POLISI WAPAMBANA NA MACHINGA MKOANI MWANZA

JESHI la Polisi mkoani Mwanza, limelazimika kutumia mabomu ya machozi kuwatawanya wafanyabiashara ndogo (wamachinga) waliokuwa wanapinga kuondolewa katika eneo la Kempu na eneo la soko la Makoroboi jijini humo.Aidha, hatua hiyo imesababisha vurugu na kusimamishwa kwa shughuli mbalimbali za kijamii, ikiwemo kufungwa kwa maduka hadi katikati ya eneo la jiji na baadhi ya huduma ya usafiri kukosekana kwa muda katika barabara zinazokatiza katikati ya jiji hilo, ambapo kuanzia nne asubuhi hadi tunaenda hewani mashuhuda wanasema vurugu hizo bado zinaendelea.

Kamanda wa Polisi mkoani humo, Valentino Mlowola, ameumbia mtandao huu leo Juni 11, 2014 kuwa Jeshi hilo limelazimika kutumia mabomu hayo ili kuwatawanya wafanyabiashara hao waliokuwa wakihatarisha amani na kusema bado hakuna mtu yeyote aliyeripotiwa 

kujeruhiwa katika vurugu hizo.

Serikali yatakiwa kuingilia kati migogoro ya wamachinga

Akiomba mwongozo Bungeni mjini Dodoma, Mbunge wa Nyamagana, Ezekiel Wenje, ameitaka serikali kusitisha zoezi hilo ili kutafuta njia mbadala ya kushughulikia migogoro kati ya serikali na wamachinga.

Naye Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi, amesema kuwa Serikali inashughulikia suala hilo ili kubaini ukweli na itatoa taarifa Bungeni baada ya kuhakikisha tukio hilo.Katika mtandao wa JamiiForums, kumekuwepo na mjadala wa tukio hilo ambapo mdau aliyejitambulisha kwa jina la Mashimba 1, alisema “Mabomu ya machozi yanapigwa kila kona ya mji kufuatia bomoaboma ya vibanda vya machinga eneo la Makoroboi, ilikuwa nifanye shughuli zangu hapa lakini naona haiwezekani, huu utawala wa kibabe siku moja utatufikisha kusikostahili" akionekana kukwazwa na hali iliyotokea jijini humo