Atiwa mbaroni akidaiwa kuua watoto wake watatu

Katavi. Polisi Mkoa wa Katavi inamshikilia mkazi wa Kijiji cha Majimoto, wilayani Mpanda kwa tuhuma za kuwaua watoto wake watatu kisha kuwatumbukiza kwenye kisima cha maji.

Kamanda wa Polisi Mkoa wa Katavi, Dhairi Kidavashari alisema  tukio lilitokea juzi saa 11:00 alfajiri baada ya kuibuka ugomvi mkubwa kati ya mkazi huyo na mkewe, Jacquline Lukevi (21) ambaye alinusurika kifo baada ya kutumbukizwa kisimani, lakini hali yake ni mbaya.
Kidavashari aliwataja watoto waliouawa kuwa ni ni Maria  (miezi 4), Eliza  (4) na  Frank (6).

Alisema chanzo cha mauaji hayo, ni ugomvi wa wanandoa hao baada ya mwanaume kudhani  mkewe ana uhusiano wa mapenzi na mtu mwingine, kitu ambacho kilikuwa kikisababisha ugomvi mara kwa mara kati yao.

Habari zinadai kuwa, baada ya kuibuka kwa ugomvi huo kijana huyo alianza kupiga watoto wake na mama yao kwa silaha mbalimbali, akiamini tayari amewaua wote alianza kuwaburuza hadi nyumbani kwa Kawaida Jonas ambako kuna kisima cha maji na kuwatumbukiza.

Hata hivyo, wakati akifanya kitendo hicho aliudondosha mwili wa Maria barabarani, baadaye baadhi ya wananchi waliuona  na kwenda nyumbani kwake na kmuuliza kuhusu mauaji ya mtoto huyo.

Inadaiwa  kijana huyo alitoa majibu yenye utata kwamba,  watoto wote wameondoka na mama yao mzazi.

Inadaiwa kuwa kutokana na hali hiyo, wananchi hao walimwacha mtuhumiwa na kwenda kutoa taarifa Kituo cha Polisi Majimoto, ambao walifika eneo la tukio na kuanza kufuatilia na kubaini miili   walikuwa imetumbukizwa kwenye kisimani nyumbani kwa Jonas.

Baada ya kubaini hivyo, askari  waliopoa miili hiyo huku watoto wawili wakiwa wamefariki, lakini mama yao akiwa hai, bali  alikuwa hawezi kuongea.

Kidavashari alisema mwanamke huyo alikimbizwa Kituo cha Afya Mamba kwa matibabu, ingawa  hali yake inaeelezwa ni mbaya.Alisema  mtuhumiwa anashikiliwa  akisubiri kufikishwa  mahakamani.

Mwananchi