CCM TAWI LA CALIFORNIA LATOA MAELEZO YA KINA KUHUSU UMUHIMU WA URAIA PACHA

CCM CALIFORNIA YATOA  MAELEZO YA KINA KUHUSU UMUHIMU WA URAIA PACHA KATIKA HARAKATI ZA KULISUKUMA SUALA HILI LIPITISHWE KATIKA BUNGE LA KATIBA

Kutokana na juhudi za Chama chetu na serikali yetu kuona umuhimu wa kutusikiliza sisi tunaoishi nje ya nchi, na pia tume ya katiba kusikiliza ombi la chama chetu kulirudisha hili suala katika rasimu ya pili ya katiba; ni kwa njia hiyo basi tumelazimika kulitolea ufafanuzi katika njia halali za kutoa ushawishi kwa waheshimiwa wabunge wa katiba kulielewa hili suala lenye umuhimu sana katika nchi yetu na watu wake katika nyanja mbalimbali.

Juu ya hilo, pia tuko pamoja na Rais wetu ambaye pia ni mwenyekiti wetu wa chama cha Mapinduzi taifa Mheshimiwa Jakaya Mrisho Kikwete ambaye ameendelea kuonyesha wazi nia ya kutuunga mkono katika hili, pamoja na waziri wetu wa mambo ya nje Mheshimiwa Bernad Membe. Na vile Mheshimiwa Mwiguru Nchemba Mb, Naibu Katibu Mkuu w CCM Bara, pia Naibu  Waziri wa fedha, amesisitizia suala la uraia pacha juzi tu kwenye sherehe za Muungano hapo Washington DC kuwa lina manufaa kwetu tulio na uraia wa nchi za nje na kwamba Serikali ya CCM imelirudisha kwenye rasimu ili lifanyiwe kazi. Hivyo tuungane na juhudi za viongozi wakuu wetu hawa kufanikisha zoezi hili.

Tunaomba wabunge wetu waCCM na wawakilishi wengine wote mtusikilize na mtuunge mkono kwa niaba ya Watanzania wote waishio nje ya nchi na wenye uraia wanchi nyingine.

Tunayo machache ya kuelezea nia yetu nzuri ya kudai uraia wanchi mbili, yako mengi mno lakini tuyaeleze machache hapa ili mpate mwanga mzuri wa kuona tuliposimamia katika kulidai hili. Tuna matumaini makubwa sana mtakubaliana na sisi na kulipitisha hili pindi mjadala uhusuyo hili jambo utakapowadia. Na pia mkisaidiana na mwakilishi wetu aliyeko huko Ndugu Kadari Singo katika kupata maelezo zaidi ya suala hili.

1. 1. Uzalendo:Kuna Watanzania wengi tunaoishi nje ya nchi ambao ni tegemeo kwa nchi yetu.

·  Sisi Watanzania hatujaikimbia nchi wala kuikana nchi yetu. Bali tulikuja kwa nia nzuri kabisa na tunajivunia Utanzania wetu katika nyanja na nia ya kujiendeleza. Hivyo tunaona ni haki yetu kubakia kuwa raia wa kuzaliwa wa nchi yetu.

·       Watanzania hawa ni nguvu kazi na wenye mapenzi sana na nchi yao, wanajivunia nchi yao kwa kuzaliwa. Suala la kuomba uraia katika nchi nyingine halikuja vichwani mwetu kwa ajili ya kuukana Utanzania wetu, La hasha! Suala hili  limetokana na mazingira ya nchi za ugenini. Ambapo usipokuwa na uraia wanchi hizi ni ngumu kupata kazi, elimu yenye gharama nafuu, na hata uwezo wa kwenda nyumbani Tanzania kusalimia familia na ndugu zetu au kuwekeza na kurudi tena katika nchi husika.

·         Watanzania tunataabika  kupoteza uraia wa kuzaliwa kwasababu tu tumebahatika kupata uraia wanchi nyingine ili kuweza kupata elimu katika fani mbalimbali, mfano katika huduma za kiafya, serikalini, viwandani, mashuleni na sehemu nyingine nyingi ikiwemo kazi za kijiajiri ili kufanya kazi katika mataifa tunayoishi ili kujipatia kipato kizuri na kusaidia familia zatu, ndugu na marafiki walioko huko nyumbani. Hakuna ubaya wowote wa kufanya hivyo.

Tunadhani ni harakati nzuri za kujikomboa kutoka kwenye janga la umaskini kama tutasaidia ndugu zetu walioko nyumbani  lakini zaidi tukipewa haki yetu ya kuzaliwa katika kutimiza hayo. 

