MECHI YA ZANZIBAR HEROES NA KILIMANJARO DMV PATAKUA HAPATOSHI, MAZOEZI KUANZA J2

 Timu ya Zanzibar Heroes

Timu ya Kilimanjaro

Mechi ya Muungano itakayochezwa siku ya Jumapili April 26, 2015 katika viwanja vya kisasa tofauti na ile ilipochezewa mwaka jana inasubiliwa kwa hamu hasa na wachezaji wa Zanzibar Heroes ambao wamesema mechi yao ya mwaka jana ushindi ulikuwa wa kwao lakini hujuma zilifanyika katika kupigiana penati ili mpira umalizike kwa ngoma droo.

Katika mechi hiyo iliyokua na upinzani wa hali juu kutoka timu zote mbili iliyoanza kwa timu ya Kilimanjaro kuanza kufunga magoli ya haraka haraka ikidhaniwa kuwa ingeweza kuibuka na ushindi mnono, lakini kipindi cha pili Zanzibar Heroes waligeuza mchezo na kuishambulia Kilimanjaro kama nyuki na kuweza kurudisha goli zote ilizokuwa imefungwa kipindi cha kwanza.


Mashabiki wengi wanatabiri mtanange wa mwaka huu patakua hapatoshi wakiwa na kumbukumbu ya mechi iliyopita iliyokua na upinzani wa ndani na nje ya uwanja.

Mwaka huu Jumuiya ya Watanzania DMV ndio mwandaaji wa sherehe ya Muungano inayotarajiwa kuadhimishwa siku ya Jumamosi April 25, 2015 na kufuatiwa na nyama choma na mechi ya mpira wa miguu na michezo mingine ikiwemo Netball kati ya Zanzibar na Tanzania Bara siku ya Jumapili April 26, 2015 ambayo ndio tarehe halisia ya muungano.

Timu ya Kilimanjaro inaanza mazoezi March 22, 2015 ikiwa na baadhi ya wachezaji wengine wakiwa wameanza maziezi kivyao. Wachezaji wengi wa mikoani wameipania mechi hiyo ambayo mwaka huu inatarajiwa kuwa na upinzani mkali.