TUMEJITUMA TUKAVUTIWA WADAU WA MAENDELEO- WAZIRI OMAR YUSSUF MZEE

Mhe. OMAR Yussuf Mzee, Waziri wa Fedha, Serikali ya Mapinduzi Zanzibar akiongoea siku ya jumatatu kwa niaba ya Jamhuri ya Muungano wa Tanzania, wakati wa mkutano wa Kilele wa Baraza la Umoja wa Mataifa linalohusika na masuala ya Uchumi na Maendeleo ya Jamii ( ECOSOC). Mawaziri kutoka mataifa mbalimbali wapo hapa Umoja wa Mataifa kuhudhuria mkutano huo ambao unajadili utekelezaji wa malengo ya maendeleo ya millenia ( MDGs), changamoto zake, changamoto zinazoibuka, pamoja na mchakato wa maendeleo endelevu baada ya 2015.

Ujumbe uliofuatana na Mhe. Waziri ukifuatilia hotuba yake, kutoka kulia ni Muwakilishi wa Kudumu wa Tanzania katika Umoja wa Mataifa, Balozi Tuvako Manongi, Bi. Amina Shaaban, Katibu Mtendaji Tume ya Mipango Zanzibar, Naibu Muwakilishi wa Kudumu, Balozi Ramadhan Mwinyi na Bi. Bihindi Khatibu kutoka Zanzibar

Na Mwandishi Maalum, New   York

Zikiwa zimebakia siku 550 kufikia   hitimisho la  utekelezaji wa  Malengo ya  Maendeleo ya Millenia (MDGs),   Jamhuri ya Muungano wa Tanzania  imebainisha  kuwa, mafanikio yake katika utekelezaji wa malengo hayo  kumetokana na  kujituma kwa  serikali  ambako  kulivutia washirika wa maendeleo.

Waziri wa  Fedha katika Serikali ya Mapinduzi Zanzibar, Mhe. Omar Yussuf Mzee  ameyasema hayo  siku ya Jumatatu  hapa Makao  Makuu ya Umoja wa Mataifa, katika siku ya kwanza ya  Mkutano wa  Kilele wa Kisiasa  ambao umeandaliwa na Baraza la Umoja wa Mataifa linalohusika na  masuala ya  Uchumi na Maendeleo ya Jamii ( ECOSOC)

Katika Mkutano  huu na ambao ulifunguliwa na Katibu Mkuu wa Umoja wa Mataifa,  Ban Ki Moon,  kwa kuzindua   Ripoti Mpya  ya  mwaka 2014 kuhusu  utekelezaji wa MDGs,  Mawaziri  kutoka  mataifa mbalimbali, wanajadiliana na kubadilishana uzoefu katika  Mada Kuu  inayohusu changamoto  za utekelezaji wa MDGs, namna ya kukabiliana na changamoto  mpya  na suala zima la maendeleo endelevu baada ya 2015.

Ni katika kuchangia majadiliano hayo na akizungumza kwa niaba ya  Serikali ya Jamhuri ya Muungano wa Tanzania,  ndipo Waziri wa Fedha Omar Yussuf Mzee, alipoeleza uzoefu wa Tanzania katika  kuvutia washirika wa maendeleo baada ya kuwa imeonyesha njia.

“ Kujitoa  na kujituma kwa   serikali  yetu na viongozi wake kumeifanya Jamhuri ya Muungano wa Tanzania ipige hatua kubwa katika utekelezaji wa baadhi ya MDGs. Ukweli ni kuwa juhudi zetu wenyewe zilipata uungwaji mkubwa kutoka   kwa washirika wetu wa maendeleo,  na wadau mbalimbali  yakiwamo mashirika yasiyo ya kiserikali, ya kiraia na sekta binfasi”. akasema Waziri Mzee

Ameyataja  baadhi ya  malengo ambayo  yamepafa mafanikio  makubwa kutokana na ushirikiano huo  kuwa ni  lengo namba moja linalohusu elimu ya msingi kwa wote, lengo namba tatu kuhusu  usawa wa kijinsia, malengo yanayohusu afya na  mazingira. Ingawa pia alisema kama ilivyo  kwa nchi nyingine bado kuna changamoto za hapa na pale.

Akizungumzia kuhusu hifadhi ya mazingira kama  eneo moja la utekelezaji wa MDGs, Waziri  Omar Yussuf Mzee,  amesema,    Tanzania inatambua na kuheshimu hifadhi ya mazingira kama kiungo muhimu kwa maendeleo endelevu.

Akaongeza kwamba ni kwa kulitambua hilo,  ndiyo  maana Viongozi wa Afrika walimkabidhi  Rais wa Jamhuri ya Muungano wa Tanzania, Mhe. Jakaya Mrisho Kikwete dhamana ya  kuongoza Kamati ya Viongozi wa Kuu wa Nchi na Serikali kuhusu mabadiliko ya Tabia   Nchi ( CAHOSCC).

Aidha katika eneo hilo na  hifadhi ya mazingira na mabadiliko ya tabia nchi, Waziri ameitaka  Jumuiya ya Kimataifa  kujituma  katika kulishughulikia  eneo hilo na hususani  athari za mabadiliko  ya tabia nchi kwa nchi Ndogo  za Visiwa   ikiwamo  Zanzibar.

Akasisitiza kuwa katika eneo hilo la  mabadiliko ya  Tabia Nchi, Tanzania ingependa  kuona  panakuwepo na ajenda ambayo itakuwa jumuishi  na ya jumla lakini ikiwa na utofauti katika  majukumu.

Kuhusu  eneo la  maendeleo endelevu, Waziri amesema, Tanzania inaamini kuwa  upunguzaji wa umaskini  bado ni   muhimili mkuu wa maendeleo endelevu baada ya 2015. Akisisitiza kuwa ajenda hiyo lazima  sasa ifanyiwe kazi  kwa ari na kasi mpya  licha ya kwamba  bado  zipo ajenda nyingine ambazo ni muhimu kwa maendeleo ya binadamu kama ilivyoainishwa katika MDGs.

Aidha akasema  katika utekelezaji wa  malengo mapya ya maendeleo ni  vema pia kuhakikisha misingi ya ushirikiano  wa kimataifa  ikiwamo misaada ya  biashara na ufadhili wa kifedha katika kusaidia juhudi za kitaifa inaendelea kuwapo

 Katika eneo hilo la  maendeleo endelevu baada ya 2015   Waziri wa Fedha  ameongeza kuwa   uaandaji wa ajenda mpya na  malengo yake kusiwe  kana kwamba zinaelekezwa kwa upande mmoja tu yaani mataifa yanayoendelea, na kutilia mkazo ukusanyaji wa  mapato ya ndani. Kwa kile alichosema,  ushirikiano wa kweli wa kimataifa unataka juhudi za pamoja katika kuumaliza umaskini na njaa kwa wote.

Aidha Tanzania kupitia kwa Waziri wa Fedha imesisitiza kuwa katika utekelezaji wa  tamko la Rio+20 kuhusu “Dunia  tuitakayo” ipo haja   na umuhimu wa kupunguza pengo  kati ya walionacho na wasio nacho,  urejeshwaji wa  misaada ya maendeleo uliokwama baada ya mdororo wa uchumi, ubadilishanaji wa teknolojia za kisasa  ujuzi  na utaalam mbalimbali na kudumisha ushirikiano na uhusiano wa kimataifa.