Miili ya wanajeshi JWTZ yawasili toka Darfur

Miili mitatu ya wanajeshi wa Jeshi la Wananchi wa Tanzania (JWTZ), waliokuwa katika misheni ya kulinda amani katika jimbo la Darfur nchini Sudani, imeshawasili nchini.

Miili hiyo kutoka nchini humo iliwasili jana majira ya saa 4 asubuhi katika Uwanja wa Ndege wa Kimataifa wa Mwalimu Julius Nyerere, jijini Dar es Salaam.

Akizungumza jana jijini Dar es Salaam, mhariri mkuu wa jarida la Ulinzi, linalochapishwa na JWTZ, Kanali Kapambala Mgawe, alisema kuwa     baada ya kuwasili miili hiyo itapelekwa katika kambi ya jeshi Lugalo kwa ajili ya maandalizi ya kuiaga kwenda vijijini kwao leo kulingana na taratibu zitakavyowekwa.

Kanali Mgawe aliyataja majina ya marehemu hao kuwa ni Sajinitaji Julius Chacha Marasi, kutoka Shule ya Mafunzo ya Infantilia (SMI) iliyopo Arusha; Koplo Yusuph Said Chingwile kutoka kikosi cha Lugalo na Praiveti Anthony Danieli Paulo kutoka kikosi cha Lugalo.

Kwa mujibu wa Mgawe, wanajeshi hao na wenzao wanane wakiwa katika shughuli za kulinda amani katika jimbo la Darfur, nchini Sudani, wakiwa wamepanda  gari linalojulikana kwa jina la Armould Personel Carrier (APC), maalumu kwa shughuli za kijeshi, ghafla wakakumbwa na mto mkubwa wa msimu uliokuwa umefurika ghafla.


“Kulikuwa na APC mbili, moja ikapita, wakati hii ya pili iko kwenye uwanda huo, ghafla mto ukafurika na kulipindua gari lao lililokuwa na wanajeshi nane na kisha kuzolewa. Kulikuwa na mvua inanyesha…kulingana na baadhi ya maeneo katika jimbo hilo, barabara zinazotumika ndio mito ya msimu inapita, ambapo ghafla wakashangaa mto umefurika na kuwazoa,” alifafanua.

Alisema kuwa baada ya kutokea ajali hiyo, maiti mbili zilipatikana siku hiyo hiyo zikiwa zimetupwa umbali wa meta 200, na moja ilipatikana baada ya siku tatu ikiwa imeharibibika vibaya.
 CHANZO NIPASHE