Waliotangaza nia CCM waguswa na kauli ya JK

Mbunge wa Nzega, Dk Hamis Kigwangalla.PICHA|MAKTABA

Dar es Salaam. Siku moja baada ya Mwenyekiti wa CCM, Rais Jakaya Kikwete kudokeza kuwa atakayekuwa mgombea wake wa urais baadaye mwaka huu ni yule ambaye hajajitokeza mpaka sasa, makada wa chama hicho waliotangaza nia ya kugombea urais wamesema wana uwezo na sifa za kugombea nafasi hiyo, huku wasomi wakija na mtazamo tofauti.

Makada hao waliotangaza nia, kwa nyakati tofauti walisema kauli hiyo haina maana kuwa Rais Kikwete anawapinga, bali inalenga kuwataka makada zaidi wa chama hicho tawala wenye uwezo wajitokeze na kutangaza nia ya kugombea ili waweze kupimwa uwezo wao na Watanzania.

Juzi, wakati akihutubia katika sherehe za miaka 38 ya kuzaliwa kwa chama hicho mjini Songea, Rais Kikwete alisema, wapo watu wenye sifa zote za urais lakini hawajitokezi na hata wakiambiwa kuwa wanaweza husema hawajajiandaa, kwamba hao ndiyo wanaohitajika.

Rais Kikwete alitoa kauli hiyo wakati ambao baadhi ya makada wa CCM wakiwa wameanza kupita huku na kule kutafuta uungwaji mkono, huku baadhi yao wakiwa wamepewa onyo kutokana na kushiriki kampeni kabla ya muda na kushiriki vitendo ambavyo ni kinyume na maadili.

Ukiacha wale wanaotajwa, wanasiasa waliotangaza nia ni Naibu Waziri wa Sayansi na Teknolojia, Januari Makamba, Waziri wa Maliasili na Utalii, Lazaro Nyalandu, Mbunge wa Nzega, Dk Hamis Kigwangalla na Waziri Mkuu, Mizengo Pinda.

Akizungumza jana, Makamba alisema: “Ujumbe wa mwenyekiti uko wazi, kwamba hadi sasa hakuna ambaye anaweza kusema anaongoza katika mbio hizi na ni sahihi kabisa kwamba bado hatuna mgombea.

“Kitendo cha kugombea ni cha kijasiri kwa sababu unatengeneza maadui wengi kwa hiyo kuna watu ambao wanapata woga. Ujumbe wa Mwenyekiti umesaidia kuondoa woga kwa wale ambao hawajajitokeza.”

Dk Kigwangalla alisema: “Kila mtu ana mtazamo wake kuhusu suala hili la urais. Siwezi kushangaa kauli ya Rais Kikwete kwa sababu hivi karibuni wakati akiwa mkoani Tabora na Dodoma alizungumza suala hili, kuwataka vijana kujitokeza kugombea uongozi na mimi ni kijana nimetumia nafasi.”

“Unajua wapo waliodhani kuwa Rais Kikwete ana upendeleo na anataka vijana wachukue nafasi hiyo. Binafsi nadhani kauli hii ya Rais sasa itafungua ukurasa mpya, hata kwa wale ambao wameshapita umri wa ujana nao kutangaza nia,” alisema.

Kauli ya wasomi

Mhadhiri wa Chuo Kikuu Dar es Salaam, Bashiru Ally alisema: “Uchaguzi unahusisha ushindani na ushindani huo usiishie kutazama sifa za wagombea tu, pia utazame sifa za vyama wanavyotoka, ajenda ya vyama hivyo na historia zake.”

Mhadhiri Mwandamizi wa Chuo Kikuu Ruaha, Profesa Gaudence Mpangala alisema, “Tunahitaji Rais bora atakayeweza kuitoa Tanzania kutoka hapa ilipo na kuipelekea katika nafasi nzuri.”

Alisema kuwa rais bora anaweza kupatikana kutoka chama chochote cha siasa, kufafanua kuwa ndani ya CCM anaweza kupatikana mgombea bora lakini mfumo uliopo ukambadilisha na kupoteza ubora wake.

MWANANCHI