1. 2  Uchumi:  Tukiruhusiwa kupata uraia wa nchi mbili tutakuwa nguzo kubwa katika kusukuma gurudumu la maendeleo huko nyumbani kusaidiana na juhudi za serikali katika kutekeleza na kuhamasisha maendeleo kwa njia mbalimbali za kisasa zilizojaa sayansi na teknologia. Tujue wazi na tukubali kuwa kwa wale waliobahatika kupata elimu zao katika nyanja mbalimbali kutoka vyuo, shule na mashirika mbalimbali ya huku nje ni wazi kwamba utaona ufahamu wako unavyoweza kurutubisha chachu ya maendeleo.

Tunaomba tusihukumiwe na maneno haya kwamba labda tunadharau elimu inayotolewa na nchi yetu; la hasha ila ni ukweli usiopingika kwamba nchi tajiri zina faida zake katika kutoa elimu inayoendana na wakati wa sasa. Nchi yetu bado maskini na inahitaji mchanganyiko wa mawazo tofauti kutoka watu wenye taaluma mbalimbali ukiunganisha na za hawa tulioko huku nje kuweza kuchangia  na kufanya kazi katika sehemu mbalimbali nchini kwetu. Kwamfano:

I)             Utaalamu katika vitengo mbalimbali kama vile:

·         Afya:

Katika kitengo hiki cha afya tunaongelea wauguzi, madaktari, wanaradiolojia, wataalamu wa maabara, wachunguzi na mambo menginemengi katika kitengo hiki. Mojawapo ya faida kubwa sana inayoweza kuletwa na Watanzania walioko nje na kuwa raia wa nchi za nje ni kutumia utaalamu wao walioupata nje kuendeleza vituo vya afya zikiwemo zahanati na hospitali kubwa. Tunafahamu kuwa mojawapo ya vitu vinavyoturudisha nyuma ni suala la afya za wananchi. Mwananchi anafika hospitali anakosa huduma inayomstahili aidha kwa sababu ya uchache wa watoa huduma, uchelewashaji wahuduma,ukosefu wa madawa au ubora wahuduma. Suala la afya katika nchi hizi zilizoendelea zimepewa kipaumbele sana na kwa wale Watanzania waliobahatika kupata elimu naujuzi nakutumikia katika hospitali za nchi hizi wamepata upeo mkubwa sana wa jinsi ya kuwahudumia wagonjwa. Ni masikitiko makubwa kukosa nafasi ya kuja kuchangia katika nchizao  katika nyanja hiyo. Ukitaka kufanya hivyo inakuwa ni mkataba kama mtu asiye Mtanzania wakati unafanya kazi katika nchi yako na unawahudumia watu wako wakiwemo ndugu zako. Katika akili ya kifikra jambo hilo linatesa sana.

·         Teknologia za kisasa:

Kuna wahandisi( engineers) katika nyanja mbalimbali, kwenye computer,  umeme na nishati, ujenzi, utengenezaji zana mbalimbali na mengine mengi. Kuna Watanzania wengi wako nje ya nchi na wamebobea katika fani hizo na wako tayari kurudi nyumbani kufanya kazi katika nchi yao na kusaidia nchi yao katika kile walichokipata huku, lakini sharti hili la kutunyima uraia linatuzuia kutumiza ndoto hiyo.

·         Elimu dunia :

Masuala kama kuheshimu utu wa mtu na kuujali, heshima za kazi, haki za kila mtu bila kujali chochote, ustaarabu, na mengine, wazungu wanaita customer service, au upande wa hospitalini wanaita patient care, haya ni mambo ambayo Mtanzania anayeishi nje amefanikiwa sana kuyajua na ni masuala muhimu ambayo yanaweza kurekebisha hali iliyopo nchini kwetu katika tatizo hili ambalo limedondosha uchumi wetu kwa asilimia kubwa kutokana na wafanyakazi katika vitengo mbalimbali kutokuwa makini, heshima na ustaarabu katika kazi zao, kitu ambacho kinasababisha vyanzo vya rushwa. Tuna imani Mtanzania aliyesukwa katika mazingira mazuri ya ugenini huku, akipewa nafasi ya uraia wake na kuwezeshwa basi hiyo hali itaimarika kwa kiasi kikubwa

·         Taaluma ya Elimu:

Watanzania wengine waishio nje na wenye uraia wa nje ni wajuzi wa katika suala la ufundishaji. Wapo wengi sana na wenye ujuzi tofauti wenye vipaji  na elimu ya kutosha katika suala la kuelimisha jamii na watu wetu. Kuna wengi kuanzia ngazi mbalimbali za ufundishaji, kuna walimu wa watoto (kindergarten) kuna walimu wazuri tu wa shule za msingi na sekondari mpaka vyuo vya kati na vyuo vikuu wenye elimu ya kutosha. Hawa wakipewa nafasi ya kutoa mchango wao wa taaluma ya ufundishaji katika nchi yetu, itakuwa ni jambo la busara sana.

