibuka kati yetu na kama tusipokuwa makini hatima ya jambo hili laweza kuondoa uzuri wote ambao nimeulezea toka mwanzo. Hakuna hata siku moja kwa miaka minne iliyopita nilipokuwa kwenye jumuiya za Watanzaia aidha hapa Marekani au  Ulaya nilipokwisha ulizwa WEWE NI CHAMA GANI?au WANAOTAKA KADI ZA CHAMA FULANI WANIONE BAADAE. Ndani ya miaka ya hivi karibuni maswali haya yameanza kuulizwa kwa uwazi kabisa bila kificho katika JUMUIYA ZA WATANZANIA. Swali kwa ninyi ndugu zangu Watanzania, ni  nini nia ya maswali haya au kauli hizi kwenye jumuiya zetu?

Ngoja nitoe mifano ya matukio mawili yanayoyambatana na hiki ninachokielezea,  yaani Umoja wa Watanzania kwa upande mmoja na Vyama vya Siasa kwa upande mwingine. Mwaka jana tulisikia mugogoro mkubwa uliojitokeza kati ya Wanajumuiya ya Watanzania huko Washington-DMV, na mgogoro huo ulichochewa na kile kilichosemekana na kuchanganya kazi ya Vyama vya Siasa na Jumuiya ya Watanzania, wale viongozi wenye tamaa ambao wanataka kuwa pande mbili mbili yaani awe kiongozi wa Chama cha siasa na huku  ni kiongozi wa Jumuiya ya Watanzania. Baba wa Taifa alisema watu hawa ‘..waogopeni kama ukoma…’ Hawa si Watanzania wa kweli ndugu zangu, ni watu waliojawa na tamaa, ningewaomba muwafukuzie mbali haraka sana kabla hawajatuharibia uzuri wa umoja na mshikamano wetu Watanzania. Watu hawa ni kama ugonjwa wa kansa, unakula ndani kwa ndani.

Mfano mwingine ni uchaguzi wa juzi wa Viongozi wa Chama kimojawapo cha siasa huko huko DMV, jamani jamani ni aibu Watanzania. Yaani tumeingiwa na tamaa kiasi hicho. Au raha yenu ni kutambulishwa kwenye mikutano mikuu ya vyama hivyo kama Diaspora. Maana baadhi yenu tuliwaona mkitambulishwa huku mkiinua pua zenu juu.  Acheni  ujinga huo mara moja. Tuacheni tuendelee kushikamana kama watanzania, acheni kutugawa Watanzania, pelekeni tamaa  zenu huko, au ondokeni mara moja kwenye jumuiya zetu. Ni aibu na uchuro kwa jumuiya zetu Watanzania.

Historia inatuonesha kwamba vyama vya siasa vilivyoanzishwa nje ya nchi husika  au vilivyokuwa na mwendelezo mpaka nje ya nchi yaani kuwa na matawi nje ya  nchi vilikuwa vyama vya kimapinduzi. Na mifano ya vyama hivyo tunayo, kama Chama cha Mapinduzi Haiti kilianzishwa nchini Marekani, Chama cha Mapinduzi cha Cuba kilichopata msukumo kutoka Urusi, Umoja wa Vijana wa Uturuki ulioanzishwa huko Mashariki ya Kati kwa ajili ya mapinduzi huko Uturuki, na vingi vinginevyao. Vilianzishwa au vilifungua matawi yao nje ya nchi zao ili  kuamashisha  ukombozi wa nchi zao. Watanzania kitu gani tunataka kukomboa kwa hivi vyama vya siasa?

Ndugu zangu vyama vya siasa vya nini kwenye Jumuiya zetu za Kitanzania huku ughaibuni? Najua Tanzania ni nchi huru, ni nchi ya kidemokrasia, na inayotoa fursa kwa kila Mtanzania kuanzisha chama cha siasa huko Tanzania na si kwingineko. Ndugu zangu mlioingiwa na shetani huyu wa vyama uondoeni uchuro kwenye jumuiya zetu na tuacheni na umoja wetu watanzania. Ndugu zangu tupo ugenini , kinachotuleta pamoja ni Utanzania na wala si chama cha siasa. Mnaotaka vyama vya siasa rudini Tanzania mkagombee uongozi wa kisiasa. Na sisi wapenda umoja na wanaopenda kuimarisha jumuiya zetu za kitanzania watupeni nje watu hawa.

Watanzania tutaendelea kuwa pamoja endapo kila mmoja wetu anayependa kutambulishwa kama Mtanzania kupigana kwa nguvu zote ili kuondoa ugonjwa unatuingilia  taratibu kwenye jumuiya zetu, ugonjwa wa kutaka tuanze kutambulishana kwa kadi za vyama vya siasa. Nafungua ukurasa kwa kila Mtanzania aliyopo Ughaibuni kutoa maoni na kutafakari kwa makini jambo hili.

Umoja na Mshikamono Daima!!!!!  Asanteni Ndugu zangu Watanzania