UNAMPENDA, UNATAKA NDOA LAKINI HUJUI PA KUANZIA?-2

Asalaam aleikum msomaji wa safu hii nzuri, ni matumaini yangu kwamba uko poa, nakukaribisha tena kwenye uwanja huu mzuri tujadili kuhusu mambo mbalimbali yahusuyo mapenzi.
Wiki iliyopita tulianza kujadili mbinu zinazoweza kumvuta mwanamke au mwanaume unayempenda na hatimaye mkafikia hatua ya kuishi pamoja mkiwa kama mume na mke.

Nakushukuru wewe uliyetuma ujumbe nakueleza jinsi ulivyoguswa na mada hiyo au kutoa ushauri. Leo tunaendelea na sehemu ya pili na ya mwisho ya mada yetu. Narudia tena kukupa angalizo kwamba ninachokielekeza hapa ni kwa mtu ambaye kweli ana nia ya dhati ya kuingia kwenye ndoa.
Hatufundishani mbinu hizi ili kesho na keshokutwa uwe bingwa wa michepuko kwa sababu umeshajua mbinu zinazoweza kukufanya ukampata yule umpendaye kwa urahisi.

Niliishia kukuelezea nini unacho-takiwa kufanya baada ya kufanikiwa kujenga mawasiliano ya kawaida na yule umpendaye na hatimaye kumfikishia ujumbe uliopo ndani ya moyo wako. Tunaendelea kuanzia pale tulipoishia:

Endelea kuwasiliana naye kwa mambo ya kawaida huku ukimpima kama yale uliyomwambia kuhusu unavyojisikia ndani ya moyo wako anayachukuliaje. Kama naye amekupenda, utaanza kuona mabadiliko kuanzia meseji atakazokuwa anakutumia, namna anavyopokea simu yako na uchangamfu atakaokuwa anakuonesha.

Kama bado haoneshi dalili zozote za kuelewa hisia zako juu yake, basi jua hajavutiwa na wewe na ukiendelea kuzungumzia mambo ya mapenzi, huenda ukaanza kumboa. Naomba niweke wazi jambo moja; kuna baadhi ya watu ambao huwa ving’ang’anizi kiasi cha kugeuka na kuwa kero.
Kama naye ana dalili za kuvutiwa na wewe kimapenzi, endeleza mawasiliano naye, omba kukutana naye sehemu tulivu kama ufukweni au popote ambapo mtakuwa wawili na hapo utakuwa na nafasi nzuri ya kueleza kwa kina juu ya hisia zako.

Endapo atakubali kukutana na wewe, basi hiyo ni hatua nzuri sana kuonesha kwamba unaelekea kufanikiwa. Jambo la msingi ni kuanza kujiandaa kwa ajili ya kukutana naye kwa sababu mwonekano wako wa kwanza mbele ya macho yake ndiyo utakaompa sababu ya kukuchagua au kukukataa.
Kwanza anza kwa kufanya kitu ambacho huwa kinakufurahisha na kukuweka kwenye mudi nzuri kama kuimba, kucheza muziki, kufanya mazoezi au chochote unachokipenda sana.

Baada ya hapo, hakikisha nguo zako ni safi, jipulizie manukato mazuri, piga mswaki, jitengeneze nywele zako vizuri na hakikisha kila kitu mwilini mwako ni kisafi. Pangilia mazungumzo kati yako na umpendaye kabla hata hamjakutana, hii itakuongezea kujiamini.

Hakikisha sehemu mnayoenda kukutania kwa mara ya kwanza unaifahamu vizuri na imetulia vya kutosha. Baada ya hapo, muandalie zawadi ndogo mfano chokleti, mkufu au ua zuri. Usihangaike kutafuta zawadi kubwa kwa sababu siyo muhimu mnapokutana kwa mara ya kwanza.

Muda utakapowadia, wahi kufika eneo mlilopanga kabla ya mwenzako, hii itamfanya akuheshimu zaidi kwa sababu atajua hubahatishi mambo. Msalimie kwa uchangamfu kisha mkaribishe sehemu ya kukaa. Jitahidi kupunguza maneno mengi badala yake zungumza kwa staha na muda mwingi msikilize yeye. Muulize kinywaji au chakula anachokipenda kisha muagizie.

Kama wewe ni mwanaume, mkishamaliza kunywa au kula, lipa bili hata kama yeye anao uwezo wa kulipa. Ukweli ambao wengi hawaujui, wanawake wanapenda zaidi kuhudumiwa hata kama wana utajiri mkubwa kiasi gani.

Mkishamaliza, uwanja ni wako sasa wa kueleza hisia za ndani ya moyo wako. Zungumza kwa busara na kwa utulivu, huna haja ya kupaniki kwa sababu mpaka amekubali kukutana na wewe, tayari una asilimia kubwa ya kumpata hivyo punguza woga. Jitahidi kumtazama kwenye macho yake unapozungumza naye, hii itakuongezea ujasiri.

Naam! Baada ya hapo naamini utakuwa umeutua mzigo mzito uliokuwa nao, usimlazimishe kukupa majibu hapohapo endapo ataomba umpe muda. Baada ya hapo, tayari utakuwa umefanikiwa kumvuta kwako kwa asilimia tisini, ongeza ukaribu zaidi na utaona matokeo yake kwa sababu hataweza kukataa ombi lako na mwisho mtatimiza lengo lenu la kufunga ndoa na kuishi pamoja siku za mbele.

GPL