JPM atimiza ahadi yake

Katibu wa Rais, Ngusa Samike, akimkabidhi Sheikh wa Wilaya ya Chamwino Sheikh Suleiman Matitu sehemu ya pesa za michango kwa ajili ya ujenzi wa Msikiti wa wilaya hiyo jana zilizotokana na harambee aliyoendesha Rais Dk. John Pombe Magufuli wakati wa uzinduzi wa Kanisa Katoliki Parokia ya Bikira Maria Imakulata Ikulu Chamwino Dodoma juzi.

Na Mwandishi Wetu – Dodoma

RAIS Dk John Magufuli jana, amewasilisha fedha za michango iliyotolewa wakati wa harambee ya kuchangia ujenzi wa msikiti wa Chamwino mkoani Dodoma.

Fedha hizo zimewasilishwa na Katibu wa Rais,Ngusa Samike kwa

Sheikh wa Wilaya ya Chamwino, Suleiman Abdallah Matitu muda mfupi baada ya Swala ya Adhuhuri.

Pamoja na kukabidhi fedha hizo, Rais Magufuli amewapongeza na kuwashukuru watu wote waliounga mkono na wanaoendelea kuunga mkono uchangiaji wa ujenzi wa msikiti mpya na wa kisasa.

Rais Dk. Magufuli, alisema msikiti huo utajengwa na Jeshi la Kujenga

Taifa (JKT) na ujenzi wake utaanza wiki hii. Taarifa ya Ikulu haikueleza fedha zilizokabidhiwa ni kiasi gani.

Alisema watu mbalimbali wameguswa bila kujali madhehebu ya dini waliyonayo na huo ni udhibitisho wa umoja na mshikamano walionao Watanzania.