Kakobe atinga Uhamiaji kwa mahojiano

By Ibrahim Yamola, Mwananchi iyamola@mwananchi.co.tz

Askofu Mkuu wa Kanisa la Full Gospel Bible Fellowship (FGBF), Zachary Kakobe amewasili idara ya uhamiaji Mkoa wa Dar es Salaam.

Askofu Kakobe amewasili leo Aprili 9, 2018 saa 4:53 asubuhi katika idara hiyo kwa mahojiano akiwa ameambatana na watu wanne. Wawili wanawake na wawili wanaume.

Kiongozi huyo wa kiroho, hakuzungumza lolote na waandishi wa habari waliokuwapo eneo hilo.

Mmoja kati ya walioongozana na Askofu Kakobe alibeba mkoba.

Awali, ofisa uhamiaji Mkoa wa Dar es Salaam, Crispin Ngonyani alisema, "Tumemuita (Kakobe) kwa mahojiano; yanahusu nini hilo kama litahitajika tutawaeleza lakini kwa sasa tusubiri kwani hata kufika hajafika."

Amesema kwa mujibu wa sheria uhamiaji inaweza kumwita mtu yeyote.

“Hakuna tatizo, kwa hiyo wananchi wasiwe na hofu sisi tunatekeleza wajibu wetu," amesema.