MIMBA NI KIGEZO CHA KUOANA?-4

IMEKUWA vyema kwako kupata nafasi ya kuchota elimu hii hapa kwenye ukurasa wa marafiki wa All About Love. Wewe ni mwerevu kwa kuchagua gazeti hili ambalo limejaza vitu vingi vyenye kuelimisha na kuburudisha.

Nakwenda kumalizia mada yetu iliyodumu hapa kwa majuma manne mfululizo. Imekuwa mada ndefu lakini yenye mafunzo makubwa katika maisha yetu ya kila siku.

Tumejifunza mengi kuhusu mambo ya kuzingatia pindi marafiki wanapojikuta wameangukia katika mimba ambayo hawakuitarajia.Wiki iliyopita nilieleza japo kwa kifupi sana kuhusu uamuzi mwingine ambao hujitokeza kwa wasichana baada ya kupata mimba zisizotarajiwa. Wapo wanaowaza kutoa au kushawishiwa na wenzi wao kufanya hivyo.

Wiki iliyopita nilieleza japo kwa kifupi sana kuhusu uamuzi mwingine ambao hujitokeza kwa wasichana baada ya kupata mimba zisizotarajiwa. Wapo wanaowaza kutoa au kushawishiwa na wenzi wao kufanya hivyo.
Hapa ndipo nitakapoanza napo. Rafiki zangu, asikudanganye mtu kutoa mimba kuna athari nyingi - za moja kwa moja na za ndani kwa ndani zinazoweza kusababisha uchungu katika maisha yako. Twende tukaone...

ATHARI ZA KUTOA MIMBA
Kwanza ni kosa la jinai. Haikubakili kisheria isipokuwa kama daktari ameshauri kufanya hivyo kwa lengo la kuokoa maisha ya mama. Ukiachana na hilo zipo athari ambazo mwanamke anaweza kuzipata kwa kufanya kitendo hicho.
Wataalamu wamethibitisha kwamba, mimba inapoingia katika mji wa uzazi inapaswa kukaa hapo kwa kipindi cha wiki 36 – 37 ndipo kiumbe kitoke; kukitoa kabla ya muda huathiri mfumo wa uzazi kwa ujumla hasa kama daktari aliyefanya hatasafisha mji wa uzazi vizuri.

Kwa kawaida, kwa kuwa tendo lenyewe si halali, madaktari wengi wanaofanya vitendo hivyo, hufanya kwa harakaharaka kwa lengo la kujipatia fedha na si rahisi kufuatilia kwa undani na usahihi.
Kutokana na kosa hilo, mwanamke anaweza kupoteza damu nyingi na kupata maambukizi au kutoboka mfuko wa uzazi au maumivu makali ya tumbo. Uharibifu wa kizazi ukiwa mkubwa na tatizo likacheleweshwa kufikishwa hospitalini, kuna na hatari ya kuondolewa kabisa kizazi!

Mwanamke anayetoa mimba hupoteza mvuto (mwonekano) wake wa asili baada ya kutoa mimba – kwa sababu alikuwa na kiumbe kilichotakiwa kuzaliwa na yeye kukikatishia maisha, chakula cha mtoto (maziwa) kilikuwa tayari kuanza kuzalishwa, lakini kwa sababu kiumbe kitakuwa hakipo, mfumo mzima wa utengenezaji wa chakula hicho na mwili kwa ujumla wake huharibika.

Mwanamke ambaye ametoa mimba nyingi hasa zaidi ya tatu, anakuwa kwenye hatari ya kupata tatizo la mimba kutoka hapo baadaye. Pia kuna tatizo la kufedheheka kisaikolojia. Mwanamke aliyetoa mimba hujihisi mkosaji na mara nyingi hukumbuka kwamba, kama asingetoa mimba angekuwa na mtoto.
Hili hujitokeza zaidi ikiwa baadaye atapata tatizo la kutoshika mimba au kupata halafu zinatoka kabla ya kujifungua.

KWANINI YOTE HAYO?
Una sababu gani ya kujiingiza kwenye hatihati ya madhara makubwa kama hayo? Kwanini utoe kiumbe ambacho pengine umepangiwa hicho pekee katika maisha yako yote?
Kwanini ujiweke kwenye hatari ya kukosa mimba nyingine? Mimba kutoka hovyo na kutolewa kizazi? Kwanini yote hayo? Kipo kitu cha kufanya ili yote hayo yasikukute. Tuendelee kujifunza marafiki zangu.

USIDANGANYIKE
Kuna rafiki yetu mmoja alinipigia simu na kuniuliza: “Kaka Shaluwa nina mchumba wangu lakini amesema mpaka nishike mimba ndipo anioe. Unaonaje, nikubali?”

Unaonaje swali hilo? Inawezekana na wewe uko katika wakati mgumu kama huo na hujui cha kufanya, usijali upo mwongozo. Ndugu zangu, acha kudanganyika. Hakuna majaribio ya namna hiyo. Acha kucheza na maisha yako.

Kama anakupenda hawezi kuwa na haraka eti ya upate mimba kwanza ndipo akuoe! Unajuaje moyoni mwake kuna nini? Vipi akibadilisha mawazo? Kuna vipimo vya kuangalia uwezo wa mwanamke/mwanaume kushika au kusababisha mimba. Mnaweza kutumia kipimo hicho.

Asitokee mtu akakudanganya ukakubali kufanyiwa majaribio. Maisha yako yana thamani sana. Amka, zinduka usingizini, toa matongotongo na unawe uso wako!

FUATA USHAURI HUU
Ni vyema kujizuia kufanya ngono kabla ya ndoa. Kwa bahati mbaya vijana wengi wa siku hizi hawawezi. Sawa...kwa sababu tayari umeshaingia kwenye mapenzi ni lazima ucheze salama na uwe makini ili usije kuingia kwenye matatizo baada ya kupata mimba kwa ‘bahati’ mbaya

Njia bora na salama zaidi ya kuzuia kupata mimba ni matumizi ya kondom. Ikiwa mnaaminiana kiasi cha kutosha kwa maana ya kwamba tayari mmeshajuana afya zenu na pengine kwa matakwa yenu wenyewe hamtaki kutumia kinga hiyo, suala la kuangalia kalenda litamhusu sana mwanamke.

Upo utaratibu rahisi wa kujua siku zilizo salama na zile zenye hatari ya kupata mimba. Sasa hapo si lazima niandike kila kitu gazetini, uliza kwa wataalamu walio karibu nawe wakusaidie. Msichana usikubali maisha yako yaharibike kwa kupata mimba isiyotarajiwa.

Kumbuka kwamba, uamuzi wa kupata au kutopata mimba uko mikononi mwako mwenyewe. Kusoma maandishi haya ni kitu kimoja, kuyashika na kuyafuata ni jambo jingine lenye maana zaidi, AHSANTE SANA!!!