Jumuika na chaUKIDU, jivunie Kiswahili KILA SIKU YA IJUMAA

Lengo:

Hili ni jukwaa ambapo wataalamu, wakereketwa na wafurukutwa  wa Kiswahili - kupitia Chama cha Ukuzaji wa Kiswahili Duniani (chaUKIDU: www.chaukidu.org ) chenye makao makuu yake nchini Marekani – watawaleteeni  makala au mijadala mifupi ya uchokonozi kuhusu masuala anuai ya Kiswahili kama vile ukuaji wa msamiati, aina za msamiati, mikanganyiko na mikengeuko ya kisarufi na hata ya kitahajia, miktadha ya mawasiliano na athari zake katika matumizi ya lugha, sera za lugha, Kiswanglish, nk. nk. Lengo ni kuwa na jukwaa shirikishi katika ukuzaji na uendelezaji wa lugha yetu pendwa. Jivunie Kiswahili

makala – 1 [8/2/13] :

Kama mgeni rasmi katika sherehe za kuadhimisha miaka miatatu ya blogu ya VIJIMAMBO na Tamasha la Kiswahili lililofanyika huko Capitol Heights, MD nchini Marekani tarehe 6 Julai, 2013, Mhe Ali Hassan Mwinyi (Rais Mstaafu, JMT, Awamu ya Pili) alisisitiza katika risala yake haja ya kila mtumiaji wa Kiswahili kuwa mhifadhi na mlinzi mwaminifu wa Kiswahili kwa kuzingatia matumizi yake sahihi. Dhana ya ‘usahihi’ wa lugha ni pana na tata. Kwa minajili ya kufungua rasmi jukwaa hili na kwa heshima ya Mhe Ali Hassan Mwinyi, ebu tuangalie na kutafakari juu ya baadhi ya mifano aliyotumia katika risala hiyo akibainisha matumizi sahihi na yasiokuwa sahihi:

sahihi	sio sahihi	Mifano hai (imepatikana kwa ku-google)
upungufu	mapungufu	CUF yabainisha mapungufu ya rasimu ya katiba (www.cuf.or.tz )
uamuzi	maamuzi	Lowassa: taifa stars fanyeni maamuzi magumu muwape raha Watanzania (http://www.mjengwablog.com/michezo/ )
uhusiano	mahusiano	Forum: mahusiano, mapenzi, urafiki (http://www.jamiiforums.com/mahusiano-mapenzi-urafiki/ )
ushirikiano	mashirikiano	Jamhuri ya Kiislamu ya Iran na Oman zikiwa ni nchi mbili muhimu na zenye kuleta athari chanya katika masuala ya kiusalama katika eneo la Ghuba ya Uajemi, daima zimekuwa zikiimarisha na kustawisha mashirikiano yao katika nyanja zote (http://kiswahili.irib.ir/uchambuzi/ )
hesabu	mahesabu	Ripoti na Taarifa za Mahesabu (http://kiswahili.daraja.org/accountability/ )
mwendo wa saa nane	mwendo wa masaa nane	Natoka Arusha kwenda Singida kwa barabara hii mpya, ni mwendo wa masaa 3 tu. (https://twitter.com/tonytogolani/status )

USIKOSE KUANZIA KESHO IJUMAA  AUG 2, 2013 NA KILA SIKU YA IJUMAA