TCIB:KAMPENI ZA UCHAGUZI BADO HAZINA BUSARA

Aliyekuwa  mgombea  udiwani kata ya  Nduli Ayub Mwenda akijinadi mbele ya mwenyekiti wake  Chadema Taifa Freeman Mbowe,katika uchaguzi huo uliofanyika hivi karibuni mgombea wa CCM alishinda 

Wana  CCM Nduli wakimpongeza mshindi wa nafasi ya udiwani Bw Mtove ..............................................................................

Mwandishi Kenneth John  wa matukiodaima.com Dar 

Kituo  cha  taarifa  kwa  wananchi  (TCIB)  kimetoa  tathimini  ya  uchaguzi  mdogo  wa  madiwani  uliofanyika  hivi  karibuni  sehemu  mbalimbali  nchini , na  kubaini  mambo  kadha  wa  kadha  katika  chaguzi  hizo  ikiwa  ni  pamoja   na   kampeni  hizo  kukosa   busara,

Akizungumza   na  waandishi  wa  habari  jijini  Dar  es  salaam   Mkurugenzi  mtendaji  wa  TCIB,  Deus  Kibamba  amesema  kuwa  vitendo  vya  ukosefu  wa  busara  wakati  wa  kampeni  ikihusisha  maneno   ya  vijembe,shutuma  na  fujo  za  mara  kwa  mara ,  pamoja  na  baadhi  ya  wafuasi  wa  vyama  kupanda    majukwaani  na   kuwashambulia  wagombea  pinzani  wao  kwa  kutumia  vyeo  vyao  katika  vyama,  sambamba  na  maeneo  wanakotoka,Ambapo  kibamba  amesema  hayo  yote   yanachangia  kupoteza  dhana   nzima  ya  umuhimu  wa  kampeni  za  kistaarabu  na  inachangia  pia    kupunguza  idadi  ya  watu  wanaohudhuria  mikutano  ya  kampeni.

Kibamba  aliendelea  kusema  kuwa  fujo   za  mara  kwa  mara  zimekuwa  zikitokea  hasa  kipindi  cha  kuelekea  mwishoni  mwa  mikutano  ya  kampeni,Ambapo  alitolea  mfano  katika  kata  za  Sombetini, Nyasura  na  Nduli  ambako  watu  hawakuwa  huru  kusema  wanaunga  mkono  chama  gani  kwa  kuhofiwa  kufanyiwa  fujo  na  hata  kuharibiwa  mali  zao, Na  hivyo  TCIB  kupendekeza  adhabu  kali  ziwe  zinatolewa  kwa  wagombea  na  mashabiki  wanaobainika  kuendesha  siasa  za  fujo,matusi,kejeli,na  dharau  ili  kukomesha  kampeni  chafu.

Aidha  Kibamba  amesema kuwa  kumekuwa  na  baadhi  ya  viongozi  wa  vyama   kusikika  wakitoa  kauli  ambazo  zina  dalili  ya  kuhamasisha  fujo  dhidi  ya  washindani  wao.Hivyo  kutokana  na  hali  hiyo  TCIB  imeanza  mawasiliano  na  Mwendesha  Mashitaka  Mkuu  wa  Mahakama  ya  Kimataifa  ya  uhalifu  wa  dhidi  ya  binadamu  (ICC)  Bi. Fatou  Bensouda  kwa  lengo  la  kumuomba  atume  timu  ya   wataalam  wake  kuja  Tanzania,  ili  kufanya  uchunguzi  na  tathimini   ya  awali  juu  ya  matamshi  ya  hivi   karibuni   ya  Mheshimiwa  Waziri  Mkuu  wa  Jamhuri  ya  Muungano  wa  Tanzania,  pamoja  na  matamshi  ya  hivi  karibuni  pia   ya  Mheshimiwa  Rais  wa  Jamhuri  ya  Muungano  wa  Tanzania  Jakaya  Mrisho   Kikwete  ambapo  alinukuliwa  akiwataka  wanachama  wa  chama  chake  kuacha  unyonge   na  kuonewa  wakati  wa  uchaguzi  na  waamke   na  kujibu  mapigo.

Ambapo  Kibamba  amesema   kuwa  endapo  matamshi  kama  hayo  yakiendelea  yanaweza  kusababisha  fujo  kubwa  na  kupelekea  mauaji  ya  ajabu  hususani  kuelekea  uchaguzi  mkuu  wa  mwaka  2015.

Pamoja  na  hayo  Kibamba   amesema  kuwa  kumekuwa  na  tatizo  la  mwitikio  mdogo  wa  wapiga  kura,  tatizo  ambalo  linaonekana  kukua  zaidi   na  kuwa  tatizo  kubwa,  Na  kusema  kuwa  mbaya  zaidi  baadhi  ya  vyama  vimeonekana   kufurahia  pindi  wanapoona  watu  wachache  zaidi  wakijitokeza  kupiga  kura,Hivyo  TCIB  imependekeza  sheria  za uchaguzi  zifanyiwe  mabadiliko  ili  kuzuia  mshindi  kutangazwa  mpaka  idadi  ya   wapiga   kura  inapofikia  asilimia  hamsini  ya  wapiga  kura  walioandikishwa  katika  eneo  husika.

Sambamba   na  hayo  Kibamba  amesema  kuwa   TCIB  imesikitishwa     na  mwitikio  mdogo  wa  upigaji  kura  pamoja  na  kuwepo  kwa  hamasa  kubwa   inayoonekana  wakati  wa  kampeni. 

Na  kutokana  na  hali  hiyo  TCIB  ilitaka  kujua  tatizo  hasa  ni  nini,  na  ndipo  walibaini  kuwa  uboreshaji  usio  wa  kudumu  na  wa  mara  kwa  mara  wa  daftari  la  kudumu  la  wapiga  kura  umekuwa  ni  tatizo   kubwa  linalowakosesha  wananchi  wengi  haki  ya  kupiga  kura  hususani  vijana  waliokuwa  na  umri  wa  miaka  17  wakati  wa  zoezi  la  uboreshaji  wa  daftari  kwa  mara  ya  mwisho  mwaka  2010.

Hivyo  TCIB  imetoa  wito  kwa   tume  ya  uchaguzi    kuweka  utaratibu  wa  watu  kujiandikisha  kila  mara  na  sio  mara  moja  kila  baada  ya  miaka  mitano.

Halikadharika  Kibamba  amesema  kuwa  kutokana  na  masuala  yaliyojitokeza  katika  tathimini  na  ufuatiliaji  walioufanya  wa  uchaguzi   mdogo  wa  madiwani,wamegundua    ipo  haja  ya  kuimarisha  mfumo  mzima  wa  uchaguzi  kwa  kuweka  makatazo  juu  ya  mambo  yanayotishia  kuharibu  uchaguzi,  na  kuongeza  kuwa  TCIB  ipo  tayari  kusaidia  kuimarisha  Jeshi  la  polisi  kwa  kuwapeleka  kuona  jinsi  Polisi  wa  Nchi  nyingine  wanavyosimamia  usalama  katika  uchaguzi.