Caf yapanga tarehe ya fainali za Afrika 2012

KHARTOUM, Sudan

SHIRIKISHO la Soka Barani Afrika CAF limepanga tarehe za mashindano ya Mataifa ya Afrika za 2012 zinazotarajiwa kufanyika Gabon na Guinea ya Ikweta.

Mashindano hayo hivi sasa yatachezwa tarehe 21 Januari mpaka 12 Februari, 2012.

Mechi ya ufunguzi wa mashindano hayo itachezwa Bata nchini Guinea ya Ikweta na mechi ya fainali itachezwa Libreville nchini Gabon.


Fainali za 2012 zitawezesha wachezaji wengi wa Afrika wanaocheza katika klabu za Ulaya kurudi kuchezea nchi zao bila matatizo kwa sababu tarehe iliyopangwa itakuwa ni kipindi cha majira ya baridi Ulaya na ligi nyingi za Ulaya huwa zinasimama kipindi hicho.

Klabu nyingi za Ulaya zilikuwa hazifurahishwi na kitendo cha kuwaachaia wachezaji wao kurudi kuchezea nchi zao wakati ligi zao zikiendelea.

Sheria ya Fifa  inasema klabu zinatakiwa kuwaachia wachezaji wakachezee nchi zao katika fainali za mataifa ya Afrika siku 14 kabla ya mechi ya ufunguzi.

CAF bado haijapanga tarehe na mahali ambapo upangaji wa ratiba ya fainali za Mataifa ya Afrika 2012 utafanyika.


CHANZO:MWANANCHI