MBWEMBWE ZA YANGA ZITAMUWEZA MAXIMO

Haikunishangaza sana pale klabu ya Yanga ya Tanzania ilipoamua

kupeleka kikosi ambacho si cha kwanza katika michuano ya Kagame. Tena

ikaamua kupeleka kocha msaidizi badala ya kocha wake mkuu. Hiki kitu

kinafanyika Yanga pekee.

Sikushangaa pia pale shirikisho la vyama vya soka katika ukanda huu,

CECAFA lilipoamua kuiondoa Yanga katika michuano hiyo.

Hayo yote hayakunishangaza kwa sababu tabia za viongozi wa Yanga

nazijua na tabia za CECAFA zinafahamika.

Hawa wana mambo yao ya kitambo. Tangu Julai 2008, siku ile Yanga

walipogomea mchezo wa kumtafuta mshindi wa tatu katika michuano hii

hii ya kagame iliyofanyika hapa nchini.

Yanga walitia aibu ya karne siku hiyo. Wakiwa na kikosi bora kabisa,

wakaamua kukacha kucheza na Simba kwa madai kwamba wanaidai CECAFA

pesa zao. Sisi watu wa mpira tukaghadhabika vilivyo lakini siku chache

zilizofuata, ligi kuu ya England ikaanza. Tukahamia huko kama kawaida

yetu.

Hiyo ndio Yanga bwana.

Yanga wana mbwembwe kuliko timu zote za nchi hii. Wamegoma kupokea

pesa za udhamini wa Azam TV, wanasema ni kiduchu huku wakijua wazi

kwamba hawana mamlaka ya kuzuia michezo yao isioneshwe na kituo hicho.

Hii ina maana kwamba michezo yao itaoneshwa bure.

Pesa ambayo Yanga wanasema ni ndogo, ni nyingi kuliko zawadi ya

mshindi wa kwanza wa ligi kuu ambayo Yanga wanajiandaa kuishindania

kwa msimu mzima.

Hiyo ndio Yanga, timu maridadi na jeuri hapa nchini ambayo benchi lake

la ufundi linaongozwa na kocha kipenzi cha Watanzania, Mbrazil Marcio

Maximo.

Maximo ndiye kocha sahihi kabisa kwa soka la nchi kama Tanzania. Ndiye

aliyejenga msingi wa hapa soka letu lilipo leo ambao haukuwepo. Ndiye

aliyetuambia kwamba soka linafundishwa kwenye vilabu na siyo timu ya

taifa.

Maximo aliyasema hayo akiwa na timu ya taifa ya Tanzania.Ila leo Maximo yupo Yanga.

Yupo kwenye klabu ambako ndiko haswa wachezaji wanakopatikana. Tatizo ni

kwamba klabu hiyo ni Yanga na siyo Mtibwa Sugar wala Mbeya City.

Yanga ni klabu inayoamini kwamba tayari ipo peponi, wakati ukweli ni

kwamba hata hapa duniani tu haipo pazuri.

Akili ya shabiki wa yanga inaamini kwamba wao wana timu bora kabisa

inayoweza kuifunga Simba na kutwaa ubingwa wa Tanzania. Kutolewa hatua

ya kwanza katika kombe la shirikisho siyo aibu kwake kama ilivyo aibu

ya kufungwa na Simba.

Shabiki huyu imani yake ipo kwa Jaja, Okwi, Kiiza, Niyonzima, Twite na

majina mengine makubwa katika klabu.

Akili ya Maximo inalenga kutengeneza timu imara kwa kufuata misingi

sahihi. Timu yenye mchanganyiko wa damu changa na zilizopo ili Yanga

na taifa zima wafaidike. Hii ndio maana hasa ya klabu. Klabu yoyote

yenye kocha mwenye akili timamu ya soka huundwa hivi.

Akili ya shabiki wa Yanga inaamini benchi limewekwa kwa ajili ya Jerry

Tegete kukaa akimtazama Kiiza akicheza.

Siku Kiiza akiondoka tumlete Alan Wanga kwa mamilioni ya pesa aendelee

kutazamwa na Tegete.

Lakini akili ya Maximo yenyewe inaamini Tegete ameongezeka uzito tu na

atakuwa katika kiwango chake hivi karibuni.

Maximo haamini kwamba kuna pepo bila kufa kama tunavyoamini sisi. Yeye

bado ana mawazo kwamba Yanga inapaswa kutengeneza akina Tegete wengine

na akina Niyonzima wake. Na kama inawatamania akina Kipre Tchetche

basi iwatengeneze, wakiwa wengi iwauze pengine.

Hapa ndipo ninapopata shaka kwa sababu huu siyo utamaduni wa Yanga.

Kukuza vipaji na kuvitumia ni utamaduni wa Maximo lakini siyo

utamaduni wa Yanga.

Yanga haina muda wa kukuza vipaji kwa sababu kukuza vipaji hakuhitaji

mbwembwe. Yanga ina viongozi wenye mikogo. Hata Maximo mwenyewe

hawakumleta kwa sababu nyingine zaidi ya mbwembwe na mikogo ya pesa

zao.

Jambo kubwa na la maana kwao hivi sasa siyo kuibua kipaji pale

jangwani, wao wanatamani zaidi kumsajili Amisi Tambwe kutoka Simba,

hata kama hahitajiki ili tu wamvalishe jezi yao, wazunguke nae mji

mzima kisha watambe kwamba wao ni zaidi.

Walau Simba imewatoa akina Jonas Mkude.

Walau Azam imetufanya tumjue John Bocco, lakini Yanga haina utaratibu

huu, kama ulikuwepo basi ilikua enzi ya akina Keneth Mkapa na siyo

sasa..

Tayari nimemsikia Maximo akisema kwamba ana vijana wengi

wanaofundishwa na Salvatory Edward na Shadrack Nsajigwa na baadhi yao

atawajumuisha katika kikosi chake.

Nililitegemea hili kabla hata hajasema kwasababu hivi ndivyo alivyo Maximo.

Sasa naangalia zangu muvi tu mpaka ligi kuu ya Vodacom itakapoanza.

Najua kuna siku tu Kiiza au Okwi watachelewa kurejea klabuni kutoka

kwao Uganda. Najua Maximo ni aidha atawasimamisha au atawafukuza

kabisa lakini hatawapanga katika mchezo unaofuata.

Na katika hii mechi ndipo ambapo Maximo atawatumia vijana wake.

Naomba sana mechi hii iwe dhidi ya Simba halafu Yanga ishinde. Lakini

ikifungwa, kitakachotokea mtanipigia simu. Namba yangu ni 0766399341.

Richard Leonce Chardboy. SHAFFIHDAUDA