TANZANIA YAJIVUNIA USHIRIKIANO WAKE NA UNICEF

 1. Bibi Anna Maembe, Katibu Mkuu, Wizara ya  Maendeleo ya Jamii, Jinsia na Watoto akizungumza katika Mkutano Maalum   kuhusu Maendeleo Endelevu katika Afrika: Mkazo ukiwa kwa Mtoto, uliofanyika siku ya kwanza ya  Mkutano wa Mwaka  wa Mfuko wa Umoja wa Mataifa unaohudumia Watoto ( UNICEF)  Katibu Mkuu  ambaye alikuwa miongoni mwa wageni kutoka mataifa mbalimbali walioalikwa  kuhudhuria mkutano huu  akimwakilisha Mhe.  Waziri Sophia Simba Mb)  aliungana na  wageni wengine  akiwamo  Malkia Sophia wa Uhispania, Mke wa Rais wa Bukina Faso Bibi Chantal Comapore, Mawaziri  na Mabalozi kuzungumzia  mafanikio na changamoto katika utoaji wa huduma za msingi zinazomhusu mtoto. 

2. Sehemu ya  wajumbe waliohudhuria mkutano maalum   Maendeleo Endelevu katika Afrika: Mkazo ukiwa kwa mtoto Mkutano huu maalum, ulitanguliwa na ule wa ufunguzi wa mkutano wa Mwaka wa UNICEF ambapo baadhi yha wazungumzaji   waligusia suala la  wasichana zaidi ya  200 waliotekwa na Kundi la Boko Haramu  nchini Nigeria wakitoa rai ya kutaka  kuachiwa  huru kwa  wasichana hao.
 3.  Asante sana, nashukuru sana.  Maneno  hayo ya kiswahili  yalizungumzwa na Bw.  Bogani C. Majora,  Msajili wa Mahakama ya  Kimataifa ya Mauaji ya Kimbari ya Rwanda ( ICTR)   aliyeshikana mkono na  Balozi Tuvako Manogi, wakati  Msajili  huyo alipofika siku ya  jumanne, katika Uwakilishi wa Kudumu wa Tanzania katika Umoja wa Mataifa na kufanya mazungumzo ambapo pamoja na  mambo mengine  ameishukuru   Jamhuri ya Muungano wa Tanzania kwa kuwa mwenyeji wa Mahakama hiyo ambayo  inaelekea  ukiongoni mwa utekelezaji wa majukumu yake ya msingi. Pamoja na  kwamba  ICTR inamaliza shughuli zake, Baraza Kuu la Usalama  la Umoja wa Mataifa limeipatia Tanzania  dhamana   ya ujenzi  wa kituo  kitakachosimamia    umaliziaji wa kesi za masalia pamoja na uhifadhi wa nyaraka na kumbukumbu zote muhimu za ICTR  majengo ya kituo hicho yatajendwa katika  eneo la LakiLaki  jijini Arusha  wa kwanza kushoto ni msaidizi wa Msajili na  wa   mwisho kulia ni Bi. Tully Mwaipopo Afisa wa Uwakilishi wa Kudumu.

Na Mwandishi Maalum

Ushirikiano  wa kimaendeleo baina  ya Jamhuri ya Muungano wa Tanzania na   Mfuko wa Umoja wa Mataifa    unaohudumiwa Watoto ( UNICEF) umefanikisha utekelezaji wa miradi mbalimbali inayolenga katika  utoaji huduma endelevu kwa watoto .

Kauli hiyo imetolewa  siku ya  jumanne na   Bibi. Anna Maembe, Katibu Mkuu, Wizara ya Maendeleo ya Jamii,  Jinsia na Watoto ,   anayeiwakilisha  Tanzania katika  mkutano wa Mwaka wa Bodi tendaji ya  UNICEF unaofanyika hapa  Makao  Makuu ya Umoja wa Mataifa 

Katika siku ya kwanza ya  Mkutano  huu viongozi  mbalimbali, akiwamo    Malkia Sophia wa Uhispania, Mke wa  Rais wa Bukina Faso, Bibi Chantal Compaore  Mawaziri,  Makatibu Wakuu na  Mabalozi walipata fursa ya kuchangia mawazo kuhusu mafanikio na changamoto  mbalimbali zinazomkabili  mtoto na nafasi ya UNICEF.