Katika kitengo cha Elimu tutakuwa tumefanikiwa sana hasa kuhusishwa utaalamu wa Watanzania wengine ambao wameupata kutoka huku. Wengine wako tayari kuanzisha hata mashule yao. Tunaomba tuwatimizie ndoto zao hizi za kuliendeleza taifa letu, na wenye kujiona wamechangia katika kuleta maendeleo katika nchi yetu.

II)           Mikopo:

Tunaona sasa hivi mashirika ya kifedha yanavyowezesha kutoa mikopo mizuri tu kwa Watanzania na kuweka mazingira mazuri ya kurudisha mikopo. Maendeleo ya walio wengi nchini kwa sasa yanaletwa na sheria zilizowekwa kwa kuruhusu mabenki kukopesha watu ili kuanzisha vyanzo vya mapato yao, kujenga nyumba za kuishi, kusomesha watoto wao na mengine mengi. Watanzania tulioko nje tumenyimwa  nafasi hizo kwani hatuwezi kuwezeshwa mikopo wakati tuko katika nafasi nzuri ya kukopa na kurudisha kutokana na masharti ya benki. Shida kubwa ni kwamba hatuko pale kimwili hivyo hata ukitaka kutimiza matakwa ya kibenki inakuwa ngumu kwamba lazima uwe na mali isiyohamishika na vile vile niwepo pale kimwili kama raia. Sasa nitayafanyaje hayo nikiwa sio raia? Maana hata kujenga au kumiliki ardhi, ndio tunajenga, au tunamiliki tukiwa huku kwa kutumia ndugu zetu lakini tukiingilia vipengele vingine vya ndani na tukagundulika tumejenga na huku hatuko raia tunaogopa na nyumba hizo tutanyang’anywa au biashara tutafungiwa au tutawekewa masharti magumu mfano riba, tax na mambo mengine ambayo yanatuweka katika wakati mgumu kujitoa wazi na mali zetu huko nyumbani ili tupate mikopo hiyo.

Tukifunguliwa mlango wa uraia pacha hii haitakuwa shida tena, tutakuwa wa wazi, tutapata uhuru wa kukopa na kufanya mambo makubwa ya kimaendeleo ikiwa ni kuwezesha na ndugu zetu huko na familia zetu huko.  Ni ukweli usiopingika kuwa uwezekaji umepamba moto katika kuleta maendeleo ya haraka. Mwekezaji mwenye uraia wa kuzaliwa wa Tanzania ana masharti nafuu katika kuwekeza kwani ni Mtanzania, lakini Mtanzania aliye na uraia wa nje ya nchi naye pia anauganishwa kama mtu mgeni anayetaka kuwekeza katika nchi yake ya kuzaliwa. Si haki kabisa na hili suala limetunyima maendeleo. Kuna Watanzania wengi waishio nje ya nchi ambao sasa wana uraia wa nchi za ugenini  wenye nia nzuri ya kuwekeza nyumbani, na wana uwezo wao mkubwa wa kuwekeza, na wengine wana uwezo wa kati wa kuwekeza lakini katika hali hii tuliyomo ya kutokuwa na uraia pacha, inatiwa wasiwasi kuwekeza pesa zao nchini kwetu, wanazifungia mabenki tu na kufanya biashara ndongondogo za nchi wanazoishi.

 Hizi nchi za huku zimeishaendelea, sasakwa  nini sisi Watanzania tuendelee kuwekekeza huku na kuziendeleza hizi nchi wakati huko kwetu tunahitajika na uwezo tunao, wakuwekeza huko kwetu kama Watanzania wa kuzaliwa? Tunaomba tuwekeeni mazingira  nafuu kwa kutupatia uraia pacha ili ndoto hizi zitimilike.

III)          Mipakani na viwanja vya ndege.

