CHADEMA WALIA NA NAPE KUHUSU MADAI YAKE

CHAMA cha Demokrasia na Maendeleo (Chadema), kimempa siku saba Katibu wa Itikadi na Uenezi wa (CCM), Nape Nnauye akiombe radhi au wampeleke mahakamani kwa kusema uongo kuwa chama hicho kimekuwa kikiwachangisha fedha wananchi huku kikipokea mabilioni ya fedha kutoka kwa wafadhili nje ya nchi.

Chama hicho kimesema kuwa kama kitampeleka mahakamani atatakiwa kulipa fidia ya Sh3 bilioni kama fidia ya kukifedhehesha kwa tuhuma alizozitoa.

Agosti 11, mwaka huu jijini Dar es Salaam Chadema ilifanya harambee ya kuchangia chama hicho ili kununulia magari na helkopta kwa ajili ya shughuli za chama na kushirikisha wanachama na wafuasi wa chama ambao walikichangia zaidi ya Sh270 milioni.


Siku moja baada ya harambee hiyo, Nnauye aliitisha mkutano wa waaandishi wa habari na kusema,  CCM imeshangazwa kuona Chadema ikiwahadaa Watanzania  kufanya haramee ili kuhalalisha fedha walizonazo kutoka kwa wafadhili.

“Chama Cha Mapinduzi kimeshangazwa na kusikitishwa sana na usanii mkubwa unaofanywa na Chadema kwa kuwahadaa Watanzania kwa usanii wa kufanya harambee kuhalalisha uwepo wa mabilioni waliyopewa na wafadhili wao wa nje ya nchi,” alisema Nape.

Hata hivyo, jana Nnauye alipotafutwa kutolea ufafanua kama amepokea barua hiyo ya Chadema alisema atatoa majibu leo.

“Andikeni  kwanza mlichonacho then (kisha) mie kesho (leo) nitawajibu Chadema,” alisema Nnauye katika ujumbe wa simu wa maandishi.

Mkurugenzi wa Habari na Uenezi wa Chadema, John Mnyika akizungumza na waandishi wa habari jijini Dar es Salaam jana alisema chama kimeanza kuchukua hatua za kisheria dhidi ya msemaji huyo wa CCM kwa ‘madai ya uzushi na uongo’ aliyoyatoa Agosti 12, mwaka huu.

Mnyika ambaye pia ni Mbuge wa Ubungo, alisema Bodi ya Wadhamini wa Chadema iliagiza wanasheria wamwandikie barua Nnauye kumtaka kukiomba radhi chama hicho kwa kutumia njia ile ile aliyotumia kufanya ‘propaganda chafu za kukikashifu kwa umma wa Watanzania’.

“Tayari chama kimemwandikia  barua ya kisheria Nape tangu Agosti 24 mwaka huu ya kumtaka aombe radhi na kulipa fidia ya Sh 3 bilioni kwani uongo ni gharama” alisema Mnyika na kuongeza;

"Nape kusema kuwa upo uwezekano wa Chadema kupewa fedha hizo kwa mikataba yenye masharti ya kuiweka nchi rehani ni propaganda ya kukichafua chama kwa wananchi wake," Alisema Mnyika

Mnyika alisema matamshi yake yalitangazwa na vyombo vya habari vya kielekroniki ikiwemo vituo vya television, redio na kusambazwa kwenye mitandao ya kijamii hivyo inambidi kutuomba radhi kwa njia ile ile aliyoitumia kututuhumu.

“Kama atashindwa kutekeleza yote mawili kwa siku saba tulizompatia basi tutafuata sheria ikiwemo kumfikisha Mahakama Kuu ili aweze kuchukuliwa hatua zaidi,” alisema na kuongeza;

"Kipaumbele cha Chadema katika suala hili ni kuombwa radhi, hata hivyo kiwango cha fidia ya fedha kwa fedheha kilichotakiwa ni fundisho kuwa uzushi na uongo unagharimu."

Mnyika ametoa wito kwa Mwenyekiti wa CCM ambaye ni Rais wa Tanzania, Jakaya Kikwete kueleza Watanzania iwapo propaganda hizo chafu zina baraka zake kwa kuwa hakuna alichosema mpaka sasa.