Pamoja na   kwamba  mkutano huu wa mwaka wa UNICEF unahusu zaidi kujadili taarifa za utendaji kazi wa Mfuko   mafanikio na changamoto zake. Rais wa Bodi   ambaye ni  Mwakilishi wa Jamhuri ya Kenya katika Umoja wa Mataifa kwa kushirikiana na Secretariet yake,  aliandaa mkutano maalum ambapo washiriki     wakiwamo wa kutoka Umoja wa Afrika ( AU) walipata fursa ya  kubadilishana  mawazo na uzoefu kuhusu Maendeleo endelevu katika Afrika, mkazo ukiwa kwa mtoto. 

Ni katika mkutano huo maalum, ambapo Katibu Mkuu Maembe  alipopewa fursa ya  kuzungumza kuhusu  Tanzania alisema.  Tanzania  imefanya mengi katika  kumuendeleza mtoto kiafya, kielimu  na utetezi wa haki zake za msingi.

Hata hivyo akaeleza kwamba juhudi hizo za serikali zimekuwa zikichangiwa na  UNICEF na wadau wengine wa maendeleo, huku akisisitiza kwamba serikali imekuwa na  ushirikiano mzuri na mfuko huo kiasi cha kujivunia. 

Akaitaja  baadhi ya miradi ambayo Serikali inatekeleza  kwa ushirikiana na  UNICEF na wadau wengine   kuwa  ni pamoja na  huduma za  utoaji  vyakula vyenye  virutubishe ili  kukabiliana na tatizo kubwa la utapia mlo,  utoaji wa madini joto,  vitamini, chanjo mbalimbali zikiwamo za kuzuia ugonjwa wa homa ya mapafu na kuharisha.

Aidha akasema misaada ya kiufudi na  kifedha inayotolewa na  Mfuko huo  ulifanikisha  kufanyika kwa utafiti kuhusu vitendo vya  kikatili dhidi ya watoto. Matokeo ya utafiti huo yalionyesha kuwa kuna vitendo vingi vya kikatili wanavyofanyiwa watoto, kiasi cha serikali  kufungua  vituo kwaajili ya kuwahudumua watoto dhidi ya udhalilishaji na ukatili na ambavyo vimefunguliwa karibu katika wilaya zote.

Katibu Mkuu akasema kuanzishwa kwa vituo hivyo kumeifanya serikali  kuongeza bajeti katika eneo hilo. Aidha pamoja na  utekelezaji wa miradi hiyo, akaongeza kwamba serikali pia imejitahidi sana katika eneo la upunguzaji wa  vifo vya watoto chini ya umri wa miaka mitano na fursa ya elimu  kwa watoto wa jinsia zote.

Katika eneo hilo la elimu  Katibu Mkuu amesema changamoto  kubwa ni mimba za utotoni  na ndoa za umri mdogo, maeneno ambayo yamekuwa tatizo  kubwa kwa wanafunzi wa kike na hivyo kushindwa kuendelea na masomo yao.

Akahitimisha kwa kuitaka UNICEF kuendelea kushirikiana na  Serikali hususani katika kipindi hiki cha kumalizia utekelezaji wa Malengo ya Maendeleo ya Millenia ( MDGs)  na  baada ya 2015 wakati ajenda mpya za Maendeleo Endelevu zitakapoanza kutekelezwa.

Rais wa UNICEF  Balozi Kamaku, akijumuisha majadilianyo hayo  ambapo  baadhi ya wazungumzaji waligusia pia suala la kutekwa kwa wasichana  zaidi ya 200 na kundi la Boko Haramu huko  Nigeria,  na kutoa wito wa kutaka waachiwe huru. alisema,  malengo mapya ya maendeleo endelevu baada ya  2015   lazima yajielekeze katika kuhakikisha kwamba changamoto zinazomkabili mtoto hususani katika Afrika,  kama vile magonjwa,  utapia mlo,  ukosefu wa chakula na mengineyo yanamalizwa na kuwa historia.

 Na kusisitiza kwamba haoni sababu ni kwa nini Afrika isiondokane na changamoto hizo na kwamba UNICEF inapashwa kuwa mstari wa mbele katika kuzipigania na kuzisemea changamoto hizo.