Ilani: Ukitaka kuangalia kipindi cha reality TV cha Wema Sepetu, ‘In My Shoes’ na shule hukwenda, nakushauri ukae na kamusi ya Kiingereza – Kiswahili ili uweze kwenda naye sawa. Hii ni kwasababu, asilimia 50 ya lugha anayoitumia mrembo huyu ni Kiingereza ambayo kwa Watanzania wengi imewapita kushoto.
Nimesikia watu wengi mno wakilalamika kuwa matumizi ya Kiingereza kingi kwenye show yake yamewafanya wasikipende kipindi hicho na kunifanya nihoji, nani walengwa hasa wa kipindi chake? Kwa niaba yao ningependa kulifikisha ombi lao kwa Wema kuwa atumie zaidi Kiswahili katika kuongea ili wengi wamwelewe. Pamoja na kwamba Wema ndivyo alivyo na hata wakati akihojiwa kwenye TV/RADIO ndivyo huongea, ajizuie katika kipindi chake ili kila mtu amfuatilie.
Katika elimu yangu ya uandishi wa habari na utangazaji wa radio/TV nilifundishwa kuwa, wakati wa kuandaa kipindi chochote kile, ni lazima ubainishe, walengwa wa kipindi chako (target audience). Kwa kuangalia umaarufu wa Wema Sepetu, hakuna shaka kuwa walengwa wake wakubwa, ni watu wa kawaida kabisa ambao ndio wanunuaji wakubwa wa magazeti ya udaku yaliyolikuza jina lake nchini na wamekuwa wakimpenda sana.
Kwa namna anavyokiendesha kipindi chake kwa kusimulia matukio yanayooneshwa kwenye kipindi, walengwa ni wale wanaokielewa Kiingereza. Swali ni je, wasomi, raia wa kigeni au watoto wa Masaki, Osterbay na maeneo mengine ya watu wa hali ya juu wanaosoma ama waliosoma kwenye shule za kishua wanakiangalia kipindi hicho? Sio kweli na kama wapo basi ni wachache.
Watu kama hao kwanza hawatumii ving’amuzi vinavyotumika na watu wa hali ya kawaida ambako TV za kibongo zipo. Watu wa maeneo hayo, huangalia DSTV zaidi ambako huko hupenda kuangalia vipindi vya kinyamwezi kama, Keeping Up With the Kardashians, Ice Loves Coco, The Hustle Family ya T.I na Tiny ama The Real Husbands of Hollywood na zingine kibao. TV za kibongo huangaliwa kwa nadra na tena labda wakati wa taarifa ya habari saa 2 usiku, na baada hapo huendelea kuangalia TV za nje.
Kipindi cha Wema Sepetu ambacho huoneshwa na runinga ya EATV, kinaangaliwa zaidi na watu wa kawaida ambao kwa bahati mbaya amekuwa akiwatenga kwa kupenda mno kuongea Kiingereza. Tanzania bado hatujafika huko na hilo Wema anapaswa aliweke kichwani mwake. Asiletee maisha ya Hollywood kwenye kipindi kinachoangaliwa na Mtanzania wa kawaida.
Kama angekuwa hajui kabisa Kiswahili, basi hilo lingeeleweka. Abadilike..
4 comments:
Nawashangaa sana watanzania wenzangu Wamerekani wenyewe sasa hivyi wanajifunza kiswahili kwa kasi sana jiulizeni kwanini? Halafu sisi tunajifanya kudharau lugha yetu haya wee!
Mpira wa EPL na UEFA nao wapelekwe watangazaji wa Kiswahili ili iwe sawa bin sawia maana imeshakuwa shida sasa.!!! Pia ni uamuzi wako kuangalia kipindi au kuacha...
Hehehe ndo Watanzania mjifunze Kiingereza, Dunia ya sasa Kiingilishi Ni muhimu sana. Ila kipindi cha Wema si kizuri hakichekeshi wala hakihamasishi hata kidogo! Ndo maana nitaendelea kuangalia "wana wake live" na " Mkasi" hivyo vingine wana unga unga tu kuuza sura kwenye tv, Mboni show anajitahidi kidogo ila anaongea kwa kutokujiamini na inaonyesha wazi. Tunawataka kina Oprah na kina Ellen DeGeneres na kina Tyra banks na wengine wengine huku Tanzania! Tu nataka vipendi vyenye habari, masimulizi, mafundisho na maburudisho sio mashauzi tu ya kimbea! Khaaa!
wema mwenyewe shule hana ila kabahatika kujuwa lugha na ndiyo maana kwa akili yake anafikiri kuongea kiingereza ni dili. Yote hiyo ni ukosefu wa elimu. Kwa huyo anany hapo juu anayesema mpira wa epl utangazwe kwa kiswahili naye pia ni maimuna wa lugha. Mpira hauhitaji lugha y kigeni, yaani ni sawasawa tu na karate pale watu wanapopigana, unataka kujuwa nini zaidi ya kuona fulani anapigwa? Tanzania wasanii wetu ni fake sana na hawajiamini. Hata nyie fikirieni, huyu bibie ni mcheza sinema za uchwara na ana mashabiki ambao pia hawajaenda shule kama yeye ya nini kuongea lugha ya kigeni wakati watazamaji wake karibia ya 90% hawajuwi hiyo lugha ya kigeni? Wapi waratibu vipindi hivi jamani?
Post a Comment