Ukawa watarudi bunge la katiba

Ukawa watarudi bunge la katiba kama makubaliano yatakuwa kujadili rasimu ya wananchi.

Chama cha Demokrasia na maendeleo Chadema kimewataka baadhi ya viongozi wa Dini na
Siasa wanaojaribu kushinikiza au kusuluhisha kundi la umoja wa katiba ya wananchi Ukawa kurudi bungeni kuendelea na mjadala wa katiba mpya kutambua kwanza sababu zilizowatoa Ukawa ndani ya bunge hilo na kwamba kundi hilo lipo tayari kurudi bungeni kama watakubaliana kujadili rasimu inayotokana na maoni ya wananchi.

Mnadhimu mkuu wa kambi ya upinzani bungeni na mbunge wa Singida mashariki Mheshimiwa Tundu Lisu amesema hayo wakati akiwahutubia wakazi wa mji wa Iringa katika viwanja vya soko la kihesa ambapo amesema umoja huo hautakuwa na pingamizi lolote kuhusu kurudi kuendelea na mjadala wa katiba mpya kama tu watakubaliana kujadili rasimu ya katiba hiyo iliyowasilishwa na tume ya Jaji Joseph Warioba rasimu iliyotokana na maoni ya wananchi.

Aidha Tundu Lisu ameongeza kuwa baada ya vyama vya upinzani kuunda umoja wa katiba ya wanchi (UKAWA) kumezuka maneno mengi ya plopaganda kutoka chama tawala yanayojaribu kuwakatisha tamaa wananchi akifafanua kuwa plopaganda hizo ni hofu ya chama cha mapinduzi kuuogopa muungano huo wa wapinzani.

Kwa upande wake mbunge wa Iringa mjini mchungaji Peter Msigwa amewataka wananchi wa jimbo la iringa mjini kutotishwa na maneno ya wapinzani wake kutoka chama cha mapinduzi wanaojaribu kuteka ajenda za chadema jimboni humo kwa kisingizio cha utekelezaji wa ilani ya chama tawala na kwamba yeye hatachoka kupigania maendeleo ya jimbo hilo na wananchi wake.

 ITV