MAKAMU WA PILI WA RAIS WA BURUNDI ATOROKA

Makamu wa Pili wa Rais wa Burundi anayedaiwa kutoroka nchini humo, Gervais Rufikiri.

Rais wa Burundi, Pierre Nkurunzinza.

Moja kati ya makamu wa rais wa Burundi anadaiwa kutoroka nchini humo baada ya kutangaza kuwa anapinga hatua ya rais wa nchi hiyo Pierre Nkurunziza kuwania urais kwa muhula wa tatu.

Makamu wa pili wa Rais wa Burundi Gervais Rufikiri amekimbia baada ya kuiambia runinga ya France24 kuwa, Nkurunzinza kugombea muhula huo wa tatu ni unakiuka sheria na katiba ya taifa hilo.

Wakimbizi wa Burundi.

Msemaji wa serikali hata hivyo amekanusha madai hayo na kusema kuwa Bw. Rufikiri amesafiri nje kwa ziara rasmi ya kikazi.

Kwa upande wake, Bw. Rufikiri amekaririwa akisema amekimbilia usalama wake akidai kuwa maisha yake yamo hatarini.

Viongozi wa Umoja wa Mataifa wakijadili mgogoro wa Burundi.

Msemaji huyo wa serikali amesema iwapo Bw. Rufikiri ametoroka Burundi ni kwa maslahi yake mwenyewe wala hakuna yeyote aliyemtishia maisha yake.

Kutoroka kwake kumeendana na kutoroka kwa makamishna wa tume huru ya uchaguzi na Jaji mmoja wa mahakama ya kikatiba.

Burundi imekumbwa na mzozo wa kisiasa tangu rais Nkurunziza atangaze hamu ya kuwania muhula wake wa tatu uongozini, wakati huo wapinzani wake wanasema kuwa muhula huo wa tatu unakiuka katiba ya taifa.

Kwa upande wake rais Nkurunziza anashikilia kukutu kuwa kulingana na makubaliano ya kusitisha vita ya Arusha, muhula wa kwanza aliochaguliwa na viongozi na wajumbe waliowakilisha majimbo hakuchaguliwa na umma kama inavyoelezewa na katiba ya nchi hiyo.

Kufikia sasa makundi ya upinzani yamekuwa yakiandaa maandamano katika barabara za Burundi hasa Mji wa Bujumbura wakimshiniza rais huyo achie ngazi.

Makundi ya kuteteza haki za kibinafsi yanasema kuwa hadi kufikia sasa watu 70 wameaga dunia katika makabiliano baina ya polisi wa kupambana na fujo na waandamanaji, zaidi ya watu wengine 500 wamejeruhiwa katika kipindi hicho cha miezi miwili iliyopita.

Aidha zaidi ya watu laki moja wametorokea mataifa jirani ikiwemo Tanzania kuepuka makabiliano na wengine kwa sababu ya hofu.

Mwezi uliopita jaribio la kumpindua madarakani bwana Nkurunziza lilitibuka, rais aliamuru kuahirishwa kwa uchaguzi mkuu hadi Julai 15 kufuatia shinikizo la viongozi wa kanda ya Afrika Mashariki na kati.

Umoja wa mataifa unaendelea na jitihada za kuleta uwiano baina ya serikali na makundi ya upinzani, wakati huo Burundi imesema itafanya mazungumzo na wapinzani baada ya uchaguzi wa wabunge na madiwani, utakaofanyika Jumatatu ijayo.

NA BBC