Tume ya Utangazaji yazionya redio, televisheni

Tume ya Utangazaji Zanzibar, imetoa onyo kwa wamiliki wa vyombo vya habari ikivitaka kutokimbilia kutangaza matokeo ya uchaguzi kabla ya kutolewa rasmi na Tume ya Uchaguzi Zanzibar (ZEC).

Katibu Mtendaji wa Tume hiyo, Chande Omar alitoa onyo hilo alipokuwa akizungumza na wamiliki wa vyombo vya habari katika mkutano wake uliofanyika Wizara ya Habari, akikumbusha kosa lililofanyika katika Uchaguzi Mkuu wa Oktoba 25 mwaka jana na chombo kimoja cha habari kufungiwa kwa kutangaza matokeo kabla ya wakati.

Aliwataka wamiliki na wahariri wa vyombo hivyo kuhakikisha wanafuata maadili ya uandishi wa habari na kuzingatia taratibu na sheria za nchi katika kutangaza na kuandika mambo yanayohusu uchaguzi.

Alisema iwapo chombo chochote cha habari kitakwenda kinyume na sheria na kutangaza matokeo ya uchaguzi, hakitovumiliwa, kitafungiwa na kutozwa faini.

“Chombo chochote cha habari kinapoomba usajili kinapewa sheria na kanuni ambazo ni mwongozo wa utendaji kazi, kwa hivyo kama kimekubaliana na mwongozo huo wakija wakakiuka, watakuwa wamevunja sheria na tume haitavumilia, kitafungwa na kitatozwa fidia,” alisema Omar.

Aliwataka waandishi wa habari kutumia kalamu zao kuwahabarisha wananchi ikiwamo kutopendelea upande mmoja katika kuripoti matukio ya uchaguzi na kuwataka wananchi kuendelea kudumisha amani na utulivu ili nchi ibaki salama.

Mkurugenzi wa Sahiba FM, Maalim Kassim Suleiman alisema walifungiwa kwa kosa hilo lakini walifunguliwa baadaye na wanaendelea kurusha matangazo kama kawaida.

“Hasara ilikuwa kwa wasikilizaji wetu wakati hatukuwepo hewani na hili ni tatizo kubwa, lakini tunaamini kasoro kama hizo hazitafanyika tena kwa kuwa lengo letu ni kufanya kazi kwa kufuata maadili na miongozo iliyo