Kuna mengi hapa ya kuorodhesha, lakini machache haya kuanzia yanaweza kutupa mwanga halisi, machache tu ya ziada ni mihamgaiko ya njia za kuingia nchini mwetu, viwanja vya ndege, bandari, mipakani, gharama kubwa anazolipishwa mgeni ambaye si raia wa Tanzania. Sasa hata sisi Watanzania wa kuzaliwa ambaotumechukua uraia wa ugenini hizi gharama zinatusulubu; Tunadhani huu ni unyanyasaji na uzalilishaji wa hali ya juu ukizingatia haki ya mzawa.

IV)         Suala jingine ni kuhusu vizazi vijavyo.

Watanzania wenye uraia wanchi nyingine wana watoto waliozaliwa nje ya nchi. Hii nayo kwa utaratibu wa sasa ni kwamba watoto hawa hawawezi kuwa raia wa Tanzania kwa misingi hiyo hiyo kwamba wazazi wao si raia wa Tanzania, ingawa ni wazawa wa Tanzania, lakini sheria zinakataa kuwapa uraia.

Tuna mategemeo makubwa sana kwa watoto wetu kujua historia zao, vyanzo vya familia zao, upendo wa nchi yao ambayo wazazi wao wamezaliwa. Hili ni tegemeo kubwa la mbeleni pindi wanapofika umri wa kutambua na kujitegemea, daima hawataiona Tanzania kama nchi ya kigeni, bali wataiona Tanzania kama nchi yao.

Sasa hivi tunapata vigugumizi na aibu kuwaeleza watoto wetu kwetu ni wapi tulikozaliwa, maana tunawaambia sisi ni sio raia wa Tanzania lakini tulizaliwa kule, ila sisi ni raia wa hapa lakini hatukuzaliwa hapa. Watoto wanatuona sisi wazazi kama vile wakimbizi tuliokimbia nchi yetu.

Watoto ndio vijana wa kesho na ndio wazee wetu wa kesho pia. Tunawahitaji katika kuijua misingi ya nchi yetu, na katika kuchangia maendeleo ya nchi yetu huko baadae.

Hali ilivyo sasa hivi ni kama wanabaguliwa kwa dhambi ile ile ya wazazi kuwa raia wananchi nyingine hivyo kuondolewa sifa ya uzawa ndani ya nchi yao ya Tanzania.

Tunarudia kusema na kuomba sana wajumbe wote waheshimiwa wabunge wa bunge la  katiba, mlione hili suala kama suala la kitaifa na si la kisiasa. Tunasikia mengi pia kutoka kwa wachache kuwa nia yetu ni kuja kuchukua nafasi zao za kazi sio kuendeleza nchi. Tunataka kuliweka wazi kabisa kwamba nia yetu ni njema. Sisi ni wazawa tunataka kushiriki katika maendeleo ya nchi kama wazawa wengine. Ikitokea tukasidia sehemu fulani na juhudi zetu zikatambuliwa na kuonekana, je hili swali kwamba tunakataka kuchukua nafasi za wengine bado litaulizwa?. Tuna imani pia kuwa wale wenye woga wa kuturuhusu basi hawaitendei  mema serikali yetu, maana wanainyima nafasi kubwa ya kuwezesha mchakato wa maendeleo ambao uko wazi na hauna gharama.

Tuna hakika pia kuwa wapo wengi miongoni mwa wabunge ambao wanaona hili suala kuwa na umuhimu. Wengine wameishi nchi za nje, wengine wamesomea nchi za nje, wengine wametembea nchi za nje na kukutana na Watanzania wengi wenye moyo na nchi yao. Wengine wana familia zao nje, Wengine wana madaktari wao nje, na wengine wako Tanzania hapo lakini wana ufahamu mkubwa sana wa mapenzi walionao Watanzania waishio nje. Tukirudi nyumbani katika likizo zetu za kila mara tunaona wazi upendo walionao kwetu, na kuwa na sisi ni tegemezi kwa taifa letu.

Mara nyingi viongozi wakubwa wakitutembelea huku nje, katika nasaha zao huwa wanatuhamasisha kutosahau nyumbani, kuisaidia serikali kuleta maendeleo, kujenga nyumbani ili tuwe na mazingira mazuri ya kufikia na hata kuzikwa tukifa, kuitangaza nchi yetu kwa mazuri mengi iliyonayo.

Haya yote tunayafanya, lakini nusu nusu, tunayaweza kuyafanya kamili kama tukiwezeshwa uraia pacha.

Asanteni sana

KIDUMU CHAMA CHA MAPINDUZI

CCM-TAWI LA CALIFORNIA

KAMATI YA SIASA YA TAWI

Josephine Masabala-Mwenyekiti

Erick Byorwango-Katibu